ރާއްޖެއިން ކޮރޯނާވައިރަސް އަށް ޝައްކު ކުރެވޭ މީހަކު ފެނިއްޖެ ނަމަ ވަގުތުން އާންމު ކުރާނެ: މިނިސްޓަރު

ޗައިނާގެ ވޫހާން ސިޓީން ފެނުނު ނުރައްކާތެރި ކޮރޯނާވައިރަސް އަށް ޝައްކު ކުރެވިގެން ރާއްޖޭގައި އެއްވެސް މީހަކު ޓެސްޓް ކޮށްފި ނަމަ އެކަން ވަގުތުން ވަގުތަށް އާންމު ކުރައްވާނެ ކަމަށް ހެލްތު މިނިސްޓަރު އަބްދުﷲ އަމީން މިރޭ ވިދާޅުވެއްޖެ އެވެ.

"މީހަކަށް ޝައްކު ކުރެވިއްޖެ ކަމަށް ވާ ނަމަ ނުވަތަ ކޭސްއެއް ފެނިއްޖެ ކަމަށް ވާ ނަމަ، މިއިން ކޭސް އަކަށް ޓެސްޓް ކުރެވިއްޖެ ކަމަށް ވާ ނަމަ އަޅުގަނޑުމެން ވަގުތުން ވަގުތަށް އެ މައުލޫމާތު އާންމު ރައްޔިތުންނާ ހިއްސާ ކުރާނަން،" ހެލްތު މިނިސްޓްރީގައި ދެންމެ ބޭއްވި ޕްރެސް ބްރީފިންގައި މިނިސްޓަރު އަމީން ވިދާޅުވި އެވެ.

އޭނާ ވިދާޅުވީ، ރާއްޖެ އިން ކޮރޯނާވައިރަސް އަށް ޝައްކު ކުރެވޭ މީހަކު އަދި އަލާމާތްތައް ހުރި މީހަކު ވެސް މިހާތަނަށް ފެނިފައި ނެތް ކަމަށެވެ. އަމީން ވިދާޅުވި ގޮތުގައި އެ ވައިރަސްގެ އަލާމާތްތައް ހުރި މީހަކު ދެނެގަތުމަށް ރާއްޖެ އިން ވެސް އަމަލު ކުރަނީ ޑަބްލިއުއެޗްއޯ އާއި އެހެން ގައުމުތަކުގައި ވެސް ކަނޑައަޅާފައިވާ އުސޫލެވެ.

ކޮރޯނާވައިރަސްގައި އެތައް ބަޔަކު މަރުވެ، އެތައް ސަތޭކަ ބައެއްގެ ގައިން އެ ވައިރަސް ވަނީ ފެނިފަ އެވެ. ރާއްޖެ އައި ބޭރުގެ މީހެއްގެ ގައިން ވެސް އެ ވައިރަސް ފެނުނު ކަމަށް އަޑު ފެތުރުނަސް، އެކަން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކުރިން ވެސް އޮތީ ދޮގުކޮށްފަ އެވެ.

ހެލްތު މިނިސްޓަރު އަމީން މިރޭ ބޭއްވެވި ނިއުސް ބްރީފިންގައި ވެސް އެ ވާހަކަތައް ދޮގުކުރެއްވި އެވެ.

އަމީން ވިދާޅުވި ގޮތުގައި، ކޮރޯނާވައިރަސްގެ ސްކްރީނިން އިތުރުވާ ވަރަކަށް ސިއްހީ ދާއިރާގެ މީހުންގެ ސުވާލުތައް ގިނ ވާނެ އެވެ. އެކަމަކު، އެއިން ކޮންމެ ފަހަރަކީ އެ ރޯގާ އަށް ޝައްކު ކުރެވިގެން ކުރާ ސުވާލެއް ނޫން ކަަމަށް އޭނާ ވިދާޅުވި އެވެ.

"އަޅުގަނޑުމެން ވަރަށް ބޮޑަށް ސްކްރީނިން ކަންކަން ރަނގަޅު ކުރުމަށް މި ވިސްނަނީ. ޚާއްސަކޮށް އެއާޕޯޓުގައި ބެހެއްޓިފައި ހުރި ކެމެރާ އިން ދެނެގަންނާނެ މީހާގެ ބޮޑީ ޓެމްޕަރޭޗަރު. ބޮޑީ ޓެމްޕަރޭޗާ އަށް ބަލާފައި ފުރަތަމަ ކުރަންޖެހޭ ސުވާލުތައް އަދި ފުރަތަމަ އިންވެސްޓިގޭޝަންގެ ތެރެއިން އަޅުގަނޑުމެން އައިޑެންޓިފައި ކުރާނެ މި ބައްޔަށް ތުހުމަތު ކޮށްގެން ކުރަންޖެހޭ ސުވާލުތައް، ކުރަންޖެހޭ ޓެސްޓުތައް ކުރަން ޖެހޭތޯ،" އަމީން ވިދާޅުވި އެވެ.

އެކަމަކު ވައިރަސް ހުރިކަން ޔަގީން ކުރާނީ ބައިނަލްއަގްވާމީ މިންގަނޑުތަކާ އެއްގޮތަށް، ރާއްޖެ އިން ބޭރު ލެބޯރެޓަރީތަކަށް ފޮނުވައިގެން ބަލަންޖެހޭ ކަންކަން ބެލުމަށް ފަހު ކަމަށް އޭނާ ވިދާޅުވި އެވެ.

އަމީން ވިދާޅުވި ގޮތުގައި، ކޮރޯނާވައިރަސްގެ ހާލަތު ރާއްޖޭގައި އޮތީ އާންމުން ކަންބޮޑުވާންޖެހޭ ދަރަޖައިގައެއް ނޫނެވެ. އެކަމަކު، އެ ވައިރަސްގެ ނުރައްކާތެރިކަން ބޮޑުކަމުން މި ވަގުތު ރައްކާތެރިކަމުގެ ފިޔަވަޅުތައް އާންމުން އަޅަމުން ގެންދިއުމަށް އޭނާ އެދިވަޑައިގަތެވެ. އެގޮތުން، ޑޮކްޓަރުންނާއި ސިއްހީ އިދާރާތަކުން ދޭ ލަފައާ އެއްގޮތަށް އަމަލު ކުރަމުން ދިއުމާއި ރަނގަޅު މައުލޫމާތު ހޯދަމުން ދިއުމަށް މިނިސްޓަރު ގޮވާލެއްވި އެވެ.

"ބަލީގެ ސިފަތަކަކީ އާންމު ރޯގާއެއްގެ ސިފަތައް. މި ބަލި ފެތުރެނީ އެކަކު ގައިން އަނެކަކު ގަޔަށް. އަޅުގަނޑަށް ޑޮކްޓަރުންނާއި ފަންނީ ބޭފުޅުން މައުލޫމާތު ދޭ ގޮތުގައި މިއީ އެއް ގައުމުން އަނެއް ގައުމަށް ޕާރުސަލްގެ ޒަރީއާ އިން އަނެއް ގައުމަށް ދާއިރު އަންނަ ބައްޔެއް ކަމަށް އަދި މައުލޫމާތު ލިބިފައެއް ނެތް،" އަމީން ވިދާޅުވި އެވެ.

ވައިރަސް ހުރި މީހަކު ފެނިއްޖެ ނަމަ އެ މީހަކު ކަރަންޓީން ކުރުމަށްޓަކައި، ހުޅުމާލޭގެ އޯޓިޒަމް ސެންޓަރު ކައިރީގައި ހުންނަ 10 ކްލާސްރޫމުގެ ޕްރީ ސްކޫލް ހަމަޖައްސާފައިވާއިރު، ސާޖިކަލް މާސްކް ވެސް އިތުރަށް ގެނައުމުގެ މަސައްކަތް ކުރަމުންދާ ކަމަށް އަމީން ވިދާޅުވި އެވެ. އަދި އަންނަ ބުދަ ދުވަހާ ހަމައަށް 400،000 މާސްކް ރާއްޖޭގައި ހުންނާނެ ކަމަށް އޭނާ ވިދާޅުވި އެވެ.

އަމީން ވިދާޅުވި ގޮތުގައި، ކޮރޯނާވައިރަސްއާ ގުޅިގެން ޚާއްސަ ހޮޓްލައިނެއް ގާއިމްކޮށް، މައުލޫމާތު ދިނުމުގެ މަސައްކަތް ވެސް ވަނީ ފަށައިފަ އެވެ.

އެޗްޕީއޭގެ މެޑިކަލް އޮފިސަރު ޑރ. ފާތިމަތު ނަޒްލާ މިރޭގެ ނިއުސް ބްރީފިންގައި ވިދާޅުވީ، ސްކްރީން ކުރުމުގެ ތެރެއިން ހުން އައިސްފައި ތިބޭ މީހުންނާ ސުވާލު ކުރުމުގެ ތެރޭގައި ދަތުރުކުރި މަންޒިލާއި ތާރީޚުތައް ފަދަ މައުލޫމާތު ސާފުކުރުމަށް ސުވާލު ކުރުމަކީ އެކަށީގެންވާ ކަމެއް ކަމަށެވެ. އަދި ވައިރަސް ހުރި ކަމަށް ޝައްކު ކުރެވޭ މީހުން ކަމަށް ބަލާނީ އެކަމަށް ކަނޑައެޅިފައި ހުރި މިންގަނޑުތަކަށް ފެތުމުން ކަމަށް ވެސް ވިދާޅުވި އެވެ

"ވަޑައިގަންނަވާނެ ބޭފުޅުން ހުން އައިސްފައި ހުރި ނަމަ އެ މީހަކު ޕުލްކޮށްގެން ސުވާލުކޮށް، އަޅުގަނޑުމެންގެ ކްރައިޓީރިއާއަށް ފިޓްވޭތޯ މި ބަލަނީ. އަޅުގަނޑަށް ހީވަނީ މީޑިއާތަކުގައި އެގޮތަށް މި ދެއްކެވޭ ވާހަކަތަކަކީ ކްރައިޓީރިއާ އަށް ފިޓް ވޭތޯ ބަލަން މީހުންނާ ސުވާލުތައް ކުރީމަހެން ސަސްޕެކްޓް ކޭސްއޭ މި ކިޔަނީ. އެކަމަކު އެއީ އަދި ސަސްޕެކްޓް ކޭސްއެއް ނޫން،" ނަޒްލާ ވިދާޅުވި އެވެ.

އޭނާ ވިދާޅުވި ގޮތުގައި، ކޯރާނާވައިރަސް އަކީ އިންޒްލުއެންޒާ އާއި މީސްލްސް ފަދައިން ގައިން ގަޔަށް އަރާ ބައްޔެކެވެ. އެކަމަކު މިއީ އާންމުން ކަންބޮޑުވާންޖެހޭ ހާލަތެއް ނޫން ކަމަށް އޭނާ ވިދާޅުވި އެވެ.