ޖާބިރުގެ ވަޓަވައްރެހާ ރިސޯޓް ގަންނަން ޝައުގުވެރިވާ ބަޔަކު ހޯދަނީ

ކާށިދޫ ދާއިރާގެ މެމްބަރު އަބްދުﷲ ޖާބިރު، ރިސޯޓެއްގެ ގޮތުގައި ތަރައްގީ ކުރައްވަމުން ގެންދަވާ ގދ. ވަޓަވައްރެހާ ވިއްކާލަން ނިންމައި ޝައުގުވެރިކަން ހުރި ބަޔަކު ހޯދަން ފަށައިފި އެވެ.

ޑީއާރުޕީގެ ލީޑަރު ޖާބިރުގެ ކުންފުނި، ޔޮޓް ޓުއާސް އިން ތަރައްގީ ކުރަމުންދާ މި ރަށުގެ 60 ޕަސެންޓް މަސައްކަތް މިހާރު ވަނީ ނިމިފަ އެވެ.

ޖާބިރު "މިހާރު" އަށް ވިދާޅުވީ، ކޮންސްޓްރަކްޝަންގެ ހުރިހާ މަސައްކަތެއް އަންނަ އަހަރު ނިންމައި ޑިސެމްބަރުގެ ތެރޭގައި ރިސޯޓް ހުޅުވާނެ ކަމަށެވެ.

ޔޮޓް ޓުއާސް އިން މީގެ ކުރިން ވެސް ވަނީ ރިސޯޓުގެ ގޮތުގައި ރަށްތައް ތަރައްގީ ކުރުމަށް ފަހު ވިއްކާލައިފަ އެވެ.

ވަޓަވައްރެހާގެ ނަން މިހާރު ވަނީ ރާޅުވެލި ކްލަބް ރިސޯޓަށް ބަދަލުކޮށްފަ އެވެ. މި ރަށުގައި 200 ކޮޓަރި ހަދާއިރު ތަފާތު ނުވަ ކެޓަގަރީއެއްގެ ކޮޓަރިތައް އޭގެ ތެރޭގައި ހިމެނެ އެވެ. އެކި ފެންވަރުގެ ކޮޓަރިތައް ހަދާ މި ރަށުގައި އާންމުކޮށް ރާއްޖޭގެ އެހެން ރިސޯޓުތަކުގައި ހުންނަ ގޮތަށް ބީޗް ވިލާތަކާއި ވޯޓާ ވިލާތައް ވެސް ހުންނާނެ އެވެ.

އަދި ތިން ރެސްޓޯރެންޓާއި ހަތަރު ބާ ހުންނާނެ އެވެ. ވޯޓާ ސްޕޯޓްސް އާއި އެކްސްކާޝަން ގިނަ ހަރަކާތްތަކެއް ރަށުގައި އިންތިޒާމު ކުރެވޭނެ ގޮތަށް ރަށް ތަރައްގީ ކުރާއިރު ސްޕާގެ ހިދުމަތް ދިނުމަށް ލޭކް ސްޕާއެއް އެ ރިސޯޓުގައި ހަދާނެ އެވެ.

އެ ރިސޯޓު ގަންނަން ބޭނުންވާ މީހުން އެކަމަށް އެދި ޕްރޮޕޯޒަލް ހުށަހަޅަން އެ ކުންފުނިން އެދެ އެވެ.