ޔޮޓް ޓުއާސްގެ 3.6 މިލިއަން ޑޮލަރުގެ ދަރަނި ވެސް ދަމަހައްޓައިފި

ޔޮޓް ޓުއާސް އަށް ކުންފުންޏަށް ކުރިން ދޫކުރި ހއ. ބީނާފުށްޓާއި އެ ރަށް ކައިރީގައި އޮންނަ ކަނޑާލި ފިނޮޅުގެ ކުއްޔާއި ޖޫރިމަނާއަށް 3.6 މިލިއަން ޑޮލަރު (55 މިލިއަން ރުފިޔާ) ދައްކަން ކުރި ހުކުމް ހައި ކޯޓުން މިއަދު ދަމަހައްޓައިފި އެވެ.

އެހެން ރަށެއްގެ މައްސަލައިގައި ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރުގެ މަސްލަހަތު އޮންނަ ޔޮޓް ޓުއާސް އިން ދައުލަތަށް ދައްކަން ޖެހުނު 29 މިލިއަން ޑޮލަރު (447 މިލިއަން ރުފިޔާ) ގެ ދަރަނި ދާދި ފަހުން ހައި ކޯޓުން ދަމަހައްޓާފައި ވަނިކޮށް، އެ ކޯޓުން އިއްޔެ ދެމެހެއްޓީ އެ ކުންފުންޏަށް 2013 ވަނަ އަހަރު ދޫކުރުމަށް ފަހު 2016 ވަނަ އަހަރު އަތުލި ބީނާފުށްޓާއި ކަނޑާލި ފިނޮޅުގެ ކުއްޔާއި ޖޫރިމަނާ އެވެ. މީރާ އިން ދައުވާ ކުރުމުން 3.6 މިލިއަން ޑޮލަރު ދައްކަން ސެޕްޓެމްބަރު 2017 ގައި ސިވިލް ކޯޓުން އޮތީ ހުކުމްކޮށްފަ އެވެ.

އެ މައްސަލަ ޔޮޓް ޓުއާސްގެ ފަރާތުން އިސްތިއުނާފް ކުރުމުން ހައި ކޯޓުން މިއަދު ކުރި ހުކުމުގައިވަނީ އެއްބަސްވުމުގެ ދަށުން ޖޫރިމަނާގެ ގޮތުގައި ނެގި މިންވަރު އިންސާފުވެރި ނޫން ކަމަށް އެ ކުންފުނިން ބުނެފައި ވިޔަސް، އެއީ ޓޫރިޒަމްގެ ބޭނުމަށް ތަންތަން ކުއްޔަށް ދޫކުރުމުގެ ގަވާއިދުގެ ދަށުން ޖޫރިމަނާގެ ގޮތުގައި ނަގަމުންދާ މިންވަރު ކަމަށެވެ. އަދި އެއްބަސްވުމުގައި ސޮއިކުރުމަށްފަހު މި މަރުހަލާގައި އޭގެ އަދުލުވެރިކަމާ މެދު ސުވާލު އުފެއްދިޔަސް، އެއީ ބަލައިގަނެވޭނެ ކަމެއް ނޫން ކަމަށް ހުކުމުގައިވެ އެވެ.

ދަށު ކޯޓުގެ ހުކުމަށް ބަދަލު ގެންނަންޖެހޭ ސަބަބެއް ނެތް ކަމަށް ހައި ކޯޓުން ނިންމެވީ އެ މައްސަލަ ބެއްލެވި ފަނޑިޔާރުންގެ އިއްތިފާގުންނެވެ. އެއީ ފަނޑިޔާރު ހުސައިން ޝަފީއުގެ އިތުރުން ފަނޑިޔާރު އަލީ ސަމީރު އަދި ފަނޑިޔާރު ފާތިމަތު ފަރުހީޒާ އެވެ.

ބީނާފުށްޓާއި ކަނޑާލިފިނޮޅު ސަރުކާރުން އަތުލި މައްސަލަ ވެސް ސިވިލް ކޯޓާއި ހައި ކޯޓުން ކުރިން ނިންމާފައި އޮތީ ދައުލަތާ އެއްކޮޅަށެވެ. މިދިޔަ ހަފުތާގައި ދައުލަތާ އެއްކޮޅަށް ހައި ކޯޓުން ނިންމީ ޔޮޓް ޓުއާސަށް ދޫކުރި ހއ. އަލިދޫ ރިސޯޓްގެ ކުއްޔާއި ޖޫރިމަނާގެ މައްސަލަ އެވެ.