ކައުންސިލަރުންގެ އަދަދު އިތުރުވުމަކީ ބުރައެއް ނޫން: ރައީސް

ލާމަރުކަޒީ ގާނޫނަށް ގެނައި އިސްލާހާ އެކު ރަށު ކައުންސިލާއި އަތޮޅު ކައުންސިލްތަކުގެ އިތުރުން ސިޓީތަކުގެ ކައުންސިލަރުންގެ އަދަދު އިތުރުވި ނަމަވެސް އެއީ ދައުލަތަށް ބުރަ އަކަށް ނުވާނެ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.

އަންނަ އޭޕްރީލް މަހު އޮންނަ ލޯކަލް ކައުންސިލް އިންތިހާބުގައި ހޮވާ ކައުންސިލަރުންގެ އަދަދު އިތުރު ވަނީ ވަކި ގޮނޑިތަކެއް އަންހެނުންނަށް ހާއްސަ ކުރާތީ އެވެ. މިހާރު ތިބޭ 655 ކައުންސިލަރުންގެ ބަދަލުގައި ދެން އޮންނަ އިންތިޚާބެއްގައި 980 ކައުންސިލަރުން އިންތިހާބު ކުރުމަށް ވަނީ ނިންމައިފަ އެވެ.

ރާއްޖޭގެ ހުރިހާ ކައުންސިލްތައް ހިމެނޭ ގޮތުން ކްރޮސް ރޯޑްސްގައި ދެ ދުވަހަށް ފެށި "ވިއަވަތި ރާއްޖެ" މަހާސިންތާގައި ކައުންސިލަރުންގެ އަދަދު އިތުރުވުމާ ގުޅޭގޮތުން ކައުންސިލަރަކު ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ ކައުންސިލަރުންގެ އަދަދު އިތުރުވުމަކީ ސަރުކާރަށް ބުރައަކަށް ނުވާނެ ކަމަށެވެ. އެކަމަށް ހޭދަ ކުރަން ޖެހޭ 48 މިލިއަން ރުފިޔާ އަކީ ރައްޔިތުންނަށް ލިބޭ ހިދުމަތާ ބަލާއިރު ބޮޑު އަދަދެއް ނޫން ކަމަށް ވެސް ވިދާޅުވި އެވެ.

"އެއީ ބުރައެއް ނޫން. އަޅުގަނޑުމެން ހިސާބުކޮށްފައި އެއީ އަޅުގަނޑުމެންނަށް އުފުލޭ ވަރުގެ ކަމަކަށްވާތީ އަޅުގަނޑުމެން އެކަން ކުރީ. އެކަމަށް ދައުލަތުގެ ބަޖެޓުން ހަރަދު ކުރަން ޖެހެނީ 48 މިލިއަން ރުފިޔާ،" ތަފްސީލް ދެއްވަމުން ރައީސް ވިދާޅުވި އެވެ.

ދައުލަތުގެ މާލިއްޔަތަށް ބުރަނުވާ ގޮތުގެ މަތީން ކައުންސިލަރުންގެ މުސާރައަށް ހެޔޮ ބަދަލެއް ގެނެވޭނެ ކަމަށް ވެސް ރައީސް ވިދާޅުވި އެވެ. އަދި ކުރިއަށް އޮތްތަނުގައި އަންހެނުންގެ ކޮމެޓީއަށް މުސާރަ ލިބިގެންދާއިރު އެ ކޮމެޓީއަށް ގާބިލް އަންހެނުން ކުރިމަތި ލައްވާނެ ކަމަށް އުއްމީދު ކުރައްވާ ކަމަށް ވެސް ރައީސް ވިދާޅުވި އެވެ.

އަންހެން ކައުންސިލަރުން އިތުރުކުރާތީ ކަންބޮޑުވުންފާޅުކުރައްވައި ކައުންސިލަރަކު ފާޅުކުރެއްވި ކަންބޮޑުވުމަކަށް ޖަވާބު ދެއްވަމުން ރައީސް ވިދާޅުވީ އަންހެނުންނަށް ކަންކަން ކުރެވޭނެ ކަމަށާއި ކެބިނެޓުގެ 33 ޕަސެންޓަކީ އަންހެނުން ކަމަށެވެ. އަދި މިއަހަރު ނިމުމުގެ ކުރިން ރާއްޖޭން ބޭރަށް ކަނޑައަޅާ ސަފީރުންގެ ޕަސެންޓް ދެ ޖިންސަށް ހަމަހަމަ ވެގެން ދާނެ ކަމަށް ރައީސް ވިދާޅުވި އެވެ. އޭގެން ދައްކައިދެނީ އަންހެނުންނަށްވެސް ކަންކަން ކުރެވޭކަން ކަމަށް ރައީސް ވިދާޅުވި އެވެ.

ބާރުތައް ރަށްތަކަށް ދީފައި އޮތްއިރު މާ ތަރައްގީވި!

ކައުންސިލްތަކުގެ ބަޖެޓު އަންނަ އަހަރު ބޮޑުތަނުން އިތުރުކޮށްދީފައިވާއިރު އެއީ ލާމަރުކަޒީ ނިޒާމު ރަނގަޅަށް ހިންގުމަށް ކުރި ކަމެއް ކަމަށްވެސް ރައީސް ވިދާޅުވި އެވެ. ރައީސް ވިދާޅުވީ ލާމަރުކަޒީ ނިޒާމަކަށް ރާއްޖެ ހިންގުން ބަދަލު ކުރީ އެ ނޫން ގޮތަކަށް ރާއްޖެ ތަރައްގީ ކުރެވެން ނެތިގެން ކަމަށެވެ. ޖަޒީރާ ވަންތަ މިގައުމުގެ ރައްޔިތުން ހަމަ ޖެހިގެން ދިރިއުޅެވެން އޮތީ ރަށްތައް ތަރައްގީ ކުރެވިގެން ކަމަށް ރައީސް ވިދާޅުވި އެވެ.

"ހިންގުމުގެ ބާރު ކައުންސިލްތަކަށް ދިނުމާއެކީގައި މާލީގޮތުން ފުއްދުންތެރިކަން ރަށްތަކަށް ދޫކޮށްލަން ޖެހޭ. މި ނޫން ގޮތަކަށް މިކަން ކުރެވޭތަނެއް އަޅުގަނޑުމެންނަކަށް ނުފެނޭ،" ގިނަ އަދަދެއްގެ ކައުންސިލަރުން ބައިވެރިވި މަހާސިންތާގައި ރައީސް ވިދާޅުވި އެވެ.

މީގެ ޒަމާންތަކެއް ކުރިން ބާރުތައް ރަށްތަކަށް ދޫކޮށްލާފައި އޮތްއިރުގައި ބައެއް ރަށްތަކާއި އަތޮޅުތައް ތަރައްގީވެފައިވާކަން އެނގެން އެބައޮތް ކަމަށް ވެސް ރައީސް ވިދާޅުވި އެވެ.

"އެ ބާރުތައް ދޫކޮށްލާފައި އޮތްއިރު ވިޔަފާރި ކުރުމުގައި ސީދާ އެ ރަށަކުން ރާއްޖޭން ބޭރަށް ދަތުރުކޮށް މުދާ ގެނެވޭ. ތައުލީމް ހާސިލް ކުރުމަށްޓަކައި ރަށްރަށުން ސީދާ ރާއްޖޭން ބޭރަށް ދަރީން އެ ރަށްރަށުގެ ރައްޔިތުން ފޮނުވާފައި އެބަހުރި. އޭގެ ހެޔޮ ނަތީޖާ ފެނިފައި އެބަހުރި،" މަޖިލީހުގެ ރައީސް، ރައީސް މުހައްމަދު ނަޝީދު ވެސް ބައިވެރިވެ ވަޑައިގެންނެވި މަހާސިންތާގައި ރައީސް ވިދާޅުވި އެވެ.

ނަމަވެސް ވަކި ހިސާބަކުން ބާރުތައް އެއްތަނަކަށް ޖަމާ ކުރީ ކަމަށާއި އެއާއެކު މީހުންގެ މެދުގައި ހަމަހަމަކަން ގެއްލިގެން ދިޔަ ކަމަށް ރައީސް ވިދާޅުވި އެވެ. ބާރުތައް ކައުންސިލްތަކަށް ދޭން ނިންމީ އެކަންކަމަށް ބަލައިގެން ކަމަށް ވެސް ރައީސް ވިދާޅުވި އެވެ.

ރައީސް ވިދާޅުވި ގޮތުގައި ރައްޔިތުންގެ ހާއްސަ މަޖިލީހުގައި އެ ބާރުތައް ދިނުމުގެ މަސައްކަތް ކުރެއްވިއިރު އެކަންވީ ބުރަ ކަމަކަށެވެ. އެކަން ކާމިޔާބު ކުރެވުނީ އެމްޑީޕީން އޭރު ކުރި މަސައްކަތުން ކަމަށް އޭރު ޅ. އަތޮޅުގެ މެމްބަރުކަން ކުރެއްވި ރައީސް ވިދާޅުވި އެވެ.

ގާނޫނެއް ފާސްވި ނަމަވެސް އޭރު އޮތް މަޖިލީހުން އެ ގާނޫނު ފާސްކުރީ އެމްޑީޕީން ބޭނުންވި ގޮތަށް ނޫން ކަމަށް ރައީސް ވިދާޅުވި އެވެ. އޭރު އެކަން ކުރީ ނަމެއްގައި ކަމަށާއި އޭގެ ސަބަބުން ނަތީޖާއެއް ނުނިކުމެ އެތައް ފައިސާއެއް ހަރަދު ވެގެން ދިޔައީ ކަމަށް ރައީސް ވިދާޅުވި އެވެ.

ރައީސް ވިދާޅުވި ގޮތުގައި މިހާރު މަސައްކަތް ފަށާފައިވަނީ ފުރިހަމަ މާނައިގައި ރާއްޖެ ލާމަރުކަޒީ ކުރުމަށެވެ.