ހަރުކަށި ފިކުރާ ގުޅެނީ ޖަލުން ނުކުންނަ މީހުންނާއި މުޖުރިމުން: އާދަމް ޝަރީފް

ހަރުކަށި ފިކުރުގެ ހަރަކާތްތަކާ ގުޅެނީ ޖަލުން ނުކުންނަ މީހުންނާއި މުޖުރިމުން ކަމަށް ކުރީގެ ޑިފެންސް މިނިސްޓަރު އަދި ރައްޔިތުންގެ މަޖިލިހުގެ މަޑުއްވަރީ ދާއިރާގެ މެމްބަރު އާދަމް ޝަރީފް މިއަދު ވިދާޅުވެއްޖެ އެވެ.

ށ. މާއުނގޫދު އަށް ބަޔަކު އަރައި އައިސިސްގެ ދިދަ ކުރެހި މައްސަލަ އާއި ކުޑަ އަންހެން ކުދިންނަށް ޖިންސީ ގޯނާކުރުމުގެ މައްސަލަތައް އިތުރުވެފައިވާތީ މަޖިލިހަށް ހުށަހެޅި ކުއްލި މައްސަލަ އަށް ބަހުސް ކުރައްވައި އާދަމް ޝަރީފް ވިދާޅުވީ ހަރުކަށި ފިކުރުގެ ހަރަކާތްތައް ފެށުނީ 2000 ވަނަ އަހަރު ކަމަށެވެ. އަދި މިއަދާ ހަމަ އަށް އައިއިރު، އެފަދަ ހަރަކާތްތައް ހުއްޓުވިފައި ނުވާތީ އެކަމާ ކަންބޮޑުވެވަޑައިގަންނަވާ ކަމަށް ވެސް އާދަމް ޝަރީފް ވިދާޅުވި އެވެ.

އެގޮތުން މާއުނގޫދު އަށް ބަޔަކު އަރައި، އެ ރަށުގެ އެކި ތަންތަނުގައި އައިސިސްގެ ދިދަ ޖެހި މައްސަލައިގައި ސަލާމަތީ ބާރުތަކުން އެލާޓަށް އަންނަން ޖެހޭ ކަމަށް އާދަމް ޝަރީފް ވިދާޅުވި އެވެ.

ދޯންޏެއްގައި ލަނޑާ ނަގަން އުޅުނު ބަޔަކު މާއުނގޫދޫ އަށް އަރައި 13 ވަރަކަށް ގޭގެ ފާރަށް އައިސިސްގެ ލޯގޯ ސްޕްރޭ ކުރި މައްސަލަ ފުލުހުން އަންނަނީ ބަލަމުންނެވެ.

އާދަމް ޝަރީފް ވިދާޅުވި ގޮތުގައި 2001 ވަނަ އަހަރު ދިވެއްސަކު ޕާކިސްތާނުން ހައްޔަރުކޮށްފައިވާ ކަން ރާއްޖޭގެ ތާރީހުން އެނގެން އެބައޮތެވެ. އޭގެ ފަހުން 2002 ވަނަ އަހަރު އެ މީހާ ރާއްޖެ އައިސް، ސީއެޗްއެސްސީގައި ކިޔަވަމުން ދިޔަ ކުދިންތަކެއް ނަގައި އެ މަސައްކަތް ފެށި ކަމަށް އޭނާ ވިދާޅުވި އެވެ.

މީގެ އިތުރުން 2003 ވަނަ އަހަރު ބޭރު ގައުމަކުން ކިޔަވައިގެން ރާއްޖެ އައި މީހަކު، ފާޅުކަން ބޮޑު ގޮތެއްގައި ހައްދުފަހަނައަޅައި ދިއުމުގެ ހަރަކާތްތަކަށް ގޮވާލަމުންދިޔަ ކަމަށް ވެސް ވިދާޅުވި އެވެ.

"އަޅުގަނޑުމެންނަށް ފެންނަ ގޮތުގައި 2006 ވަނަ އަހަރާއި 2007 ވަނަ އަހަރަކީ މި ހަރަކާތްތައް ރާއްޖޭގައި ވަރަށް ބޮޑަށް ފުޅާވެގެން ދިޔަ ދެ އަހަރު،" އާދަމް ޝަރީފް ވިދާޅުވި އެވެ.

މިއަދާ ހަމައަށް އައިއިރު، މި މައްސަލަތައް ހައްލު ނުވެ އޮތުމުން ކަންބޮޑުވެވަޑައިގަންނަވާ ކަމަށާއި މިކަމުގެ ތެރޭގައި އުޅެނީ ޖަލުތަކުން ނުކުންނަ މީހުންނާއި މުޖުރިމުން ކަމަށް އޭނާ ވިދާޅުވި އެވެ.

"އެހެންވީމަ، ދައުލަތުގެ ޒިންމާއަކަށް ހަދަން އެބަޖެހޭ، މިހެން ހުރި ހުރިހާ ކަމެއް ހުއްޓުވޭނެ ގޮތަކަށް އަޅުގަނޑުމެން މަސައްކަތް ކުރުން،" އާދަމް ޝަރީފް ވިދާޅުވި އެވެ.

ހާއްސަކޮށް ޖަލަށްލާ މީހުންނާ މެދުގައި މުއާމަލާތް ކުރެވޭ ގޮތާއި އެމީހުންގެ އުޅުމަށް އަންނަ ބަދަލުތަކާ ދޭތެރޭގައި ވަރަށް ބޮޑަށް ވިސްނަން ޖެހޭ ކަމަށް އާދަމް ޝަރީފް ވިދާޅުވި އެވެ.

އާދަމް ޝަރީފް ވިދާޅުވި ގޮތުގައި އިސްލާމް ދީނުގައި ދީނީ ގޮތުން ހައްދުފަހަނައަޅައި ދިއުމަކީ ދީން ހުއްދަކުރާ ކަމެއް ނޫނެވެ. އަދި ކުޑަކުދިންނާ ކައިވެނި ކުރުން ބަލައިނުގަނެވޭނެ ކަމަށް އޭނާ ވިދާޅުވި އެވެ.

އިސްލާމް ދީން ރަނގަޅަށް އުނގެނިގެން ތިބި އިލްމުވެރިންނަކީ ހަރުކަށި ކަމަށް ތާއީދުކުރާނެ ބައެއް ނޫން ކަމަށް ވެސް އާދަމް ޝަރީފް ވިދާޅުވި އެވެ. އެހެންވެ، ދީނީ އިލްމުވެރިން ވެސް މަސައްކަތްކޮށްގެން ހަރުކަށި ފިކުރުގެ މީހުންނަށް ރަނގަޅަށް ވިސްނައި ދިނުމަށް އޭނާ ވަނީ ގޮވާލައްވައިފަ އެވެ.