14،000 ކަންބަޅި އުފުލި ކާގޯ ބޯޓެއް ފެތިއްޖެ

ބުކަރެސްޓް (ނޮވެމްބަރު 25) - ގާތްގަނޑަކަށް 14،000 ކަންބަޅިއާ އެކު ދަތުރުކުރި ބޮޑު ކާގޯ ބޯޓެއް ރުމޭނިއާގެ ބޭރުން ފެތިއްޖެ އެވެ.

ކްއީން ހިންޑް ކާގޯ ބޯޓު އަރިއަޅާލީ ބްލެކް ސީގެ މިޑިއާ ބަނދަރުން މިދިޔަ އާދިއްތަ ފުރި ފަހުންނެވެ. ބޯޓުގައި ތިބި 22 ފަޅުވެރިން ވަނީ ސަލާމަތްކޮށްފަ އެވެ. އެ އެންމެންނަކީ ވެސް ސީރިއާ މީހުންނެވެ. ބޯޓު ދަތުރު ކުރަން ހަމަޖެހިފައި ވަނީ ސައުދީ އަރަބިއާގެ ޖިއްދާއަށެވެ. މިޑިއާ ބަނދަރަށް ބޯޓު ދިޔައީ ލީބިއާގެ ވެރިރަށް ޓްރިޕޮލީންނެވެ.

ކަންބަޅިތައް ސަލާމަތް ކުރުމުގައި ވަނީ ރުމޭނިއާގެ ފުލުހުންނާއި ފަޔާފައިޓަރުން އަދި އެ ގައުމުގެ ކޯސްޓްގާޑުން އޮޕަރޭޝަނެއް ފަށައިފަ އެވެ.

"ވަރަށް މަދު ކަންބަޅިއެއް ސަލާމަތް ކުރެވުނީ. އެއީ ސަރަހައްދުގެ ފެންމަތީގައި ތިބި ކަންބަޅިތަކެއް،" ރުމޭނިއާގެ އިރުދެކުނުގެ ކަޅު ކަނޑުގެ އައްސޭރީގައި އޮންނަ ސިޓީއެއް ކަމަށްވާ ކޮންސްޓަންޓާގެ ތަރުޖަމާން އަނާ-މާރިއާ ސްޓޮއިކާ ވިދާޅުވި އެވެ.

އޭނާ ވިދާޅުވީ ކަނޑަށް ވެއްޓުނު އެއް ފަޅުވެރިއަކު ހޮސްޕިޓަލުގައި އެޑްމިޓް ކުރަން ޖެހުނު ކަމަށެވެ.

ކާގޯ ބޯޓު އަރިއަޅާލުމަށް ފަހު ފެތެން މެދުވެރި ސަބަބެއް ނޭނގެ އެވެ. ކަމާބެހޭ ފަރާތްތަކުން ބުނެފައި ވަނީ ކަންބަޅިތަކާއި ބޯޓު ސަލާމަތްކޮށް ނިމުމުން ތަހުގީގު ފަށާނެ ކަމަށެވެ.

މެރިން ޓްރެފިކް ވެބްސައިޓުގައިވާ ގޮތުން 1980 ވަނަ އަހަރު ބަނދެފައިވާ 85 މީޓަރު (278 ފޫޓު) ގެ ބޯޓުން 3،785 ޓަނުގެ ކާގޯ އުފުލެ އެވެ.