ލިއޮނާޑޯގެ "ބިފޯ ދަ ފްލަޑް" ވައިޓް ހައުސް އަށް

27 ސެޕްޓެމްބަރ 2016

މޫސުމަށް އަންނަ ބަދަލުތަކުގެ މައްޗަށް ބިނާކޮށް ހޮލީވުޑްގެ މަޝްހޫރު އެކްޓަރު ލިއޮނާޑޯ ޑި ކެޕްރިއޯ ހަދާފައިވާ ޑޮކިއުމަންޓްރީ ފިލްމް "ބިފޯ ދަ ފްލަޑް" އެމެރިކާގެ ރިޔާސީ ގަނޑުވަރު ވައިޓް ހައުސްގައި ދައްކާލައި، މޫސުމަށް އަންނަ ބަދަލުތަކާ ބެހޭ ގޮތުން ރައީސް ބަރަކް އޮބާމާ އާއި ލިއޮނާޑޯ މަޝްވަރާ ކުރަން ހަމަޖެހިއްޖެ އެވެ.

އަހުމަދު އަދްޝަން

ވައިޓް ހައުސް އިން އިންތިޒާމްކޮށްގެން ބާއްވާ ސައުތު ބައި ސައުތު ލޯން: އަ ވައިޓް ހައުސް ފެސްޓިވަލް އޮފް އައިޑިއާސް، އާޓްސް އެންޑް އެކްޝަން ބާއްވަން ހަމަޖެހިފައި ވަނީ އަންނަ މަހުގެ ތިނެއްގަ އެވެ.

މި ހަފުލާގައި ކްލައިމެޓް ސައިސްޓިސްޓް ޑރ. ކެތަރީން ހޭހޯ ވެސް ބައިވެރިވަޑައިގަންނަވާނެ އެވެ.

ދުނިޔޭގެ ފަސް ބައްރަށް ލިއޮނާޑޯ ދަތުރުކޮށް، މޫސުމަށް އަންނަ ބަދަލުތައް ހޯދަން ކުރާ މަސައްކަތް ދައްކުވައިދޭ "ބިފޯ ދަ ފްލަޑް" އަންނަ މަހު ބާއްވާ 60 ވަނަ ލަންޑަން ފިލްމް ފެސްޓިވަލްގައި ވެސް ދައްކާ ގޮތަށް ވަނީ ހަމަޖެހިފަ އެވެ.

Exciting news: @POTUS will be joined by @LeoDiCaprio for a conversation on combating climate change at #SXSL: https://t.co/eMPiKavm8y pic.twitter.com/o7Gp0cNhBV
— The White House (@WhiteHouse) September 25, 2016

ވައިޓް ހައުސްގެ ޓްވީޓް

އަންނަ މަހުގެ 5-16 އަށް ބާއްވާ އެ ފެސްޓިވަލްގައި ޑޮކިއުމަންޓްރީ ދައްކާލާނީ އޮކްޓޯބަރު މަހުގެ 15 ގަ އެވެ.

"ބިފޯ ދަ ފްލަޑް" ލިޔެފައި ވަނީ މާކް މޮންރޯ އެވެ. މި ޑޮކިއުމަންޓްރީ ޑައިރެކްޓްކޮށްފައި ވަނީ ތިމާވެއްޓަށް މަސައްކްތް ކުރާ އެކްޓިވިސްޓް ފިޝާ ސްޓީވެންސެވެ.

މި އަހަރުގެ ޓޮރޮންޓޯ އިންޓަނެޝަނަލް ފިލްމް ފެސްޓިވަލް (ޓީއައިއެފްއެފް) ގައި ވެސް "ބިފޯ ދަ ފްލަޑް" ދެއްކި އެވެ.

މި ފިލްމުގެ ބޭނުމަކީ މޫސުމަށް އަންނަ ބަދަލު ދެނެގަނެ، ހައްލުތައް ހޯދައި އެކަމަށް ބައިނަލްއަގްވާމީ ފެންވަރެއްގައި ހޭލުންތެރިކަން އުފެއްދުމެވެ.

Comments