ހަލީމްގެ ފައެއް ޖެހުމަށް އެހީ ހޯދަނީ

ސްނޯކްލިން އަށް ގޮސް އުޅެނިކޮށް ޑިންގީއެއްގެ ބުރަފަތީގައި ޖެހި ފައި ބުރިވި ޒުވާނާގެ އާޓިފިޝަލް ފައެއް ޖެހުމަށް އޭނާގެ އާއިލާއިން އެހީ ހޯދަން ފަށައިފި އެވެ.

ރ. އަތޮޅު ފަޅު ރަށެއްގެ ބޭރުގައި މިދިޔަ ބުދަދުވަހު ހިނގި ހާދިސާގައި އެ އަތޮޅު އިނގުރައިދޫ އަބްދުﷲ ހަލީމް، 27، ގެ ވާތު ފައިގެ ކުޑަހުޅުގެ މަތިން ވަރަށް ބޮޑުބައެއް ބުރިވި އެވެ. އެބައި ގުޅުވެން ނެތުމުން އޭޑީކޭ ހޮސްޕިޓަލުން ވަނީ ކަކުލުހުޅު ތިރިން ފައި ބުރިކޮށްލައިފަ އެވެ.

އާއިލާ އިން ބުނިގޮތުގައި އޭނާގެ ހާލު މިހާރު އަންނަނީ ރަނގަޅުވަމުންނެވެ.

އޭނާގެ ބޭބެ، އިބްރާހިމް ޝިހާބް މިއަދު ބުނިގޮތުގައި އާޓިފިޝަލް ފައެއް ޖަހައިގެން ހަލީމަށް ހިނގިދާނެ ކަމަށް ޑޮކްޓަރުން ބުނެ އެވެ. އެ އުއްމީދާ އެކު އާއިލާ އިން މަސައްކަތް ކުރަނީ ފައެއް ޖެހުމަށް ރާއްޖެ އިން ބޭރަށް ދާށެވެ.

ޝިހާބް ބުނީ ފައެއް ޖަހައިދޭ އަގު އިންޑިއާގެ ގަންގާ ހޮސްޕިޓަލުން ބަލަމުން އަންނަ ކަމަށާއި ސީދާ ޚަރަދުވާނެ ވަރެއް އަދި ނޭނގޭ ކަމަށެވެ.

"އެހާ ބޮޑު ޚަރަދެއް ކުރަން ޖެހޭތީ އަޅުގަނޑުމެން އެދެނީ އާންމުންގެ ދީލަތި އެހީއަކަށް،" އިބްރާހިމް ބުންޏެވެ.

އެހީތެރިވުމަށް ބޭނުންވާ މީހުން 101 179802 7701 ނަމްބަރު ބީއެމްއެލް އެކަންޓުން ރުފިޔާ ޓްރާންސްފާ ކުރުމަށް އާއިލާއިން އެދެ އެވެ.

ރ. ނެއޮ ކިޔާ ފަޅު ރަށެއްގެ ބޭރުގައި ފީނަން އޮއްވައި ހަލީމް ގައިގައި ޖެހުނީ އެ އަތޮޅުގައި ހަދާ ރިސޯޓެއް ކަމަށްވާ ކޮއްޓަފަރުގައި ދުއްވާ ޑިންގީއެއްގެ ބުރަފަތިންނެވެ.

ބުރިވި ފައިގެ އިތުރުން ބުރަފަތިން ޖެހި ޒަހަމްވެފައި ހުރި ތަންތަން އެހާ ސީރިއަސް ނޫން ކަމަށް އާއިލާ އިން ބުންޏެވެ. މަސްގަނޑު ކަފައިގެން ދިއުން ފިޔަވައި އެހާ ބޮޑު ގެއްލުމެއް ލިބިފައިނުވާތީ އެ ހިސާބުތައް ވަނީ ފަހައިފަ އެވެ.

ހަލީމަކީ އިނގުރައިދޫ ފިހާރައެއްގައި މަސައްކަތް ކުރާ މީހެކެވެ. އަދި ކައިވެންޏެއް ނުކުރެ އެވެ. ފީނަށް ދިއުމަކީ ފޫހިފިލުވުމަށް އޭނާ އާންމުކޮށް ކޮށް އުޅޭ ކަމެކެވެ.