ކެންސަރު ބަލީގެ ފަރުވާ އަށް އިންޑިއާގެ ވަރުގަދަ ސެންޓަރަކުން އެހީވަނީ

ރާއްޖޭގެ ކެންސަރު ބަލި މިހާރު އޮތް ހާލަތު ރަނގަޅުކުރުމަށް، ކެންސަރަށް ފަރުވާ ދިނުމަށް އިންޑިއާގެ އެންމެ ވަރުގަދަ ސެންޓަރާ އެކު ހެލްތު މިނިސްޓްރީން މިއަދު ސޮއިކޮށްފި އެވެ.

އެ ގައުމުގެ ރީޖަނަލް ކެންސާ ސެންޓާ (އާރުސީސީ) ގައި ބޭއްވި ރަސްމިއްޔާތުގައި ރާއްޖޭގެ ފަރާތުން ހެލްތު މިނިސްޓަރު އަބްދުﷲ އަމީން އަދި ކެރަލާ ސްޓޭޓްގެ ޗީފް މިނިސްޓަރު ޕިނަރާއި ވިޖަޔަން ވަނީ ސޮއިކުރައްވައިފަ އެވެ.

އެއްބަސްވުމާ ގުޅޭގޮތުން މިނިސްޓަރު "މިހާރު" އަށް ވިދާޅުވީ އާރުސީސީއާ ގުޅިގެން ރާއްޖޭގެ ޑޮކްޓަރުންނާއި ނަރުހުންނާއި ކެންސަރު ބަލީގެ ފަރުވާގެ ކަންކަމުގައި އުޅޭ މީހުންނަށް ތަމްރީނުދޭނެ ކަމަށެވެ. އަދި ކެންސަރު ސްކްރީނިން އިން ފެށިގެން ފަރުވާދިނުމާ ހަމައަށް، އެ މީހުންގެ ތަޖުރިބާ ހިއްސާކުރާނެ ކަމަށް ވިދާޅުވި އެވެ.

"މިކަމުގެ ސަބަބުން ރާއްޖޭގައި ކެންސަރަށް މިހާރު ދެވޭ ފަރުވާ އަށް ކުރިއެރުންތަކެއް ލިބޭނެ. މައިގަނޑު ގޮތެއްގައި ހުންނާނީ މުޅި ކެންސަރު ބަލީގެ ފަރުވާގެ ކަންކަން ރަނގަޅުކުރުމަށް،" އަމީން ވިދާޅުވި އެވެ.

އާރުސީސީގެ އެހީތެރިކަން ސަރުކާރުގެ މައި ހޮސްޕިޓަލް، އައިޖީއެމްއެޗުގައި ހުންނަ ކެންސަރު ސެންޓަރާއި ރާއްޖޭގެ އެހެން ހޮސްޕިޓަލްތަކަށް ވެސް ލިބޭނެކަން ފާހަގަކުރެއްވި އެވެ.

ކެންސަރު ބައްޔަށް ރާއްޖޭގައި މި ވަގުތު މައިގަނޑު ގޮތެއްގައި ދެނީ ކީމޯ ތެރަޕީ އެވެ. ނަމަވެސް ރާއްޖޭގައި މިވަގުތު ހުންނެވި ހަމައެކަނި ކެންސާ ސާޖަން، ޑރ. މުހައްމަދު ޝިފާން ކެންސަރާ ގުޅޭ ބައެއް ސާޖަރީތައް ކުރައްވަ އެވެ.

މިނިސްޓަރު ވިދާޅުވި ރާއްޖޭގައި ކެންސަރު ބަލި އޮތް ހާލަތު ދެނެގަތުމަށް ދަފްތަރެއް ހަދާނެ ކަމަށެވެ. އަދި އިތުރު ފަރުވާތައް ތައާރަފުކޮށް، ރާއްޖެއިން ބޭރަށް ދާ މީހުންގެ އަދަދު މަދުކުރުމަކީ އެއް އަމާޒު ކަމަށް ވިދާޅުވި އެވެ.

އިންޑިއާގެ ކެންސަރު ސެންޓަރުން އެހީތެރިކަން ދެނީ، އިންޑިއާގެ ބޮޑުވަޒީރު ނަރެންދްރަ މޯދީ މިދިޔަ ޖޫން މަހު ކުރެއްވި ރަސްމީ ދަތުރުގައި ރާއްޖޭގެ ސިއްހީ ދާއިރާ އަށް އެހީތެރިކަން ދިނުމަށް ކުރި އެއްބަސްވުމުގެ ތެރެއިންނެވެ.