އޭޖީ ދެއްވި ލަފަޔަށް ފިޔަވަޅު އެޅުމުގެ ޕްރޮސެސް ފަށައިފިން: ސީޕީ

ނޫސްވެރިޔާ އަހްމަދު ރިލްވާން ވަގަށް ނަގާފައި ވަނިކޮށް، އޭނާ ރާއްޖޭން ބޭރަށް ފުރައިގެން ގޮސްފައި ކަމަށް ދައްކަން ޕާސްޕޯޓެއް ހައްދަން އުޅުނު ކަމަށް ބުނާ އިންޓެލިޖެންސްގެ ދެ ފުލުހުން ހައްޔަރުކޮށް އަދި އެހެން ބައެއް ފިޔަވަޅުތައް އަޅަން ބަންޑާރަ ނައިބު ދެއްވި ލަފަޔާ އެއްގޮތަށް، އެ ޕްރޮސެސް ފަށާފައިވާ ކަމަށް ކަމިޝަނާ އޮފް ޕޮލިސް މުހައްމަދު ހަމީދު މިރޭ ވިދާޅުވެއްޖެ އެވެ.

ރައްޔިތުންގެ މަޖިލީހުގެ ގައުމީ ސަލާމަތުގެ ކޮމިޓީއާ ބައްދަލުކުރެއްވުމަށް ފަހު ނޫސްވެރިއަކު ކުރި ސުވާލަކަށް ޖަވާބު ދެއްވަމުން ހަމީދު ވިދާޅުވީ "އެ ޕްރޮސެސް ފައްޓާފައިވާ" ކަމަށެވެ. އަދި އެއްވެސް މީހަކު ހައްޔަރު ނުކުރޭތޯ ސުވާލު ކުރުމުން ވެސް ވިދާޅުވީ "އެ ޕްރޮސެސް އަޅުގަނޑުމެން ފައްޓައިފިން" ކަމަށެވެ.

އިތުރު ތަފްސީލެއް ނުދެއްވަ އެވެ. ގައުމީ

ސަލާމަތުގެ ކޮމިޓީގައި ކުރި މަޝްވަރާތަކާ ބެހޭ ގޮތުން ފުލުހުންގެ މީޑިއާ ޑިޕާޓްމަންޓުން ފަހުން މައުލޫމާތު ދެއްވާނެ ކަމަށް ސީޕީ ވިދާޅުވި އެވެ.

އޭޖީ އޮފީހުން ވަނީ އެ ދެ ފުލުހުން ހައްޔަރު ކުރުމުގެ އަމުރަކަށް ކޯޓުގައި އެދުމަށް ފުލުހުންނަށް ލަފާ ދީފަ އެވެ. އެއީ ދެ ފުލުހުން މުޖުތަމައުއަށް ދޫވެފައި ތިއްބާ އެ ތަހުގީގު ކުރަން ހުރަސް އެޅޭނެތީ އެވެ.

އޭޖީން ފުލުހުންނަށް ފޮނުވި ސިޓީގައި، ގޮތް ނޭނގޭ މަރުތަކާއި ގެއްލުވާލާފައިވާ މީހުންގެ މައްސަލަ ބަލާ ކޮމިޝަންގެ ތަހުގީގުން، ދެ މީހަކު އިސްވެ ތިބެ، ގޭންގް ބައެއް މެދުވެރިކޮށް ދެ މީހަކު ކަނޑު ފައްތަން އުޅޭ ކަމުގެ މައުލޫމާތު ފުލުހުންގެ އިންޓެލިޖެންސަށް ލިބި އެ ކަމަށް ފިޔަވަޅު ނޭޅި ކަމަށް ބުނާތީ އެކަން ވެސް ތަހުގީގުކުރަން އެދިފައިވެ އެވެ. އަދި އެކަމުގައި ޝާމިލްވި ފުލުހުން މަސައްކަތުން އެކަހެރި ކުރުމަށް ވެސް ލަފާ ދީފައިވެ އެވެ.

ރިލްވާން ވަގަށް ނަގައި މަރާލުމަށް ފަހު ކަނޑުފައްތާފައިވާ ކަމަށް، ކޮމިޝަންގެ ތަހުގީގަށް އެނގިފައި ވާއިރު ރިލްވާންގެ ތަހުގީގަށް ހުރަސް އަޅައި، ރިލްވާން ރާއްޖޭން ބޭރަށް ގޮސްފައިވާކަން ދައްކަން ޕާސްޕޯޓެއް ހަދަން ދެ ފުލުހުން ދިޔައީ އޭރުގެ އިމިގްރޭޝަން ކޮންޓްރޯލާ އަދި މިހާރު ހައި ކޯޓުގެ ފަނޑިޔާރު ހަސަން އަލީގެ އަރިހަށް ކަމަށް ކޮމިޝަނުން ވަނީ ބުނެފަ އެވެ. ރިޕޯޓުގައިވާ ގޮތުން ހަސަން ފުލުހުންނަށް ދިން ބަޔާނުގައި، ފުލުހުންގެ އިންޓެލިޖެންސް ޑިޕާޓްމަންޓްގައި އުޅޭ ދެ މުވައްޒަފަކު ބައްދަލުކޮށް ރިލްވާންގެ ޕާސްޕޯޓެއް ހެދުމާ ގުޅޭ މަޝްވަރާތައް ކުރި އެވެ. ކޮމިޝަނުން ބުނީ ދެ ފުލުހަކު ބައްދަލުކޮށް ރިލްވާންގެ ވާހަކަ ނިމެން އެބަޖެހޭ ކަމަށާއި އެމީހުން އޭނާގެ ޕާސްޕޯޓް ހައްދަން ބޭނުންވަނީ ރިލްވާން ރާއްޖެ އިން ބޭރަށް ދިޔަކަން ދެއްކުމަށް ކަމަށް ބުންޏެވެ.

އެގޮތުން އެންޑީޓީވީ ފަދަ ޗެނަލަކުން، ރިލްވާން މަރުވެފައިވާ ކަމުގެ ޚަބަރެއް އެމީހުންނަށް ފޮނުވިދާނެ ކަމަށާއި އެ ދެ މީހުން މި އުޅެނީ "ވެރިޔާ" ވިދާޅުވެގެން ކަމަށް ބުނެފައިވާ ކަމަށް ވެސް ކޮމިޝަނުން ބުންޏެވެ. ނަމަވެސް "ވެރިޔާ" އަކީ ކާކު ކަމެއް ބުނެފައެއް ނުވެ އެވެ.

މި މައްސަލާގައި ފަނޑިޔާރު ހަސަންއާ މެދު ވެސް ފިޔަވަޅު އަޅަންޖެހޭ ކަމަށް ރައްޔިތުންގެ މަޖިލީހުގެ ބައެއް މެންބަރުން ވަނީ ވިދާޅުވެފަ އެވެ. އަދި ހަސަންގެ މައްސަލައެއް، ޖުޑީޝަލް ސާވިސް ކޮމިޝަން (ޖޭއެސްސީ) އިން ބަލަން ވެސް ވަނީ ފަށައިފަ އެވެ.