އަމްޕަޔަރާ ބެހޭގޮތުން ވާހަކައެއް ނުދައްކާނަން: ސެރީނާ

ނިއު ޔޯކް، ޔުނައިޓެޑް ސްޓޭޓްސް (އޮގަސްޓް 27) - މިދިޔަ އަހަރުގެ ޔޫއެސް އޯޕަން ފައިނަލުގައި މަޝްހޫރު ޓެނިސް ކުޅުންތެރިޔާ ސެރީނާ ވިލިއަމްސްއާ މައްސަލަ ޖެހުނު އަމްޕަޔަރު ކާލޮސް ރާމޯސްއާ ބެހޭގޮތުން ވާހަކަ ދައްކަން ސެރީނާ ދެކޮޅުހަދައިފި އެވެ.

މި ފަހަރުގެ ޔޫއެސް އޯޕަން ފުރަތަމަ ބުރުގައި އިއްޔެ ކުޅުނު މެޗުން ސެރީނާ ވަނީ އޭނާގެ ޒަމާންވީ ވާދަވެރިޔާ ރަޝިއާގެ މާރިއާ ޝަރަފޯވާ އަތުން 6-1 6-1 އިން މޮޅުވެފަ އެވެ. އަނިޔާގެ ސަބަބުން މި އަހަރު ސެރީނާ ވަނީ ފަސް މުބާރާތެއްގެ ތެރެއިން މެޗުތަކެއް ދޫކޮށްލައިފަ އެވެ. އެހެންވެ މި ފަހަރުގެ ޔޫއެސް އޯޕަންގައި ސެރީނާ ނުފެނިދާނެ ކަމަށް މީޑިއާގައި ވާހަކަ ދެކެނުވުނު ނަމަވެސް އޭނާ ވަނީ މުބާރާތަށް ވަގުތު އޮއްވައި ފިޓްވެފަ އެވެ.

އުމުރުން 37 އަހަރުގެ ސެރީނާ މި ފަހަރުގެ ޔޫއެސް އޯޕަން ފުރަތަމަ މެޗުން ޝަރަޕޯވާ އަތުން މޮޅުވުމަކީ ކެރިއަރުގައި އޭނާގެ މައްޗަށް ހޯދި 20 ވަނަ މޮޅެވެ.

މިދިޔަ އަހަރުގެ ޔޫއެސް އޯޕަން ފައިނަލުން ސެރީނާ ބަލިވީ އެ މެޗުގެ އަމްޕަޔަރު ރާމޯސްއާ ގިނަ މައްސަލަތަކެއް ޖެހި މެޗުގެ ސަމާލުކަން ގެއްލުމުންނެވެ. ޖަޕާނުގެ ނައޯމީ އޮސާކާއާ ދެކޮޅަށް ކުޅުނު މެޗުގައި މައްސަލަ ޖެހުނީ ދެ ވަނަ ސެޓުގައި ސެރީނާގެ ކޯޗު ޕެޓްރިކް މޫރަޓޮގްލޫ މެޗުގެ މެދުތެރެއިން އިޝާރާތުން ސެރީނާ އަށް ކިޔައިދޭ މަންޒަރު ފެނުމުން އަމްޕަޔަރު ރާމޯސް އެކަމާ ފިޔަވަޅު އެޅުމުންނެވެ. އެކަމާ ހިތްހަމަނުޖެހިގެން ސެރީނާ ވަނީ އޭނާ މަކަރު ނަހަދާނެ ކަމަށް ބުނެ، އޭނާ ކުޅެން ގެންގުޅުނު ރެކެޓް ބިންމައްޗަށް އެއްލާލައިފަ އެވެ. އަދި ރާމޯސް އަކީ ދޮގު ހަދާ މީހެއް ކަމަށް އެ ފަހަރު ސެރީނާ ވަނީ ބުނެފަ އެވެ.

އެ މެޗުގައި ސެރީނާގެ ހަރަކާތްތައް ހުރި ގޮތުން އެމެރިކާގެ ޓެނިސް އެސޯސިއޭޝަނުން ވަނީ ސެރީނާ 13،100 ޑޮލަރުން ޖޫރިމަނާކޮށްފަ އެވެ. އަދި ރާމޯސް ވެސް އެކަން ހައްލުކުރުމަށް އަމަލުކުރިގޮތް ރަނގަޅުނޫން ކަމަށް ބުނެ، އޭނާ އަށް ވެސް ފިޔަވަޅު އެޅި އެވެ. މި މައްސަލައިގައި ރާމޯސް އަށް އަދަބު ދިނުމަށް ފަހު މި އަހަރު ސެރީނާ އާއި އޭނާގެ ދައްތަ ވީނަސް ވިލިއަމްސް ކުޅޭ އެއްވެސް މެޗެއްގައި ރާމޯސް އަމްޕަޔަރަކަށް ހަމަނުޖައްސަން ޓެނިސް ފެޑެރޭޝަނުން ނިންމި އެވެ.

އިއްޔެގެ މެޗަށް ފަހު ނޫސްވެރިންގެ އެންމެ ގިނަ ސުވާލުތައް ސެރީނާއާ އަމާޒުވީ އަމްޕަޔަރު ރާމޯސްއާ ބެހޭގޮތުންނެވެ. ސެރީނާ ބުނީ އަމްޕަޔަރު ރާމޯސް ކިޔާ މީހަކު ނުދަންނަ ކަމަށާއި އެކަމަކު އޭނާ މި މުބާރާތަށް އައީ "ކުރިން ގެއްލިފައި އޮތް އެއްޗެއް އަލުން ހޯދަން" ކަމަށެވެ.

ސެރީނާ ވަނީ މިހާތަނަށް 23 ގްރޭންޑް ސްލޭމް މުބާރާތް ކާމިޔާބުކޮށްފަ އެވެ. އޭނާ މިހާރު އަމާޒު ހިފާފައިވަނީ 24 ގްރޭންޑް ސްލޭމް ހަމަކޮށް އޮސްޓްރޭލިއާގެ ކުރީގެ ކުޅުންތެރިޔާ މަގަރެޓް ކޯޓް ހަދާފައިވާ ރެކޯޑަކާ ހަމަކުރުމަށެވެ.