ލެޖެންޑަރީ ޓެނިސް ތަރި ސެރީނާ ވިލިއަމްސް ކުޅުން ހުއްޓާލައިފި

ނިއު ޔޯކް (ސެޕްޓެމްބަރު 3) - މިހާރު ކުރިއަށްދާ ޔޫއެސް އޯޕަން ގްރޭންޑް ސްލޭމް ޓެނިސް މުބާރާތުގެ ތިންވަނަ ބުރުގައި އަޖްލާ ޓޮމްލްޖަނޮވިޗް އަތުން ތިން ސެޓުން ބަލިވުމާ އެކު، ލެޖެންޑަރީ ޓެނިސް ތަރި އެމެރިކާގެ ސެރީނާ ވިލިއަމްސް، 40، އޭނާގެ 27 އަހަރުވީ ޓެނިސް ކެރިއަރު ނިންމާލައިފި އެވެ.

ސެރީނާއާ ދެކޮޅަށް ކުޅުނު އޮސްޓްރޭލިއާގެ އަޖްލާ ސެޓްތައް ގެންދިޔައީ 7-5، 6-7 (4-7) އަދި 6-1 އިންނެވެ. މިއީ އަޖްލާ، ގްރޭންޑް ސްލޭމް މުބާރާތެއްގެ ހަތަރުވަނަ ބުރަށް ދަތުރުކުރި ފުރަތަމަ ފަހަރެވެ.

މި މުބާރާތަށް ފަހު ކުޅުން ހުއްޓާލާނެ ކަން މީގެ ކުރިން ވެސް ސެރީނާ އިއުލާން ކޮށްފައި ވާއިރު، އޭނާ އަކީ ހަ ފަހަރު ޔޫއެސް އޯޕަން ކާމިޔާބު ކޮށްފައިވާ ކުޅުންތެރިއެކެވެ. ޖުމްލަ 23 ގްރޭންޑް ސްލޭމް މުބާރާތް ކާމިޔާބު ކޮށްފައިވާ ސެރީނާ އަށް ވުރެ ކުރީގައި އުޅެނީ، 24 ތަށި ހޯދި ކުރީގެ އަންހެން ޓެނިސް ލެޖެންޑް އޮސްޓްރޭލިއާގެ މާގަރެޓް ކޯޓް އެވެ.

"އަހަރެން މަސައްކަތް ކުރިން، އެކަމަކު އަޖްލާ ކުޅުނީ ތަންކޮޅެއް މޮޅަށް. އަހަރެންގެ ބައްޕަ އާއި މަންމަ އަށް ޝުކުރު އަދާކުރަން ބޭނުންވޭ މި ފުރުސަތުގައި. އަދި މި ދިގު ކެރިއަރުގައި އަހަންނަށް ހިތްވަރުދީ އެކުގައި ތިބި އެންމެންނަށް ވެސް ޝުކުރު އަދާކުރަން ބޭނުންވޭ. އެކަމަކު ހުރިހާ ކަމެއް ފެށުނީ އަހަރެންގެ މައިންބަފައިންނާ ހަމައިން، އަހަރެން އެމީހުންނަށްޓަކައި ވަރަށް ބޮޑަށް ޝުކުރުވެރިވަން، މިއީ ހަމަ އުފާވެރިކަމުގެ ކަރުނަ،" ކެރިއަރުގެ ފަހު މެޗަށް ފަހު ސެރީނާ ބުންޏެވެ.

މީގެ އިތުރުން އޭނާ ވަނީ އެއްބަނޑު އެއްބަފާ ދައްތަ، ވީނަސް ވިލިއަމްސް، 42، އަށް ވެސް ޝުކުރު އަދާކޮށްފަ އެވެ.

"ވީނަސް ނެތް ނަމަ އަހަންނަނީ ސެރީނާއަކަށް ނުވީސް. ވީނަސް އަށް ވަރަށް ބޮޑަށް ޝުކުރިއްޔާ. ސެރީނާ ވިލިއަމްސް ވުޖޫދުވީ އޭނާގެ ސަބަބުން،" ދައްތައަށް ޝުކުރު އަދާކުރަމުން އޭނާ ބުންޏެވެ.

"މިއީ ވަރަށް ފަން ރައިޑެއް، މި ކެރިއަރަކީ އަހަރެންގެ ހަޔާތުގެ އެންމެ އުފާވެރި ދަތުރު. އަހަރެންގެ ކެރިއަރުގައި ސަޕޯޓު ކޮށްދިން އެންމެންނަށް އަހަރެން ވަރަށް ބޮޑަށް ޝުކުރުވެރިވަން. އެ ސަޕޯޓާ އެކު އަހަރެންނަށް މި ހިސާބަށް އާދެވުނީ."

ރިޓަޔާމަންޓުން އެނބުރި އައިސް އަލުން ކޯޓަށް ނުކުންނާނަންތޯ ސެރީނާ ގާތު އެހުމުން ބުނީ، އަލުން ކުޅުންތެރިއެއް ގޮތުގައި ފެނުމުގެ ފުރުސަތު ކުޑަ ކަމަށާއި ނަމަވެސް ކުރިޔަށް އޮތް ތަނުގައި ވާނެ ގޮތެއް ނޭނގޭ ކަމަށެވެ.

"އަހަންނަނށް ހިޔެއް ނުވޭ، އެކަމަކު ނޭނގޭ ފަހުން ވާނެ ގޮތެއް ނޭނގޭ. ބުނާކަށް ނޭނގެ."

އުމުރުން 14 އަހަރުގައި 1995 ގައި ސީނިއާ ޕްރޮފެޝަނަލް ޓެނިސް ކެރިއަރު ފެށި ސެރީނާ އަކީ ދުނިޔޭގެ އެންމެ މޮޅު ޓެނިސް ކުޅުންތެރިންގެ ތެރޭގައި ފާހަގ ކޮށްލެވޭ ނަމެކެވެ. އެންމެ ފުރަތަމަ 1998 ގައި ގްރޭންޑް ސްލޭމް މުބާރާތްތަކުގައި ވާދަކުރަން ފެށި އިރު، އެންމެ ފުރަތަމަ ކާމިޔާބުކުރީ 1999 ވަނަ އަހަރުގެ ޔޫއެސް އޯޕަން ސިންގަލްސް އެވެ.

ޖުމްލަ 23 ސިންގަލްސް ގްރޭންޑް ސްލޭމް ޓައިޓަލް ނެގުމުގެ އިތުރަށް އޭނާ ވަނީ 14 ފަހަރު ޑަބަލްސް މުބާރާތް ކާމިޔާބުކޮށްފަ އެވެ. އަދި ދެ ފަހަރު މިކްސްޑް ޑަބަލްސް ކާމިޔާބު ކުރުމާ އެކު މުޅިއަކު 39 ގްރޭންޑް ސްލޭމް މުބާރާތް އޭނާ ކާމިޔާބު ކޮށްފައިވެ އެވެ.

މީގެ އިތުރުން ސެރީނާ ވަނީ ހަތަރު ފަހަރު އޮލިމްޕިކް ރަން މެޑަލް ވެސް ހޯދައިފަ އެވެ. ލަންޑަނުގައި 2012 ވަނަ އަހަރު ސިންގަލްސް ކާމިޔާބުކުރުމާ އެކު އޭނާ ވަނީ، ދައްތަ ވީނަސްއާ އެކު 2012 އާއި 2008 އަދި 2000 ވަނަ އަހަރު ޑަބަލްސް އިވެންޓް ކާމިޔާބުކޮށްފަ އެވެ.

ހަމަ އެއާ އެކު އޭނާ އަކީ ޖެހިޖެހިގެން ހަތަރު ގްރޭންޑް ސްލޭމް މުބާރާޓް ނެގި ހަމައެކަނި އަންހެން ޓެނިސް ކުޅުންތެރިޔާ އެވެ. އޭނާ ވަނީ ދެ ފަހަރު އެ ރެކޯޑް ހާސިލް ކޮށްފަ އެވެ. ސެރީނާ އެންމެ ފަހުން ކާމިޔާބު ކުރި ގްރޭންޑް ސްލޭމް މުބާރާތަކީ، 2017 ވަނަ އަހަރުގެ އޮސްޓްރޭލިއަން އޯޕަން މުބާރާތެވެ. އުމުރުން 36 އަހަރުގައި ހޯދި އެ ކާމިޔާބީއާ އެކު އޭނާ ވެފައި ވަނީ ޓެނިހުގެ އޯޕަން އީރާގައި ގްރޭންޑް ސްލޭމް މުބާރާތެއް ކާމިޔާބުކުރި އެންމެ ދޮށީ އަންހެން ކުޅުންތެރިޔާއަށެވެ. އޭނާ ވަނީ އުމުރުން 30 އަހަރު ފުރުނު ފަހުން 10 ގްރޭންޑް ސްލޭމް ސިންގަލްސް ކާމިޔާބު ކޮށްފަ އެވެ.

ސެރީނާގެ ޓެނިސް ކެރިއަރުގައި އޭނާއަށް ވަނީ ފައިސާގެ އިނާމުގެ ގޮތުގައި ޖުމްލަ 94.6 މިލިއަން ޑޮލަރު ލިބިފަ އެވެ. މިއީ ވެސް އަންހެން ކުޅުންތެރިއަކަށް ރެކޯޑެކެވެ. އޭނާއަށް ވުރެ މަތިން ފައިސާގެ އިނާމް ހޯދާފައި ވަނީ ފިރިހެން ލެޖެންޑަރީ ކުޅުންތެރިން ކަމަށްވާ ނޯވަކް ޖޮކޮވިޗާއި ރޮޖާ ފެޑެރާ އަދި ރަފައެލް ނަޑާލް އެވެ.