އެޗްޑީއެފްސީން ސުކޫކް ވިއްކަން ނިންމައިފި

ހައުސިން ޑިވެލޮޕްމެންޓް ފައިނޭންސް ކޯޕަރޭޝަން (އެޗްޑީއެފްސީ) އިން އަނެއްކާ ވެސް ސުކޫކް ވިއްކަން ނިންމައިފި އެވެ.

މިއީ އެޗްޑީއެފްސީން ސުކޫކް ވިއްކާ ތިން ވަނަ ފަހަރެވެ. އެ ކުންފުނީގެ އެސިސްޓެންޓް ޖެނެރަލް މެނޭޖަރު މުހައްމަދު ޝަފީގު ވިދާޅުވީ، ސުކޫކު ވިއްކަން ނިންމީ އެ ކުންފުނިން ގެދޮރު އިމާރާތް ކުރުމާއި ގެދޮރު ގަތުމަށާއި ގެދޮރު މަރާމާތު ކުރުމަށް ލޯނު ދޫކުރާ އިރު އެކަމަށް ބޭނުންވާ ފައިނޭންސް ހޯދުމަށް ކަމަށެވެ.

"ސުކޫކަށް އަންނަ މަގްބޫލުކަން އަންނަނީ އިތުރުވަމުން. ޕަބްލިކަށް ސުކޫކާ ގުޅޭ މައުލޫމާތު އެނގި މިކަމުން ލިބޭ ފައިދާ ވެސް ދަނީ އެނގެމުން،" އޭނާ ވިދާޅުވި އެވެ.

ޝަފީގު ވިދާޅުވީ، އިސްލާމިކް ފައިނޭންސް ރާއްޖޭގައި ވަރަށް ބާރު ސްޕީޑުގައި ފުޅާވަމުން އަންނަ ކަމަށާއި މިއީ އާންމުންނަށް އިންވެސްޓް ކުރުމަށް ލިބޭ ރަނގަޅު ފުރުސަތެއް ކަމަށެވެ.

އެޗްޑީއެފްސީގެ އިސްލާމިކް ފައިނޭންސްގެ މެނޭޖަރު އަޒްމީން ރަޝީދު ވިދާޅުވީ، އިސްލާމިކް ފައިނޭންސްގެ ތެރެއިން ފައިސާ ބޭނުންވާ މީހުންނަށް ސުކޫކު މެދުވެރިކޮށް ފައިސާ ފޯރުކޮށްދެވޭނެ ކަމަށެވެ.

"ސުކޫކު އިއުލާނު މި ކުރަނީ ހަލާލު ގޮތެއްގައި ފައިސާ ހޯދާ، އެ ފައިސާ އިން ގެދޮރު ގަތުމާއި މަރާމާތު ކުރުމަށް ބޭނުންވާ ފަރާތްތަކަށް ފޯރުކޮށްދިނުމަށް،" އޭނާ ވިދާޅުވި އެވެ.

އެ ކުންފުނިން ވިއްކާ ސުކޫކެއްގެ އަގަކީ 1،000 ރުފިޔާ އެވެ. ޖުމްލަ ދެ ލައްކަ ސުކޫކު ވިއްކުމަށް ނިންމާފައިވެ އެވެ. އެހެންކަމުން ސުކޫކް ވިއްކައިގެން އެ ކުންފުންޏަށް 200 މިލިއަން ރުފިޔާ ލިބޭނެ އެވެ.

ސުކޫކް ވިއްކަން އަންނަ މަހުގެ 22 ވަނަ ދުވަހު ހުޅުވާލާ އިރު ނޮވެމްބަރު 12 ގެ ނިޔަލަށް މިކަން ކުރިއަށްދާނެ އެވެ. ސުކޫކު ދޫކުރަނީ 10 އަހަރުގެ މުއްދަތަކަށެވެ. ކޮންމެ ހަ މަހަކުން ސުކޫކް ގަންނަ މީހާ އަށް ފައިދާ ލިބޭނެ އެވެ. އެގޮތުން ކުންފުނީގެ ފައިދާގެ 65 ޕަސެންޓް ސްކޫކު ހޯލްޑަރުންނަށް ދިނުމަށް ވަނީ ނިންމައިފަ އެވެ.

އެ ކުންފުނިން އެންމެ ފުރަތަމަ ސުކޫކް ވިއްކީ 2013 ވަނަ އަހަރު އެވެ. އެ ފަހަރު 467 ފަރާތަކަށް 45،132 ސުކޫކް ވިއްކާފައިވެ އެވެ. އަދި 2017 ވަނަ އަހަރު 207 ފަރާތަކަށް 89،036 ސުކޫކް ވިއްކާފައިވެ އެވެ.

އެކުންފުންޏަށް މިދިޔަ އަހަރު ސާފު ފައިދާގެ ގޮތުގައި 100 މިލިއަން ރުފިޔާ ލިބިފައިވެ އެވެ. އެޗްޑީއެފްސީން އިސްލާމިކް ފައިނޭންސް ހިދުމަތް ދޭން ފަށާފައިވަނީ 2012 ވަނަ އަހަރު އެވެ. އެ ކުންފުނި އުފެދިފައި ވަނީ 2004 ވަނަ އަހަރު އެވެ.