މުލީ ބިން ހިއްކުމުގެ މަސައްކަތް ހުއްޓިފައި އޮންނަތާ ދެ މަސް ފަހުން އަލުން ފަށައިފި

މ. މުލީ ބިން ހިއްކުމުގެ މަސައްކަތް ހުއްޓިފައި އޮންނަތާ ދެ މަސް ފަހުން އަލުން ފަށައިފި އެވެ.

މުލީ ބިން ހިއްކުމުގެ މަޝްރޫއުގެ ދަށުން އެ ރަށުގެ 40 ހެކްޓަރުގެ ބިން ހިއްކަން ސަރުކާރުން ހަވާލުކުރީ 99 މިލިއަން ރުފިޔާއަށް އެމްޓީސީސީއާ އެވެ. އެކަމަކު އެ ރަށުގެ ބިން ހިއްކުން ވަނީ ސަބް ކޮންޓްރެކްޓް އުސޫލުން މެލޭޝިއާގެ ކުންފުންޏެއް ކަމަށްވާ އެވޯޝަންއާ ހަވާލުކޮށްފަ އެވެ.

މުލީ ކައުންސިލްގެ ނައިބު ރައީސް އަހުމަދު ޝާތިރު މިއަދު ވިދާޅުވީ ޑްރެޖަރެއް ގެނެސް އަލުން ބިން ހިއްކަން ފެށިތާ މިހާރު ދެތިން ދުވަސް ވެދާނެ ކަމަށެވެ. އާ ޑްރެޖަރެއް ގެންނަން ޖެހުނީ ފުރަތަަމަ ބޭނުންކުރި ޑްރެޖަރުން ފުނުން ވެލި ނުނެގޭތީ ކަމަށް އޭނާ ވިދާޅުވި އެވެ.

މުލީ ބިން ހިއްކުމަށް ވެލި ނަގަނީ އެ ރަށާއި މާޅުވެލި ކިޔާ ފަޅު ރަށާ ދޭތެރޭ އޮންނަ ފަޅު ތެރެއިންނެވެ.

"އެމީހުން ބުނާ ގޮތުން އަންނަ ނޮވެމްބަރު މަހު މަސައްކަތް އެއްކޮށް ނިންމާލެވޭނެ،" ޝާތިރު ވިދާޅުވި އެވެ.

ޝާތިރު ވިދާޅުވީ ބިން ހިއްކުމުގެ މަސައްކަތް ހުއްޓުމުގެ ކުރިން 23 ހެކްޓަރުގެ ބިން ހިއްކާފައިވާ ކަމަށެވެ. އެހެންކަމުން ބާކީ އަދި 17 ހެކްޓަރުގެ ބިން ހިއްކަން ޖެހެ އެވެ.

"އާ ޑްރެޖަރާއެކު ބިން ހިއްކުން ކުރިއަށްވުރެ ބާރަށް ކުރިއަށްދާނެ ކަމަށް ބެލެވެނީ،" ޝާތިރު ވިދާޅުވި އެވެ.

މުލީގައި ބިމުގެ ދަތިކަން ކުރިމަތިވެ ރަށަށް އިތުރު ބިން ބޭނުންވާތީ، ސަރުކާރުން ކުރިއަށް ގެންދާ މި މަޝްރޫއުގެ ސަބަބުން، މުލީގައި ދިރިއުޅޭ މީހުންނާއި އެރަށަށް ހިޖުރަ ކުރަން ބޭނުންވާ މީހުންނަށް ހިއްކި ސަރަހައްދުގައި ވަޒަންވެރިވުމުގެ ފުރުސަތު އޮންނާނެ ކަމަށް ޝާތިރު ވިދާޅުވި އެވެ.

ބިން ހިއްކުމުގެ މަޝްރޫއު ނިމުމުން މުލީގެ ބިމުގެ ބޮޑުމިން ގާތްގަނޑަކަށް 80 ހެކްޓަރަށް އަރާނެ އެވެ. އާބާދީގައި 1500 އެއްހާ މީހުން ދިރިއުޅެމުން އަންނަ މުލީގައި މިހާރުގެ ބޮޑުމިނަކީ 36 ހެކްޓަރު ކަމަށް އެ ރަށު ކައުންސިލުން ބުންޏެވެ.