ފްލެޓްތަކަށް ދައްކަން ސަރުކާރުން ފައިސާ ދީފި، ފައިސާ ދެއްކޭނެ ލުއި ގޮތްތަކެއް ހަމަޖައްސަނީ

މާލޭގެ ގާކޮއްޓާއި އަރަބިއްޔާ ސްކޫލް ކުރިން ހުރި ބިމުގައި އިމާރާތްކުރި ފްލެޓްތަކަށް ފައިސާ ދެއްކުމަށް ސަރުކާރުން، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އަށް އިއްޔެ ފައިސާ ދޫކޮށްފި އެވެ.

ފިނޭންސް މިނިސްޓްރީން ރޭ ނެރުނު ނޫސް ބަޔާނެއްގައި ބުނިގޮތުގައި އެޗްޑީސީ އާއި ފްލެޓް މަޝްރޫއު ކުރިއަށް ގެންދިޔަ އެޕެކްސް ރިއަލްޓީ ކުންފުންޏާ ދެމެދު ވެފައިވާ އެއްބަސްވުމުގެ ދަށުން ކޮންޓްރެކްޓަރަށް ދައްކަން ޖެހޭ 278 މިލިޔަން ރުފިޔާ އެޗްޑީސީއަށް ދޫކޮށްފައިވާ ކަމަށެވެ.

ނަމަވެސް މިހާރު އެއްކޮށް ނިމިފައިވާ މި ފްލެޓްތަކަށް ސަރުކާރުން ދައްކަން ޖެހޭ ހުރިހާ ފައިސާއެއް ދައްކާފައިވާ ހައުސިން މިނިސްޓްރީން ކުރިން ވަނީ ބުނެފަ އެވެ.

މިދިޔަ ހަފުތާގެ ބުރާސްފަތި ދުވަހު ބޭއްވި ނިއުސް ކޮންފަރެންސެއްގައި ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވީ "މީގެ ދެ ދުވަސް ކުރިން ސަރުކާރުގެ ކަމާ ބެހޭ އިދާރާއަކުން، ފްލެޓްތަކުގެ ފައިސާގެ ކަންކަން ހަމަޖައްސާދީފައިވާ" ކަމަށެވެ.

މިނިސްޓަރު އެހެން ވިދާޅުވެފައިވާއިރު، އެޗްޑީސީއަށް އިއްޔެ ފައިސާ ދޫކުރީ ކީއްވެ ކަމެއް އަދި ފްލެޓްތަކުގެ ކޮންޓްރެކްޓަރަށް ދެއްކުމަށްޓަކައި ސަރުކާރުން އެޗްޑީސީއަށް ފައިސާ ދޫކުރި އުސޫލެއް ސާފެއް ނޫނެވެ.

އެޕެކްސްގެ އޮފިޝަލަކު މިއަދު ވިދާޅުވީ ސަރުކާރުން ލިބެންޖެހޭ 278 މިލިއަން ރުފިޔާގެ ތެރެއިން އެއްވެސް ފައިސާއެއް މިހާތަނަށް ލިބިފައި ނުވާ ކަމަށެވެ.

ސަރުކާރުން ފައިސާ ހަވާލު މިކުރީ މިދިޔަ މާޗް މަހު މަސައްކަތް ނިންމި ފްލެޓްތައް ހަވާލުނުކޮށް ލަސްކުރީ ސަރުކާރުން ދައްކަން ޖެހޭ ފައިސާ ނުދައްކައިގެން ކަމަށް ބުނެ މަޝްރޫއު ކުރިއަށް ގެންދިޔަ އެޕެކްސްއިން ޝަކުވާކޮށްފައި ވަނިކޮށެވެ.

މި މަޝްރޫއުގެ ދަށުން އަަރަބިއްޔާ ބިމުގައި 90 ފްލެޓް އަޅާފައިވާއިރު ގާކޮށި ބިމުގައި އިމާރާތްކުރީ 190 ފްލެޓެވެ.

ފިނޭންސްގެ ބަޔާނުގައި ބުނީ ފްލެޓް ލިބޭ ފަރާތްތަކަށް ލިބިފައިވާ ނުތަނަވަސްކަން ފިލުވާލުމަށް މިހާރު ފައިސާ ދޫކުރުމަށް ހަމަޖެހިފައިވާ އުސޫލު ލުއިކޮށްދީ، އެޗްޑީސީ މެދުވެރިކޮށް ފައިސާ ދެއްކޭނެ ގޮތް ހަމަޖެއްސުމަށް ސަރުކާރުން ނިންމާފައިވާ ކަމަށެވެ. އެކަމަކު އެއީ ކޮން ގޮތެއް ކަމެއް އެތަނަކުން ނުބުނެ އެވެ.

ކުރިން ސަރުކާރުން ނިންމާފައި އޮތްގޮތުން ފްލެޓްތައް ދޫކުރަނީ ފަސް އަހަރުގެ ތެރޭގައި ދެ މިލިޔަން ރުފިޔާ ދައްކައިގެންނެވެ. އެއީ މަހަކަށް 33،000ރ.ގެ ޖެހޭ މިންވަރެކެވެ. ފްލެޓްތައް ލިބޭ މީހުންނަށް އޭގެ ކުރިން އަންގާފައި އޮތީ މަހަކު ދައްކަން ޖެހޭ އަދަދު އުޅޭނީ ގާތްގަނޑަކަށް 9،000ރ ގައި ކަމަށެވެ.

ގާކޮއްޓާއި އަރަބިއްޔާ ފްލެޓްތައް ލިބޭނެ މީހުން ހޮވައި ލިއުން ވެސް ވަނީ ހަވާލުކޮށްފަ އެވެ. އެކަމަކު ލިބޭ ފްލެޓް ކަނޑައަޅަން އަދި ގުރުއަތެއް ނުނަގަ އެވެ. އެ ފްލެޓްތަކުގައި މި މަހު ދިރިއުޅެން ފަށާނެ ކަމަށް ހައުސިން މިނިސްޓްރީން ކުރިން ވަނީ ބުނެފަ އެވެ.