ސިޒޭރިއަން ހަދައިގެން ނަގާ ކުދިން ފަލަވުމުގެ ފުރުސަތު ބޮޑު

ސިޒޭރިއަން ހަދައިިގެން ނަގާ ކުދިންނަކީ އެކަށީގެންވާ ވަރަށް ވުރެ ފަލަ ނުވަތަ އޮބީސް ކުދިންނަށް ވުމުގެ ފުރުސަތު ބޮޑު ކަމަށް ދިރާސާއެއްގައި ބުނެފި އެވެ.

ދިރާސާ އިން ދެއްކި ގޮތުގައި ސިޒޭރިއަން ހަދައިގެން ނަގާ ކުދިން ކުޑައިރު އެކަށީގެންވާ ވަރަށް ވުރެ ފަލަ ވުމުގެ ފުރުސަތު 15 ޕަސެންޓް އިތުރެވެ. ހާވަޑް ޓީއެޗް ޗާން ސްކޫލް އޮފް ޕަބްލިކް ހެލްތުގެ ރިސާޗަރުން ބުނެފައި ވަނީ ސިޒޭރިއަން ހަދައިގެން ނަގާފައިވާ ކުދިންނަށް ކުރިމަތިވާ ފަލަވުމުގެ މައްސަލަ އެ ކުދިންގެ ދޮށީ އުމުރުގައި ވެސް ތަހައްމަލްކުރަން ޖެހިދާނެ ކަމަށެވެ.

ދިރާސާގައި އިސްކޮށް ހުންނެވި ޕްރޮފެސަރު ޖޯޖް ޝަވާރޯ ވިދާޅުވެފައި ވަނީ ސިޒޭރިއަން ހެދުމަކީ ވަރަށް ގިނަ ހާލަތްތަކުގައި ފުރާނަ ސަލާމަތްކުރުމުން ކޮންމެހެން ކުރަންޖެހޭ ކަމަކަށް ވިޔަސް އެކަމާ ގުޅުން ހުރި ނުރައްކާތަކެއް ވެސް ހުންނަ ކަމަށެވެ.

"ސިޒޭރިއަން އަކީ މައި މީހާ އާއި ދަރިފުޅުގެ ސިއްހަތަށް ވެސް ގެއްލުންތަކެއް ހުރި ކަމެއް. އެގޮތުން މި ދިރާސާއިން ފެނުނީ ސިޒޭރިން ހެދުމާ، ދަރިފުޅު އެކަށީގެންވާ ވަރަށް ވުރެ ފަލަވުމާ ގުޅުން ހުރި ކަމަށް،" ޝަވާރޯ ވިދާޅުވެފައިވެ އެވެ.

މި ދިރާސާކުރުމަށް، އެހެން ދިރާސާއަކަށް 16 އަހަރުގެ މުއްދަތަށް އެއްކޮށްފައިވާ 22000 ކުއްޖެއްގެ މައުލޫމާތު އެއްކޮށްފައިވެ އެވެ. ޖަމާ ޕީޑިއޭޓްރިކްސް ގައި ޝާއިއުކޮށްފައިވާ މި ދިރާސާގައި ބުނެފައި ވަނީ ސިޒޭރިއަން ހަދައިގެން ނަގާފައިވާ ކުދިން ޒުވާން އުމުރުގައި މާބޮޑަށް ފަލަވުމަށް އޮންނަ ފުރުސަތު، އާދައިގެ ގޮތުގައި އުފަންވާ ކުދިންނާ އަޅާބަލާއިރު 64 ޕަސެންޓް އިތުރު ކަމަށެވެ.

ޕްރޮފެސަރު ޝަރާވޯ ވިދާޅުވެފައި ވަނީ ސިޒޭރިން ހެދުމާ އެކަށީގެންވާ ވަރަށް ވުރެ ފަލަވުމާ ގުޅުން ހުރިކަން މި ދިރާސާއިން ވަރަށް ބޮޑަށް ޔަގީންވާ ކަމަށެވެ.