އުލިގަމަށް ހޮނު އެޅުމުން ލައްކައެއްހާ ރުފިޔާގެ ސާމާނު ހަލާކުވި

ހއ. އުލިގަމަށް ރޭ ކުރި ވިއްސާރާގައި ހޮނު އެޅުމުގެ ސަބަބުން ލައްކައެއްހާ ރުފިޔާގެ އިލެކްޓްރޯނިކް ސާމާނަށް ގެއްލުން ލިބުނު ކަމަށް އެ ރަށު ކައުންސިލުން މިއަދު ބުނެފި އެވެ.

އުލިގަމު ކައުންސިލްގެ ނައިބު ރައީސް އަހުމަދު ޒިޔާދު "މިހާރު" އަށް ވިދާޅުވީ ހޮޅު އެޅިީ އެ ރަށު ދެކުނު ކޮޅުގައި ހުންނަ އުރީދޫ އެންޓަނާ އަށް ކަމަށާއި ދިހަ ވަރަކަށް ގެއިން އިލެކްޓްރޯނިކް ސާމާނު އެނދި ކަމަށެވެ. ގިނައިން ހަލާކުވެފައި ވަނީ ޓީވީ ކަމަށް އޭނާ ވިދާޅުވި އެވެ. ޒިޔާދު ވިދާޅުވި ގޮތުގައި ބޮޑަށް ގެއްލުންވީ ހޮނު އެޅި އެންޓަނާ ހުންނަ ސަރަހައްދުގައި ހުރި ގެތަކުގައި ހުރި ސާމާނަށެވެ.

"އެހެން ބައެއް ގޭގޭގައި ކަރަންޓަށް ޖަހާފައި ހުރި ބައެއް އެއްޗެހި ވެސް ހަލާކުވި. ފަންކާ އާއި އޭސީ ފަދަ ތަކެއްޗަށް ވެސް ވަނީ ގެއްލުން ލިބިފައި،" ޒިޔާދު ވިދާޅުވި އެވެ.

ރާއްޖޭގެ އެންމެ ބޮޑެތި ރަށްރަށުގެ ތެރޭގައި ހިމެނޭ، އެކަމަކު ކުޑަ އާބާދީއެއް އޮންނަ އުލިގަމުގައި ދަނޑުވެރިކަން ކުރާ ރަށެކެވެ. ޒިޔާދު ވިދާޅުވީ ދަނޑުބިންތަކަށް ލިބުނު ގެއްލުންތައް މިހާތަނަށް އެނގިފައި ނުވި ނަމަވެސް، އެކަން ވެސް މިހާރު ބަލަމުން އަންނަ ކަމަށެވެ.

"ރޭގައި ވާރޭ ވެހުނު ގަޑީގައި ރަށު ތެރޭގައި ކޮންމެވެސް ވަރަކަށް ފެންގަނޑު ހެދުނު،" ޒިޔާދު ވިދާޅުވި އެވެ.

ގެއްލުންތަކުގެ ސަބަބުން އެ ރަށުގައި މޯބައިލް ފޯނުގެ ހިދުމަތަށް ވެސް ވަނީ ބުރޫ އަރައިފަ އެވެ. ޒިޔާދު ވިދާޅުވީ އެކަން ހައްލު ކުރަން ދިރާގުގެ ޓީމެއް މިހާރު މަސައްކަތް ކުރަމުން އަންނަ ކަމަށެވެ.

ޒިޔާދު ވިދާޅުވި ގޮތުގައި ރަށަށް ކުރި ވިއްސާރަ އަކީ ފަހުގެ ތާރީހެއްގައި އެންމެ ގަދަ އަށް ކުރި ވިއްސާރަ އެވެ. އެގޮތުން ގުގުރުމާއެކު ރަށަށް ވާރޭވެހުނު ކަމަށް އޭނާ ވިދާޅުވި އެވެ.

ހުޅަނގު މޫސުމުގެ ވިއްސާރަ ރާއްޖޭގެ އެކި ހިސާބުތަކަށް ކުރަމުން އަންނައިރު ބައެއް ރަށްރަށުގައި ފެން ބޮޑުވެ ބައެއް ގެއްލުންތައް ވެފައިވެ އެވެ.