ވިހޭއިރު އެއް ހަށިގަނޑުން ގުޅިފައިވާ ދެބެން ސްކޫލަށް ދާން ތައްޔާރުވެފައި

ލަންޑަން (އޮގަސްޓް 30) - ވިހޭ އިރު އެއްހަށިގަނޑުން ގުޅިފައިވާ އިނގިރޭސިވިލާތުގެ ދެބެން އޮޕަރޭޝަން ކޮށްގެން ރަނގަޅު ކުރުމަށް ފަހު ސްކޫލަށް ދާން ތައްޔާރުވެއްޖެ އެވެ.

ރޯސީ އާއި ރޫބީ ފޮމޯސާގެ ނަންދީފައިވާ މި ދެ ކުދިން ވެހޭއިރު ވަނީ ދަށްބަނޑުން ގުޅިފަ އެވެ. ދެ ކުދިންގެ ވެސް ބޮޑު ގޮހޮރުގެ ބައެއް ވަނީ ގުޅިފަ އެވެ. އެހެންވެ މި ދެ ކުދިން ސަލާމަތްވާނެ ކަމުގެ އޮތީ 20 ޕަސެންޓް ފުރުސަތެކެވެ. އެހެން ނަމަވެސް މި ދެ ކުދިން ވިހެއުމާ އެކު 2012 ވަނަ އަހަރު ވަނީ އޮޕަރޭޝަން ކޮށްފަ އެވެ.

ދެ ކުދިންގެ މަންމަ އެންޖެލާ ފޮމޯސާ ބުނީ އުމުރުން މިހާރު ހަތަރު އަހަރުވެފައިވާ ދެބެން ސްކޫލަށް ދެވޭތީ ތިބީ ވަރަށް އުފަލުން ކަމަށެވެ.

"އަހަރެން މާބަނޑު ދުވަސްވަރު ހިތަށް ވެސް ނާރާ މި ދެ ކުދިންނަށް ސްކޫލަށް ދެވޭނެ ކަމަށް. ހުރިހާ ޝުކުރެއް ވެސް އޮތީ އޮޕަރޭޝަން ކުރި ހޮސްޕިޓަލަށް،" މަންމަ ފޮމޯސާ ބުންޏެވެ.

އޭނާ ބުނީ ބަނޑުގައި އޮތް ދެ ކުދިން އެއް ހަށިގަނޑުން ގުޅިފައިވާކަން އެނގުމުން އޭނާ އަށާއި ފިރިމީހާ ޑެނިއަލް ފޮމޯސާގެ ހިތްހަލާކުވި ކަމަށެވެ. އެއް ހަށިގަނޑުން ގުޅިފައިވާ ކުދިން އުފަންވުމަކީ ވަރަށް މަދުން ދިމާވާ ކަމެކެވެ. މި ގޮތަށް އުފަން ވަނީ ގާތްގަނޑަކަށް އުފަންވާ ކޮންމެ 200،000 ކުދިންގެ ތެރޭން ކުއްޖަކަށެވެ.

އިނގިރޭސި ވިލާތުގެ މި ދެ ކުދިން ސިޒޭރިއަން ހަދައިގެން ނެގީ ލަންޑަނުގެ ޔުނިވާސިޓީ ކޮލެޖް ހޮސްޕިޓަލުގަ އެވެ. މި ކުދިން ވިހޭތާ މާގިނައިރެއް ނުވަނީސް ވަނީ ލަންޑަނުގެ ގްރޭޓް އޯމަންޑް ސްޓްރީޓް ހޮސްޕިޓަލަށް ގެންގޮސް އޮޕަރޭޝަން ކޮށްފަ އެވެ.

ފެމޯސާ، 35، ބުނީ ސްކޫލަށް ދެވޭތީ ދެބެން ތިބީ ވަރަށް އުފާވެ ހިތްހަމަޖެހިފައި ކަމަށެވެ. ސަބަބަކީ އެ ކުދިންގެ ދައްތަ ވެސް ސްކޫލަށް ދާތީ އެވެ.

"އެ ކުދިންގެ ޓީޗަރާ ވެސް ވަނީ ބައްދަލުވެފައި. ޓީޗަރު ދެކެވެސް ވަރަށް ލޯބިވޭ. ސްކޫލަށް ގޮސް ކުލަ ޖައްސާ ފޮތް ކިޔާހިތް އެ މީހުން ވަރަށް ބޮޑަށް ވޭ،" ފެމޯސާ ބުންޏެވެ.

ދެ ކުދިންގެ އޮޕަރޭޝަން ކުރި ހޮސްޕިޓަލުގެ ކުޑަ ކުދިންގެ ޚާއްސަ ޑޮކްޓަރެއް ކަމަށްވާ ޕްރޮފެސާ ޕައޮލޯ ޑި ކޮއްޕީ ވިދާޅުވީ ރޯސީ އާއި ރޫބީ އަންނަ މަހު ސްކޫލަށް ދާން ފަށާތީ ވަރަށް އުފާވާ ކަމަށެވެ.