ދަތުރުދާން ހަމަޖައްސާނީ ގުދުރަތީ ރަށެއް؛ ފަޅެއް ނުހިއްކާނެ

މާލޭގައި ދިރިއުޅޭ މީހުން ދަތުރު ދާން، ގަލުފަޅު ހިއްކައިގެން ރަށެއް ހަދަން ކުރީގެ ސަރުކާރުން ނިންމާފައި އޮތަސް އެކަން އެގޮތަށް ނުކުރަން މި ސަރުކާރުން ނިންމާފައިވާކަން އެނގިއްޖެ އެވެ.

ކުރީގެ ރައީސް އަބްދުﷲ ޔާމީންގެ ސަރުކާރުން ނިންމާފައި އޮތީ ދޫނިދޫ އާއި ފޭދޫފިނޮޅާ ދޭތެރޭގައި އޮންނަ ފަޅު ހިއްކައިގެން ދެ ރަށެއް ހަދާށެވެ. އޭގެ ތެރެއިން އެއް ރަށް ހާއްސަ ކުރަން ނިންމާފައިވަނީ ދަތުރުދާ މީހުން އަމިއްލައަށް ކައްކައި ކައި މުނިފޫހިފިލުވާ ގޮތަށެވެ. އަނެއް ރަށް ތަރައްގީ ކުރަން ނިންމާފައި އޮތީ ކޮޓަރިތަކާއި ރެސްޓޯރެންޓްތައް ހިމެނޭގޮތަށެވެ. ސަރުކާރު ބަދަލުވިއިރު އެ ޕްރޮޖެކްޓްގެ އަމަލީ އެއްވެސް މަސައްކަތެއް ކޮށްފައެއް ނުވެ އެވެ.

ދަތުރު ދާން ހާއްސަ ރަށެއް މާލެ ކައިރިން ހަމަޖެއްސުމަކީ މި ސަރުކާރުގެ ފުރަތަމަ 100 ދުވަހުގެ ވައުދެކެވެ. "މިހާރު" އަށް އެނގިފައިވާގޮތުން ސަރުކާރުން ނިންމާފައިވަނީ ފަޅެއް ހިއްކުމުގެ ބަދަލުގައި ގުދުރަތީ ރަށެއް އެކަމަށް ހަމަޖެއްސުމެވެ. އެ މަސައްކަތް ޕްލޭނިން މިނިސްޓްރީން ކުރަމުން އަންނަކަން ވަނީ އެނގިފަ އެވެ. ނަމަވެސް އެ މިނިސްޓްރީގެ ބަހެއް ލިބޭ ގޮތެއް ނުވި އެވެ.

ނަމަވެސް މި ހަފުތާގެ ތެރޭގައި ރައީސް އިބްރާހިމް މުހައްމަދު ސޯލިހް ވަނީ، އެކި ވަސީލަތްތަކާ އެކު، ދަތުރު ދިއުމަށް ރަށެއް ވަރަށް އަވަހަށް ހަމަޖައްސަވާނެކަން އިއުލާން ކުރައްވައިފަ އެވެ. ރައީސް ވެސް އެރަށާ ގުޅޭ ތަފްސީލެއް ނުދެއްވަ އެވެ.

މާލެ ކައިރި ގިނަ ރަށްތައް ހުރީ އެކި ބޭނުންތަކަށް ނަގައިފަ އެވެ. މާލެ ސަރަހައްދުގައި ދިވެހިން ދަތުރު ދާން ބޭނުންކުރި ހުރިހާ ރަށެއްހެން ވަނީ ޓޫރިސްޓް ރިސޯޓް ހަދަން ދީފަ އެވެ. އޭގެ ތެރޭގައި ކުޑަބަނޑޮހާއި މާދޫފިނޮޅާއި ފޭދޫ ފިނޮޅު ހިމެނެ އެވެ.