ޔުވެންޓަސް ދެ ވަނަ މެޗުން ވެސް މޮޅެއް ހޯދައިފި

ރޯމް (އޮގަސްޓް 28) - ލާޒިއޯ އަތުން 1-0 އިން މޮޅުވެ އިޓާލިއަން ލީގުގެ އެންމެ ފަހު ފަސް ސީޒަނުގެ ޗެމްޕިއަން ޔުވެންޓަސް އިން ހަ ޕޮއިންޓާ އެކު ލީގުގެ އެއް ވަނަ އަށް އަރައިފި އެވެ.

އެ ޓީމު ދެ މެޗުން މޮޅުވެފައިވާއިރު، ދެ ވަނައިގައި ހަތަރު ޕޮއިންޓާ އެކު އޮތީ ރޭ އޭސީ މިލާން އަތުން 4-2 އިން މޮޅުވި ނަޕޯލީ އެވެ.

ރަށުން ބޭރުގައި ކުޅުނު މެޗުގައި ޔުވެންޓަސްގެ ހަމައެކަނި ގޯލް 66 ވަނަ މިނެޓުގައި ކާމިޔާބުކޮށްދިނީ ސާމީ ކެދީރާ އެވެ. ފުރަތަމަ މެޗުން މިދިޔަ ހަފުތާގައި ފިއޮރެންޓީނާ އަތުން 2-1 އިން ޔުވެންޓަސް މޮޅުވި މެޗުގައި ވެސް ކެދީރާ ލަނޑު ޖެހި އެވެ.

އަމިއްލަ ދަނޑުގައި މިލާން އަތުން ރޭ ނަޕޯލީ މޮޅުވިއިރު ފުރަތަމަ ހާފުގައި އެ ޓީމަށް ދެ ލަނޑު ކާމިޔާބުކޮށްދިނީ މި ސީޒަނުގައި އެ ޓީމާ ގުޅުނު ޕޮލެންޑުގެ ފޯވާޑް މިލިކެވެ. ދެ ވަނަ ހާފުގެ ކުރީކޮޅު މިލާނުން ވަނީ އެމްބަޔޭ ނިއަންގް އާއި ސުސޯގެ ލަނޑުތަކުން އެއްވަރުކޮށްފަ އެވެ. އޭގެ ފަހުން އެ ޓީމުގެ ޔުރާޖް ކުޗްކާ އާއި ނިއަންގް އަށް ރަތްކާޑު ދައްކައި ފޮނުވާލިއިރު ނަޕޯލީ މޮޅުވީ ހޯސޭ ކަލެހޮންގެ ދެ ލަނޑުންނެވެ.