ސޯލްޝެއާއާ މެދު މޮރީނިއޯ ސުވާލު އުފައްދައިފި

މެންޗެސްޓާ (މާޗް 4) - ވަގުތީ ކޯޗެއްގެ މަގާމުގައި ހުރެ އޮލެ ގުނަ ސޯލްޝެއާ މެންޗެސްޓާ ޔުނައިޓެޑާ އެކު ހޯދަމުން އަންނަ ކާމިޔާބީ ދިގު މުއްދަތަކަށް ދެމެހެއްޓިދާނެ ކަމާ މެދު ޔުނައިޓެޑްގެ ކުރީގެ ކޯޗު ހޯސޭ މޮރީނިއޯ ސުވާލު އުފައްދައިފި އެވެ.

މޮރީނިއޯ މަގާމުން ވަކިކޮށް ސޯލްޝެއާއާ މިދިޔަ ޑިސެމްބަރު މަހު ޔުނައިޓެޑްގެ ކޯޗުކަން ހަވާލުކުރީ މި ސީޒަނުގެ ނިޔަލަށެވެ. ޔުނައިޓެޑާ ހަވާލުވެ ސޯލްޝެއާ ވަނީ އެ ޓީމުގެ ނަތީޖާތައް ވަރަށް ރަނގަޅުކޮށްފަ އެވެ. މިހާތަނަށް ސޯލްޝެއާގެ ކޯޗުކަމުގައި ޔުނައިޓެޑުން ކުޅުނު 16 މެޗުގެ ތެރެއިން ބަލިވީ ޗެމްޕިއަންސް ލީގުގައި ޕީއެސްޖީ އަތުން އެކަންޏެވެ.

ޔުނައިޓެޑްގައި މޮރީނިއޯ އަށް މި ސީޒަނުގައި ދިމާވި އެންމެ ބޮޑު މައްސަލަ އަކީ ޓީމުގެ މެނޭޖްމަންޓާއި ބައެއް ކުޅުންތެރިންނާއި ޖެހުނު މައްސަލަތަކެވެ. އަދި ޔުނައިޓެޑުން ވަކިވުމަށް ފަހު މޮރީނިއޯ ވަނީ ދެން އޭނާ ހަވާލުވާ ކްލަބެއްގައި ހުންނަން ޖެހޭނީ ހުރިހާ ކަމެއް އޮންނަ އުސޫލުގެ ތެރެއިން ހަމަޖެހިފައި ކަމަށް ބުނެފަ އެވެ.

ޔުނައިޓެޑްގައި ސޯލްޝެއާ ހޯދަމުން އަންނަ ކާމިޔާބީތަކަކީ ޕްރެޝަރެއް ނެތި އޭނާ ހާސިލްކުރަމުން އަންނަ ކަމެއް ކަމަށާއި ވަކި ޓާގެޓްތަކެއް ދީގެން ސީޒަނެއް ފަށާއިރު އޮންނާނީ ތަފާތު ހާލަތެއް ކަމަށް މޮރީނިއޯ ބުންޏެވެ.

"ފުޓްބޯޅައިގައި މިސާލަކަށް ބަލާނަމަ އަހަރެންގެ ކުރީގެ ކްލަބް (ޔުނައިޓެޑް). ބަދަލު ފެންނާނެ ވަރަށް އަވަހަށް. ހަަމަ ވަރަށް ރަނގަޅު ބަދަލަކަށް ވެދާނެ. އެކަމަކު އަހަންނެއް ގަބޫލެއް ނުކުރަން މިއީ ދިގު މުއްދަތަކަށް ވެދާނެ ކަމެއް ކަމަށް. އެއީ ދިގު މުއްދަތަށް ޖެހޭނެ ޓާގެޓްތަކެއް އޮންނަން. ކްލަބްގެ ހިންގުން ހަރުދަނާވާން. ވަގުތީ ގޮތުން އަންނަ ނަތީޖާތަކަށް ވުރެން ކްލަބެއް ވިސްނަންވީ ދިގު މުއްދަތަކަށް،" ބެއިން ސްޕޯޓްސްގެ ޝޯއެއްގައި ސޯލްޝެއާ އަށް އިޝާރާތްކޮށް މޮރީނިއޯ ބުންޏެވެ.

މޮރީނިއޯ މި ގޮތަށް ބުނެފައިވަނީ ޔުނައިޓެޑްގެ ބައެއް ބޯޑު މެމްބަރުން ސޯލްޝެއާ އަށް ދާއިމީ އެއްބަސްވުމެއް ދޭން ބޭނުންވާ ކަމަށް މީޑިއާގައި ބުނެފައިވަނިކޮށެވެ.

ފުލަމް އިން ވަނީ މި ސީޒަނުގައި އެ ޓީމަށް ގެނައި ކާމިޔާބު ކޯޗު ކްލައުޑިއޯ ރަނިއޭރީ މަގާމުން ދުރުކޮށްފަ އެވެ. އަދި ސީޒަނުގެ ބާކީބައިގައި ފުލަމް އަށް ކޯޗުކޮށްދޭނީ ކުރިން އެ ޓީމަށް ކުޅުނު މިޑްފީލްޑަރު ސްކޮޓް ޕާކާ އެވެ. މޮރީނިއޯ ބުނީ ޕާކާ އަށް ސޯލްޝެއާގެ ކިބައިން މިސާލު ނެގޭނެ ކަމަށާއި އެކަމަކު އެއީ ހައްލެއް ނޫން ކަމަށެވެ.

"ފުލަމް އަށް ރަނިއޭރީ އަށް ވުރެ މޮޅު ކޯޗެއް ލިބޭނެތަ؟ އަހަންނަށް ހިއެއްނުވޭ. ރަނިއޭރީ އާއި ޕާކާގެ ތަޖުރިބާތަކާ އަޅާކިޔޭނެތަ؟ އެވެސް ނުވާނެ ކަމެއް. އެކަމަކު ސޯލްޝެއާ ކިބައިން ހިތްވަރު ހޯދައި ވަގުތީ ގޮތުން ޕާކާ އަށް ވެސް ރަނގަޅު ނަތީޖާތަކެއް ނެރެވިދާނެ. އެކަމަކު އެއީ ކްލަބަކަށް ހައްލެއް ނޫން،" މޮރީނިއޯ ބުންޏެވެ.

އޭނާ ބުނީ ކޮންމެ ކްލަބަކަށް ވެސް އެންމެ ރަނގަޅަށް ކުރިއަށް ދެވޭނީ ރަނގަޅު ބިންގަލެއްގެ މަތީގައި މަގާމުތަކުގައި އެއް ވިސްނުމެއް ހިއްސާކުރާ ބަޔަކު ތިބެގެން ކަމަށެވެ. ތަފާތު ހިޔާލުތަކެއްގެ މައްޗަށް ތިބެގެން ކްލަބަކަށް ދުރު މުސްތަގުބަލެއްގައި ކާމިޔާބު ހޯދަން އުނދަގޫވާނެ ކަމަށް ވަނީ ބުނެފަ އެވެ.