ތާޖުއްދީން ސްކޫލު: ތަފާތު ދައްކަމުން ބަދަލަކަށް

ތާޖުއްދީން ސްކޫލަށް މުހިއްމީ ދަރިވަރުންގެ ނަތީޖާ އެކަންޏެއް ނޫނެވެ. ކިޔެވުމާ އެއްގޮތަށް ދަރިވަރުންގެ ކިބައިގައި ހުރި ހުނަރާއި ގާބިލްކަން އިތުރުކޮށް ތަރައްގީކުރުމަކީ ވެސް، މީގެ 30 އަހަރު ކުރިން ހުޅުވި ސްކޫލުން ސަމާލުކަން ދޭ ކަމެކެވެ. އިންޓަ ސްކޫލުގެ މުބާރާތްތަކުގައި ދަރިވަރުން ހޯދާ ކާމިޔާބީ އަކީ އެކަމުގެ ހެއްކެކެވެ.

ޕްރިންސިޕަލް ބަޝީރާ މުހައްމަދު ވިދާޅުވި ގޮތުގައި، ފެބްރުއަރީ 7، 1989 ވަނަ އަހަރު ކުރީގެ ރައީސް މައުމޫން އަބްދުލް ގައްޔޫމު ހުޅުއްވައިދެއްވި ސްކޫލަށް ލިބޭ އެންމެ ބޮޑު ހިތްހަމަޖެހުމަކީ ބެލެނިވެރިންގެ ފަރާތުން ލިބޭ އެއްބާރުލުމެވެ. ސްކޫލުގައި މަސައްކަތްކުރާ ޓީޗަރުން ފެށިގެން އިސް މަގާމުތަކުގައި ތިއްބެވި ބޭފުޅުންނާ ބެލެނިވެރިންނާ ދެމެދު އޮތީ ވަރަށް ބަދަހި ގުޅުމެކެވެ.

"ތާޖުއްދީނުގެ ހުރިހާ ކުރިއެރުމަކީ ސްކޫލުގެ ޓީޗަރުންނާއި ބެލެނިވެރިންނާ ދެމެދު އޮންނަ ގުޅުން. ދެކޮޅުން މަސައްކަތް ހަމަ އެއް ވަރަކަށް ކުރެވިގެން ކާމިޔާބީ ހޯދޭނީ،" ޖަޕާނު ސަރުކާރުގެ އެހީގައި އިމާރާތްކުރި ސްކޫލުގެ ކާމިޔާބާ ގުޅޭގޮތުން، މީގެ 10 އަހަރު ކުރިން އެ ސްކޫލަށް ގުޅިވަޑައިގެންނެވި ޕްރިންސިޕަލް ވިދާޅުވި އެވެ.

"ބެލެނިވެރިން އެކަނި ބޭނުންވިއަސް ކާމިޔާބީއެއް ނުހޯދޭނެ ސްކޫލުގެ އެއްބާރުލުން ނުލިބެންޏާ. އެގޮތަށް ސްކޫލުން މަސައްކަތް ކުރިއަސް ކާމިޔާބީއެއް ނުލިބޭނެ ބެލެނިވެރިންގެ ފަރާތުން އެއްބާރުލުން ނުލިބެންޏާ. ސްކޫލުން ރާވައިގެން ކުރިއަށްގެންދާ ކަންކަމުގައި ބެލެނިވެރިންގެ އެއްބާރުލުން ލިބޭ. ދަރިވަރުންނަށް ލިބޭ ކާމިޔާބަކީ ވަރަށް ބޮޑު ހިތްހަމަޖެހުމެއް."

ހަމައެކަނި ޕްރައިމަރީ ގްރޭޑުތަކަށް ކިޔަވައިދޭން ތާޖުއްދީން ސްކޫލު ހުޅުވީ ވެސް "ތާޖުއްދީން ޕްރައިމަރީ ސްކޫލު" ނަމުގަ އެވެ. ނަމަވެސް ފަހުން ތާޖުއްދީން ސްކޫލުގެ ނަމަށް ބަދަލުކޮށް 2011 ވަނަ އަހަރު އެ ސްކޫލުގައި ފުރަތަމަ ފަހަރަށް ސެކަންޑްރީ އަށް ކިޔަވައިދޭން ފެށި އެވެ.

ތާޖުއްދީންގައި ފުރަތަމަ ފަހަރަށް އޯލެވެލް އިމްތިޚާނު ހެދީ 2013 ވަނަ އަހަރުގަ އެވެ. އެ އަހަރަށްފަހު ގައުމީ ފެންވަރުގައި އެ ސްކޫލުގެ ދަރިވަރުން ވިދަމުން އަންނަކަން ފާހަގަކުރެ އެވެ. ނަތީޖާއާ އެއްވަރަށް އެ ދަރިވަރުންގެ ކިބައިގައި ހުރި ހުނަރު ވެސް ތަރައްގީ ކުރަން ޖެހެ އެވެ. އެކަމަކީ ސްކޫލުން ހާއްސަ ސަމާލުކަމެއް ދޭ ކަމެއްކަމަށް ބިޝާރާ ވިދާޅުވި އެވެ.

އޭނާ ވިދާޅުވިގޮތުގައި ސްކޫލުގައި 1500 އަށްވުރެ ގިނަ ދަރިވަރުން އުޅޭއިރު، އެ ހުރިހާ ދަރިވަރުންނަކީ ކިޔެވުމަށް އެންމެ މޮޅު ދަރިވަރުން ނޫންކަން ގަބޫލުކުރަން ޖެހެ އެވެ. ދަރިވަރުން ކޮށްފައިވާ ތަޖުރިބާތަކާއި ހާލަތަށް ބަލާފައި އިތުރަށް އެހީތެރިކަން ބޭނުންވާ ދަރިވަރުން ތިބޭއިރު، އެ ކުދިންނަށް ހާއްސަ އިސްކަމެއްދޭ ކަމަށް ވިދާޅުވި އެވެ. ހަމަ އެ އުސޫލުން ކުޅިވަރަށް މޮޅު ދަރިވަރުންނަށް ކުރިއަށް ދިއުމަށް، އިންޓަ ސްކޫލު މުބާރާތްތަކުން ފުރުސަތު ދެމުން އަންނަކަމަށް ވިދާޅުވި އެވެ.

ބިޝާރާ ވިދާޅުވާ ގޮތުގައި ދަރިވަރުންނާއި ބެލެނިވެރިންގެ ސަޕޯޓު އޮންނަ ނަމަ، އެ މުބާރާތެއްގައި ތާޖުއްދީން ބައިވެރިވެ އެވެ. އެކަމުގެ ނަތީޖާ، ކުޅިވަރުގައި ދަރިވަރުންނަށް ދޭ އެންމެ ޝަރަފުވެރި އެވޯޑު، "ކަލާސް އެވޯޑު" އިން ފެންނަކަމަށް ވިދާޅުވި އެވެ. ތަފާތު އެކި ކުޅިވަރުތަކުން ތާޖުއްދީން ސްކޫލުގެ އެތައް ދަރިވަރުންނެއް ކޮންމެ އަހަރަކު ވެސް އެވޯޑު ހޯދަ އެވެ.

"ހުރިހާ ކުދިން ކިޔެވުމަށް މޮޅު ނުވެދާނެއޭ، އެހެންވީމަ އެހެން ހުނަރުތަކަށް ވެސް އެއް ވަރަކަށް ފުރުސަތު ދީގެން ސްކޫލުން ކުރަންވާނެ އޭ. އެގޮތަށް ބަލައިގެން ހުރިހާ ކުޅިވަރުތަކެއްގައި ވެސް ބައިވެރިވަނީ،" ބަޝީރާ ވިދާޅުވި އެވެ.

"ތިރީސް އަހަރު ވެގެން ދިޔައިރު އެއް އަނެއް އަހަރަށް ބޮޑެތި ކާމިޔާބީތައް އެބަހުރި ހުރިހާ ގޮތަކުން ވެސް. ކުޅިވަރުގެ ގޮތުން ބެލިކަމުގައި ވިއަސް ކުދިންގެ ކިޔެވުމާއި ފެންވަރުގެ ގޮތުން ބެލި ކަމުގައި ވިއަސް. އަޅުގަނޑުމެންގެ ދަރިވަރުން ކޮންމެ އަހަރަކު ވެސް ޓޮޕްޓެންގައި ހިމެނޭ. އެއީ އެއް ނޫން ސްކޫލުގެ ހަމައެކަނި ފޯކަސް އަކީ. އަޅުގަނޑުމެން ވަރަށް ފޯކަސް ކުރަން ކުދިން އެހެން ގޮތްގޮތަށް ހުނަރުވެރިކުރުވަން."

އެކަންކަމުގެ އިތުރުން ތާޖުއްދީނުން ތަޖުރިބާކުރާ ތަފާތު އެހެން ކަމެއް އެބަ އޮތެވެ. އެއީ ގްރޭޑު 10ގެ ދަރިވަރުންނަށް ހާއްސަ "މެންޓާ" އެއް ކަނޑައަޅައި، އެ ދަރިވަރުންގެ ވާހަކަތައް ހިއްސާކުރުމުގެ ފުރުސަތު ފަހިކޮށްދިނުމެވެ. ހަތަރު އަހަރު ވަންދެން އެ ޕްރޮގްރާމް ކުރިއަށް ގެންގޮސްފައިވާއިރު އެކަން ވަރަށް ކާމިޔާބުކަމަށް ބަޝީރާ ވިދާޅުވި އެވެ.

މެންޓާއިންގެ ގޮތުގައި ކަނޑައަޅަނީ ސްކޫލުގައި މަސައްކަތް ކުރާ މުވައްޒަފުންނެވެ. އެ ކޮންމެ މީހަކަށް ދެ ތިން ދަރިވަރަކު ހަމަޖައްސާފައިވާއިރު، އެ ދަރިވަރުންނާ ގާތް ގުޅުމެއް ބާއްވައި އެ ކުދިންނަށް ދިރިއުޅުމުގައި ދިމާވާ ކަންތައްތައް އެ މެންޓާ އަށް ހިއްސާކުރެވޭނެ އެވެ. މައްސަލައެއް ދިމާވާ ނަމަ އެކަމަށް ހައްލެއް ގެނެސްދިނުމުގައި އެހީތެރިވެ ދެ އެވެ.

"ގްރޭޑު 10ގައި އުޅޭއިރު ވަރަށް ސްޓްރެސްކޮށް ކުދިން އުޅޭނީ. އެހެންވެ އެކަމަށް އެހީތެރިކަން ފޯރުކޮށްދިނުމަށް ފެށި ވަރަށް ކާމިޔާބު ޕްރޮގްރާމެއް އެއީ،" ބަޝީރާ ވިދާޅުވި އެވެ.

ދަރިވަރުން މޮޅު ނަތީޖާ ހޯދާ ކަމަށާއި ނަމަވެސް އެންމެން ވެސް ދައްކަނީ އަހުލާގު ނެތް ވާހަކަ ކަމަށް އޭނާ ވިދާޅުވި އެވެ. އެހެންވެ ސްކޫލު ސްރެޓެޖީގައި ވެސް އެންމެ އިސްކަމެއްދީފައި ވާނީ އިޖުތިމާއީ މަސައްކަތުގައި ދަރިވަރުން ބައިވެރިކުރުވުން ކަން ފާހަގަކުރެއްވި އެވެ. އޭގެ ތެރޭގައި ގައުމިއްޔަތަށް އޮންނަ ލޯބި އިތުރުކުރުމަކީ ހާއްސަ އިސްކަމެއް ދޭނެ ކަމެއް ކަމަށް ވިދާޅުވި އެވެ.

އެ މަސައްކަތުގެ ތެރެއިން ތާޖުއްދީން ސްކޫލުތެރެއަށް މިހާރު ވެސް ވަނީ ބޮޑު ބަދަލެއް ގެނެސްފަ އެވެ. ސްކޫލުގެ އެކި ދިމާލުން ތަފާތު މެސެޖުތައް ފެންނަން ހުރުމާއި އެކި ކަންކަމާ ގުޅޭ އާއްމު މައުލޫމާތު ލިބޭނެ ބޯޑު އެއްޗެހި ވެސް ވަނީ ބަހައްޓައިފަ އެވެ. އެކަންކަމުގެ ފައިދާ މިހާރު ވެސް ކުރާ ކަމަށް ބަޝީރާ ވިދާޅުވި އެވެ.

ސްކޫލުގެ ވެށި އިތުރަށް ރީތިކޮށް ހިތްހަމަޖެހޭ މާހައުލަކަށް ހެދުމަށް އިތުރަށް މަސައްކަތް ކުރަން ވަނީ ހަމަޖައްސައިފަ އެވެ. ސްކޫލަށް 30 އަހަރު ފުރުމާ ދިމާކޮށް ކުރިއަށްގެންދާ ހަރަކާތްތަކުގެ ތެރޭގައި ހާއްސަކަމެއް ދީގެން ސްކޫލު ފެހިކުރުން ހިމަނާފައި ވަނީ ވެސް އެހެންވެ އެވެ. ކިތަންމެ ކުޑަ ކަމެއްހެން ހީވިއަސް އެކަމުގެ ނަތީޖާ ފޮނިވާނެކަން ޔަގީނެވެ.