"މޮންގާ"ގެ ޑައިރެކްޓަރަށް ބޮޑު ހުކުމެއް އަތުވެދާނެ

"މޮންގާ" ޑައިރެކްޓްކޮށްގެން 2010 ވަނަ އަހަރު ބޮޑު މަޝްހޫރު ކަމެއް ހޯދި ޓައިވާނުގެ ނުފޫޒު ގަދަ ޑައިރެކްޓަރު/ޕްރޮޑިއުސަރު ޑޯޒް ނިއު އަށް ޖިންސީ ގޯނާގެ ދައުވާ ކުރުމާ ގުޅިގެން އޭނާ އަށް ދިގު މުއްދަތެއްގެ ޖަލު ހުކުމެއް އަތުވާނެކަމުގެ ބިރު ބޮޑުވެއްޖެ އެވެ.

މީޑިއާތަކުން ރިޕޯޓްކޮށްފައިވާ ގޮތުގައި ނިއު، 52، ގެ މައްޗަށް ދައުވާކޮށްފައި ވަނީ އޭނާގެ ކުރިއަށް އޮތް ފިލްމުގެ "ޕާއޯ މާ" ގެ ޝޫޓިން ތެރޭގައި މަސްތުވެގެން، ފިލްމުގެ އަންހެން ކްރޫ މެމްބަރަކަށް ގަދަކަމުން ޖިންސީ ގޯނާކުރި ކަމަށް ބުނާ މައްސަލައިގަ އެވެ.

ނިއުގެ މައްޗަށް ދައުވާ ސާބިތުވެއްޖެ ނަމަ 3-10 އަހަރާ ދެމެދުގެ ޖަލު ހުކުމެއް އަންނާނެ އެވެ.

ނިއު ވަނީ މިދިޔަ ޑިސެމްބަރު މަހުގެ ތެރޭގައި އޭނާގެ މައްޗަށް އަންހެން ކްރޫ މެމްބަރު ކުރި ތުހުމަތަށް އިންކާރުކޮށްފަ އެވެ. ނިއު ބުނީ ތުހުމަތަށް އިންކާރުކުރާ ކަމަށާއި އެކަމެއް ހިނގި އިރު، އެއީ ލޯބިވެރިން ކަމަށެވެ.

މި މައްސަލާގައި އަންހެން މީހާ ނިއުގެ މައްޗަށް ދައުވާކޮށް، ޝަރީއަތް ފަށަން ތައްޔާރުވަމުން އަންނަ އިރު، ކަފާލާތުގެ ދަށުން އޭނާ ހުރީ ދޫކޮށްލައިފަ އެވެ. އެކަމަކު ގައުމުން ބޭރަށް ދިއުން މަނަލެވެ.

ނިއުގެ މައްޗަށް ކުރިން ވެސް އޭނާއާ އެކު މަސައްކަތްކުރި ބައެއް އަންހެނުން ޖިންސީ ގޯނާގެ ތުހުމަތުކޮށްފައިވެ އެވެ.

އޭގެ ތެރޭގައި ނިއު ބަތަލުގެ ރޯލް ވެސް ކުޅުނު 2007 ގެ ފިލްމު "ވަޓް އޯން އާތު ހޭވް އައި ޑަން ރޯންގް؟" ގެ ބަތަލާ ކީ ހުއާން-ރޫ ހިމެނެ އެވެ. އޭނާ ބުނެފައިވާ ގޮތުގައި އެ ފިލްމުގެ ލޯބީގެ މަންޒަރެއް ނެގުމުގެ ތެރޭގައި ނިއު ވަނީ އޭނާއާ ގަދަކަމުން ބެހެން މަސައްކަތްކޮށްފަ އެވެ.

ޖިންސީ ގޯނާގެ މައްސަލައެއްގައި ނިއު ގާނޫނީ ގޮޅިއަކަށް ފެތިދާނެ ކަމުގެ ބިރު ބޮޑުވެފައިވާ އިރު، 2014 ގައި ވެސް އޭނާގެ މައްޗަށް ޖަލު ހުކުމެއް އިއްވި އެވެ.

އެ ފަހަރު މައްސަލައަކަށްވީ ފިލްމު "ޕެރަޑައިސް އިން ސާވިސް" ގެ ގެ ތައްޔާރީތަކުގެ ތެރޭގައި ޗައިނާގެ މީހަކު ޓައިވާންގެ ނޭވަލް ބޭސްއަކަށް ގެންދިއުމެވެ. މި މައްސަލާގައި ނިއުގެ މައްޗަށް އިއްވި ޖަލު ހުކުމް ބާތިލުކޮށް، މިނިވަން ކުރީ ބޮޑު އަދަދަކުން ޖޫރިމަނާ ކުރުމަށް ފަހު އެވެ.

ނިއު އެންމެ ފަހުން ގެނެސް ދިން ފިލްމަކީ 2017 ގެ "ފިސްޓް އެންޑް ފެއިތު" އެވެ.