ޖަލުގައި އޮތް ވައިންސްޓީން އަށް ބިނާކޮށް ހަދާ ފިލްމަކީ "ޝީ ސެޑް"

ނުފޫޒު ބޭނުންކޮށްގެން ހޮލީވުޑްގެ އެތައް އަންހެނުންނެއް ރޭޕްކޮށް، ޖިންސީ ގޯނާގެ ގިނަ މައްސަލަތަކެއް ފެންމަތިވެ އޭގެ ތެރެއިން ބައެއް މައްސަލަތައް ސާބިތުވެ މިހާރު 23 އަހަރުގެ ޖަލު ހުކުމެއް ތަންފީޒުކުރަމުން އަންނަ ކުރީގެ ޕްރޮޑިއުސަރު ހާވީ ވައިންސްޓީން އަށް ބިނާކޮށް ހަދާ ފިލްމުގެ ނަމަކަށް "ޝީ ސެޑް" ހަމަޖައްސައިފި އެވެ.

ދެހާސް ނަވާރައިގައި އިއުލާންކުރި މި ފިލްމަކީ އެކްޓަރު ބްރެޑް ޕިޓްގެ ކުންފުނި ޕްލޭން ބީ ޕްރޮޑަކްޝަނާއި ޔުނިވާސަލް ޕިކްޗާޒް ގުޅިގެން ހަދާ އެއްޗެކެވެ.

ވައިންސްޓީން، 69، ގެ ފިލްމު ހަދަން ނިންމާފައި ވަނީ 2017 ގެ ކުރީކޮޅު ފަޅާއަރުވައިލި އޭނާގެ މައްސަލަގަނޑަށް ބިނާކޮށް ނިއު ޔޯކް ޓައިމްސްގެ ރިޕޯޓަރުން ކަމަށްވާ ޖޫޑީ ކެންޓޯ އާއި މެގަން ޓްވޯހީ ލިޔުނު 2019 ގެ ފޮތް "ޝީ ސެޑް: ބްރޭކިން ދަ ސެކްޝުއަލް ހެރަސްމަންޓް ސްޓޯރީ ދެޓް ހެލްޕްޑް އިގްނައިޓް އަ މޫވްމަންޓް" އަށް ބިނާކޮށެވެ.

ޖިންސީ ފުރައްސާރަތަކާ ދެކޮޅަށް #މީޓޫ އާއި #ޓައިމްސްއަޕް ފަދަ ހަރަކާތްތައް އުފެދުނީ ވެސް ވައިންސްޓީންގެ މައްސަލަ ފެންމަތިވުމާ އެކީގަ އެވެ.

އޭނާގެ ވާހަކަ ކިޔައިދޭ ފިލްމުގެ މަސައްކަތް ފެށުމަށް ތައްޔާރީތައް ވަމުން އަންނަ އިރު ފިލްމުގެ ދެ ރިޕޯޓަރުންގެ ރޯލު ކުޅެން މިހާރު ވަނީ ކެލީ މުލިގަން އާއި ޒޯ ކަޒާން ހަމަޖައްސައިފަ އެވެ.

ޑެޑްލައިނުން ބުނި ގޮތުގައި "ޝީ ސެޑް" ޑައިރެކްޓްކުރާނީ މިދިޔަ އަހަރު ނެޓްފްލިކްސް އިން ގެނެސްދިން މިނީ ސީރީޒް "އަންއޮތޮޑޮކްސް" ޑައިރެކްޓްކުރި މަރާޔާ ޝްރާޑާ އެވެ. އަދި ފިލްމުގެ ސްކްރީންޕްލޭ ލިޔެފައި ވަނީ 2018 ގެ "ކޮލެޓް" ލިޔުނު ރެބެކާ ލެންކީވިޒެވެ.

"ޝީ ސެޑް" ގެ ޝޫޓިން މި މަހުގެ ތެރޭގައި ފަށާނެ އެވެ. އެކަމަކު އަދި ފިލްމުގައި ވައިންސްޓީންގެ ރޯލު ކުޅޭނެ މީހަކާއި ފިލްމު ބެލުންތެރިންނަށް ގެނެސްދޭނެ އިރެއް އިއުލާނެއް ނުކުރެ އެވެ.