ވިލިމާލެ ސާފުކޮށް 35 ޓަނުގެ ކުނި ނަގައިފި

ވިލިމާލެ އިން 35 ޓަނަށް ވުރެ ގިނަ ކުނި މިއަދު ނަގައިފި އެވެ.

"ސާފު ރާއްޖެ-އަހަރެންގެ ވެސް ޒިންމާ" ކެމްޕެއިން ގައި ވިލިމާލެ ސާފު ކުރުމުގެ ހަރަކާތް ފައްޓަވައި ދެއްވީ ނައިބު ރައީސް ފައިސަލް ނަސީމެވެ. އެމަނިކުފާނު މި ހަރަކާތުގައި އަމަލީ ގޮތުން ބައިވެރިވެވަޑައިގެންނެވި އިރު، މާލޭ ސިޓީ ކައުންސިލްގެ މޭޔަރު ޝިފާ މުހައްމަދާއި ވެމްކޯގެ މުވައްޒަފުންނާއި ވިލިމާލޭގައި ދިރިއުޅޭ ގިނަ އަދަދެއްގެ އާންމުން ވެސް ހަރަކާތުގައި ބައިވެރިވި އެވެ.

ވެމްކޯގެ އޮފިޝަލަކު ވިދާޅުވީ، މި ހަރަކާތުގައި ވިލިމާލޭގެ ގޮނޑުދޮށާއި ސިނާއީ ސަރަހައްދުތަކާއި ޕާކުތަކާއި ބައެއް މަގުތައް ވެސް ވަނީ ސާފުކޮށްފައި ކަމަށެވެ. ވިލިމާލެ ސާފު ކުރިއިރު، ކުނީގެ ގޮތުގައި ބޮޑަށް ފެނިފައިވަނީ ޕްލާސްޓިކް ކަމަށް ވެސް އޮފިޝަލް ވިދާޅުވި އެވެ.

"ޕްލާސްޓިކް ފުޅި ފަދަ ތިމާވެއްޓަށް ގެއްލުން ވާނެ ތަކެތި ފެނިފައި ވަނީ،" އޭނާ ވިދާޅުވި އެވެ.

ސަރުކާރުން އިއްޔެ ފެށި "ސާފު ރާއްޖެ، އަހަރެންގެ ވެސް ޒިންމާ" އަކީ ސިލްސިލާ ގޮތެއްގައި ކުރިއަށް ގެންދަން ނިންމާފައިވާ ޕްރޮގްރާމެކެވެ. އެ ޕްރޮގްރާމަށް އެންމެންގެ އެއްބާރުލުމަށް ރައީސް އިބްރާހިމް މުހައްމަދު ސޯލިހު ވަނީ އެދިވަޑައިގެންފަ އެވެ.

މުޅި ރާއްޖެ ސާފުކުރުމަށް އަމާޒުކޮށް ހިންގާ ހަރަކާތުގައި މިދިޔަ އަހަރުގެ ޑިސެމްބަރު މަހު މާލެ ސާފުކޮށް 20 ޓަނަށް ވުރެ ގިނަ ކުނި ނަގާފައިވެ އެވެ.