ކާދަރު ހާނަށް ޕަދްމާޝްރީ އެވޯޑް ދޭން ނިންމައިފި

މިދިޔަ މަހު މަރުވި ކުރީގެ މަޝްހޫރު އެކްޓަރު ކާދަރު ހާން އިންޑިއާގެ ސިނަމާ އަށް ކޮށް ދިން ހިދުމަތްތަކުގެ އަގު ވަޒަންކޮށް، އިންޑިއާގެ ސަރުކާރުން ޕަދްމާ ޝްރީ އެވޯޑް ދޭން ނިންމައިފި އެވެ.

ހޮނިހިރު ދުވަހު ފާހަގަކުރި އިންޑިއާގެ 70 ވަނަ ޖުމްހޫރީ ދުވަހާ ގުޅިގެން ޕަދްމާ އެވޯޑް މި އަހަރު ދޭން އިއުލާން ކުރި މީހުންގެ ތެރޭގައި އެކި ދާއިރާތަކުން ފާހަގަކޮށްލެވޭ 113 މީހަކު ހިމެނެ އެވެ. އިންޑިއާ ސަރުކާރުން ދޭ އެންމެ މަތީ އެވޯޑްގެ ތެރޭގައި ހިމެނޭ ޕަދްމާގެ ތިން ދަރަޖައެއް ހިމެނެ އެވެ. އެއީ ޕަދުމާވި ބުޝަން، ޕަދުމާ ބުޝަން އަދި ޕަދުމާ ޝްރީ އެވެ.

އުމުރުން 84 އަހަރުގައި މަރުވި ކާދަރޭގެ ނަން އޭގެ ތެރޭގައި ހިމެނިގެން ދިޔަ އިރު، އެ އެވޯޑް ނުލިބި ވަނިކޮށް އޭނާ ވަކިވެގެން ދިއުމުން ބޮލީވުޑްގެ ވަރަށް ގިނަ ފަންނާނުން އެކަމާ ކަންބޮޑުވުން ފާޅުކުރި އެވެ.

ކާދަރޭއަކީ އިންޑިއާގެ ސިނަމާގެ އެންމެ ވަރުގަދަ ޝަހުސިއްޔަތުގެ ތެރެއިން ވަރަށް ފާހަގަކޮށްލެވުނު ފަންނާނެކެވެ. އޭނާ ވަނީ 300 އަށް ވުރެ ގިނަ ފިލްމު ކުޅެފަ އެވެ.

ކާދަރޭއާ އެކު މި އަހަރު ޕަދްމާ ޝްރީ އެވޯޑް ލިބޭ ބޮލީވުޑްގެ ފަންނާނުންގެ ތެރޭގައި އެކްޓަރު މަނޯޖްބަޖްޕާއީ އާއި ނެށުންތެރިޔާ އަދި އެކްޓަރު/ޑައިރެކްޓަރު ޕްރަބޫދޭވާ ވެސް ހިމެނެ އެވެ.

މީގެ އިތުރުން އެވޯޑް ލިބޭ ފަންނާނުންގެ ތެރޭގައި މަޝްހޫރު މިއުޒިޝަން އަދި ލަވަކިޔުންތެރިޔާ ޝަންކަރު މަހާދޭވަން ވެސް ހިމެނެ އެވެ. އޭނާ އަށް އެވޯޑް ލިބޭކަން އެނގުމާ އެކު ޝަންވަރު ވަނީ އެވޯޑް އޭނާ އަށް ހައްގުވާ ވަރަށް މިއުޒިކީ ޕާޓްނަރުން ކަމަށްވާ އިހްސާނާއި ލޯއި އަށް އެވޯޑް ލިބެން ޖެހޭ ކަމަށް ބުނެފަ އެވެ.

އެތައް ފިލްމަކަށް މިއުޒިކް ހަދައި ދީފައިވާ ޝަންކަރު-އިހްސާން-ލޯއިއަކީ އެކީގައި މަސައްކަތް ކުރާ މަޝްހޫރު ތިން މީހުންނެވެ.

މީގެ އިތުރުން ފިލްމީ ފަންނާނުންގެ ތެރެއިން އިންޑިއާގެ މަލަޔާޅަމް ތަރި އެކްޓަރު މޯހަންލާލް އަށް ޕަދުމާ ބުޝަން އެވޯޑް ދޭން ވަނީ ނިންމައިފަ އެވެ.

އެވޯޑްތައް ފަންނާނުންނާ ހަވާލު ކުރަން ބާއްވާ ކުލަގަދަ އަދި ހާއްސަ ހަފުލާ އޮންނާނީ އިންޑިއާގެ ރިޔާސީގަނޑުވަރު ރާޝްތުރަޕަތީ ބަވަންގައި އަންނަ މާޗް ނޫނީ އެޕްރިލް މަހުގެ ތެރޭގަ އެވެ.