"ވީރް ޒާރާ"އަށް 20 އަހަރު ފުރުމުން އަނެއްކާވެސް ސިނަމާ އަށް

ބޮލީވުޑްގެ ކާމިޔާބު ފިލްމު "ވީރް ޒާރާ" އަށް 20 އަހަރު ފުރުމުގެ މުނާސަބަތުގައި އެ ފިލްމު މިއަދު ރީ-ރިލީޒްކުރަން ނިންމައިފި އެވެ.

ޝާހްރުކް ޚާން އާއި ޕްރިތީ ޒިންތާ ލީޑު ރޯލު ކުޅުނު ލޯބީގެ އަސަރުގަދަ ފިލްމު "ވީރް ޒާރާ" ޕްރިމިއާކުރީ ނޮވެމްބަރު 12، 2004 ގަ އެވެ. "ވީރް ޒާރާ" އަކީ އޭރު ނުކުތް ބޮލީވުޑްގެ އެންމެ ކާމިޔާބު ފިލްމުތަކުގެ ތެރޭގައި ހިމެނުނު، އަދި ގިނަ ބައެއް ހިތްތަކާ ކުޅެލައި، ލޯބި ހޯދި ފިލްމެކެވެ. އަދި އެ އަހަރު އެންމެ ބޮޑު އާމްދަނީއެއް ވެސް ހޯދި ބޮލީވުޑްގެ ފިލްމެވެ.

އެންމެ 23 ކްރޯޑް ރުޕީސް (2.7 މިލިއަން ޑޮލަރު)ގެ ބަޖެޓަކުން ހެދި މި ފިލްމަށް ވަނީ ބޮކްސް އޮފީހުގައި 98 ކްރޯޑް ރުޕީސް (11.6 މިލިއަން ޑޮލަރު) ލިބިފަ އެވެ. އޭރު ފިލްމުތަކަށް ލިބޭ އާމްދަނީގެ ނިސްބަތުން ބަލާ ނަމަ އެއީ ވަރަށް ބޮޑު އަދަދެކެވެ.

މި ފިލްމަށް 20 އަހަރު ފުރޭތީ، ފިލްމު ގެނެސްދިން ޔަޝް ރާޖް ފިލްމްސް އިން ވަނީ ފިލްމު އަނެއްކާވެސް ސިނަމާތަކުގައި ދައްކަން ނިންމައިފަ އެވެ. އަދި އިންޑިއާގެ އިތުރުން ދުނިޔޭގެ އެކި ގައުމުތައް ހިމެނޭ ގޮތަށް 600 ސްކްރީނުގައި މި ފިލްމު އަޅުވަން ވަނީ ތާވަލުކޮށްފަ އެވެ.

މިފަހަރު މި ފިލްމު އަލަށް ދައްކާ ގައުމުތަކުގެ ތެރޭގައި ސައުދީ އަރަބިއްޔާ އާއި އޮމާން އަދި ގަތަރު ހިމެނެ އެވެ.

ކުރީގެ ކުޅަދާނަ ޑައިރެކްޓަރު ޔަޝް ޗޯޕްރާ ގެނެސްދިން މި ފިލްމުގައި ދައްކަނީ އިންޑިއާގެ ސިފައިންގެ ތެރޭގައި މަސައްކަތްކުރާ މީހަކާއި ޕާކިސްތާނުގެ އަންހެން ކުއްޖަކު ދިމާވެ، އެ ދެމީހުންގެ މެދުގައި ލޯބީގެ ގުޅުމެއް އުފެދޭ ހިސާބުން ހިނގާ ކަންތައްތަކެވެ. އެ އަންހެން ކުއްޖާއަކީ ޕާކިސްތާނުގެ ނުފޫޒުގަދަ ސިޔާސީ ލީޑަރެއްގެ ދަރިއެކެވެ. އަންހެން ކުއްޖާގެ އާއިލާއިން އެ ގުޅުމަށް ނުރުހެ އެވެ. އެހެންވެ، އެ ދެމީހުން ދުރުކުރުމަށް ކުރާ ކަންކަމުގެ ތެރޭގައި ހިނގާ އެތައް ކަމެއް މި ފިލްމުގައި ދައްކަ އެވެ.

"ވީޒް ޒާރާ"ގެ ސްކްރީޕްލޭ ލިޔުނީ ޔަޝް ޗޯޕްރާގެ ދަރިފުޅު އަދިތުޔަ ޗޯޕްރާ އެވެ.

ޝާހު އާއި ޕްރިތީއާ އެކު މި ފިލްމުގެ މުހިންމު ރޯލުތައް ކުޅުނީ ރާނީ މުކަރްޖީ، އަމީތާބް ބައްޗަން، ހެމާ މާލިނީ، ދިވްޔާ ދައްތާ، ބޯމަން އިރާނީ، ކިރަން ކޭރް، އަނުޕާމް ކޭރް، މަނޯޖް ބަޖްޕާއީ އަދި ޒޮހްރާ ސޭގަލް އެވެ.