ހާބަރު ފުޑް ކޯޓުގައި ސިނގިރޭޓު ބުއިން ނުހުއްޓުވިގެން ބޮޑު ބޯޑުތަކެއް ހަރުކޮށްފި

ދުންފަތުގެ އިސްތިއުމާލު ކުރުން މަނާކޮށްފައިވާ އޮތަސް ހާބަރު ފުޑް ކޯޓުތަކުގައި ސިނގިރޭޓު ބުއިން އާންމު ވެފައިވާތީ، އިންޒާރުގެ ބޯޑުތަކެއް ހެލްތު ޕްރޮޓެކްޝަން އެޖެންސީ އާއި އެސްޓީއޯ ގުޅިގެން ބަހައްޓައިފި އެވެ.

ހާބަރު ސަރަހައްދުގައި އެސްޓީއޯއިން ތަރައްގީކޮށްފައިވާ 26 ފުޑް ކޯޓުގައި ދުންފަތުގެ އިސްތިއުމާލު ކުރުން މަނަ އެވެ. އެގޮތަށް ނިންމީ އާއިލާތަކަށް އުފާވެރިކަމާ އެކު އުޅެވޭނެ މަހައުލަކަށް ފުޑް ކޯޓްތައް ހަދަން ކަމަށް އެސްޓީއޯއިން ބުނެފައިވެ އެވެ.

އެކަމަކު ތަން ހުޅުވުމާ އެކު ހުރިހާ ހިސާބެއްގައި ވެސް ދުންފަތުގެ އިސްތިއުމާލް ކުރެ އެވެ.

އެޗްޕީއޭގެ ޑެޕިއުޓީ ޑިރެކްޓަރު އަދި ޓޮބޭކޯ ކޮންޓްރޯލް ބޯޑުގެ ތަރުޖަމާނު ހަސަން މުހައްމަދު މިއަދު ވިދާޅުވީ އާ ބޯޑުތައް ހަރުކުރީ ދުންފަތާ ބެހޭ ގަވައިދަށް ބަދަލެއް އައިސްގެން ނޫން ކަމަށެވެ. އެކަމަކު ދުންފަތުގެ އިސްތިއުމާލު ކުރުން މަނާ ސަރަހައްދެއްގައި އެކަން ކުރާތީ އެ ބޯޑުތައް ފަސޭހައިން މިހާރު ފެންނާނެ ކަމަށް އޭނާ ވިދާޅުވި އެވެ.

"އަޅުގަނޑުމެންނާއި އެސްޓީއޯއިން ގުޅިގެން ބޮޑެތި ބޯޑުތައް ހަރުކުރީ ގިނަ މީހުންނަށް ފެންނާނެ ކަމުގެ އުންމީދުގައި. ކުރިން ވެސް އެ ސަރަހައްދުގައި ސިނގިރޭޓު ބުއިން މަނާ. ނަމަވެސް ބައެއް މީހުން އެތަނުގައި ދުންފަތުގެ އިސްތިއުމާލު ކުރޭ،" ހަސަން ވިދާޅުވި އެވެ.

"ފުޑް ކޯޓަކީ ބަންދުވެފައިވާ ސަރަހައްދަކަށް ވާތީ އެތަނަށް ދާ ދުންފަތުގެ އިސްތިއުމާލް ނުކުރާ ފަރާތްތަކަށް އުނދަގޫވޭ."

ފުޑް ކޯޓަކީ މުޅިން ހުޅުވާލައިފައި އޮންނަ ތަނަކަށް ވާތީ އެތަނުގައި ދުންފަތުގެ އިސްތިއުމާލްކުރަން، ދުންފަތް ކޮންޓްރޯލްކުރުމާ ބެހޭ ގާނޫނުގެ ދަށުން ހުއްދައެއް ނުދެވެ އެވެ. އެ ގާނޫނުގައިވާ ގޮތުން ކެއިންބުއިމުގެ ހިދުމަތް ދޭ ތަނެއްގައި ދުންފަތުގެ އިސްތިއުމާލް ކުރެވޭނީ އެހެން މީހުންނަށް ދުމުގެ އަސަރުނުކުރާ ގޮތަށް ހާއްސަކޮށްފައި ހުންނަ ވަކި ބައެއްގަ އެވެ.

ގާނޫނާއި ގަވައިދުގައި ވާ ގޮތުން ދުންފަތުގެ އިސްތިއުމާލު ކުރުން މަނާ ތަނެއްގައި އެކަން ކުރާ މީހެއް 500 ރުފިޔާއިން ޖޫރިމަނާ ކުރެވެ އެވެ. އެކަމަކު އެ ޖޫރިމަނާއަކީ ހަމައެކަނި ނަމެއްގައި އޮންނަ އެއްޗެކެވެ.