އޮމާން އެއާއިން ރާއްޖެއަށް އަލުން ދަތުރުތައް ފަށައިފި

އޮމާން އެއާއިން ރާއްޖެ އަށް ކުރަމުން އައި ދަތުރުތައް ހުއްޓާލާފައި އޮތުމަށް ފަހު އަލުން ފަށައިފި އެވެ.

އޮމާން އެއާގެ ދަތުރުތައް ރާއްޖެ އަށް އަލުން ފެށުމުގެ ގޮތުން އޮމާންގެ ވެރިރަށް މަސްކަޓް އިން ރާއްޖެ އަށް އައި ފުރަތަމަ ފްލައިޓް ވެލާނާ އިންޓަނޭޝަނަލް އެއާޕޯޓުގައި ޖެއްސީ އިއްޔެ މެންދުރުފަހު 1:30 ގައެވެ. އަދި ރާއްޖެއިން އޮމާނަށް ދިޔަ ފްލައިޓް ވެލާނާ އިންޓަނޭޝަަނަލް އެއާޕޯޓުން ފުރީ ރޭ އިރު އޮއްސި 6:50 ގައެވެ.

ރާއްޖެ އަށް ދަތުރުކުރަން އޮމާން އެއާއިން ބޭނުންކުރަމުން އަންނަނީ "ބޯއިން 737 މެކްސް " މަރުކާގެ މަތިންބޯޓުތަކެކެވެ. އެ ބޯޓްތަކުގައި ޖުމްލަ 162 ސީޓް ހުރެއެވެ. އެއީ ބިޒްނަސް ކްލާސް 12 ގޮނޑި އާއި އިކޮނޮމީ ކްލާސް 150 ގޮނޑި އެވެ. އޮމާން އެއާއިން ބުނީ އެ މަރުކާގެ ބޯޓު ބޭނުން ކުރުމަކީ ހިދުމަތް ލިބިގަންނަ މީހުންގެ ހިތްހަމަ ޖެއްސުމަށް އެ އެއާލައިނުން ކުރާ މަސައްކަތް ދައްކުވައިދޭ ކަމެއް ކަމަށެވެ.

އޮމާން އެއާއަކީ ސުލްޓަނޭޓް އޮފް އޮމާންގެ ގައުމީ އެއާލައިނެވެ. އެ އެއާލައިންގެ ދަތުރުތައް ރާއްޖެ އަށް ފުރަތަމަ ފެށީ 2009 ވަނަ އަހަރު އެވެ. އޭގެ ފަހުން އެ އެއާލައިންގެ ދަތުރުތައް އެކި ފަހަރު މަތިން ހުއްޓާލާފައި ވެއެވެ. އެގޮތުން އެންމެ ފަހުން ދަތުރުތައް ހުއްޓާލީ 2016 ވަނަ އަހަރު އެވެ.