"އަސްލު ކިހިނެއް؟": އުދާސްތައް ބޭރުކޮށްލާ!

ޖެހިލުންވުމެއް ނެތި ފިކުރުތަކާއި ކަންބޮޑުވުންތައް އެހެން މީހުންނާ ފަސޭހަ އިން ހިއްސާކޮށްލެވޭނެ ގޮތެއް ހޯދައިދީފިއްޔާ އެތައް ބައެއްގެ ނަފްސާނީ ދުޅަހެޔޮކަމަށް އެހީތެރިވެވިދާނެ އެވެ.--މޯލްޑިވިއަން ރެޑް ކްރެސެންޓް (އެމްއާރުސީ)ގެ ވިލިމާލޭ ޔުނިޓު، ވިލިޖޯލިން "އަސްލު ކިހިނެއް؟" ތައާރަފްކުރީ މި ވިސްނުމުގެ ތެރެއިންނެވެ.

ނަފްސާނީ ބަލިތަކުގެ ދުވަހާ ގުޅުވައިގެން މިދިޔަ ބުދަދުވަހު ލޯންޗުކުރި ވެބްސައިޓުގައި ކޮންމެ މީހަކަށް ވެސް އެ މީހެއްގެ އުދާސްތައް ބަންޑުންކޮށްލެވިދާނެ އެވެ. ވިލިޖޯލި ޓީމުން ދެކެނީ، ކާކުކަން ނޭނގޭ ގޮތަށް މިފަދަ ކަންކަން ހިއްސާކުރަން ފުރުސަތު ލިބުން ވަރަށް މުހިއްމު ކަމަށެވެ.

"ޒާތީ ނުވެ، ކޮންމެ ވާހަކައެއް ވެސް ދައްކަންވީ. މިއީ ހަގީގީ އިހުސާސްތައް ފާޅުކޮށްލެވޭނެ، ޖޯލިފައްޗެއް ނުވަތަ ފިނިމައިޒާނެއް ކަހަލަ ތަނެއް. ތެދަށް ހުރިހާ ވާހަކައެއް ކިޔައިދެވޭނެ. އެ ކަންކަން ހިއްސާކުރާނީ އަޑުއަހާ ހިތުން ތިބި ބަޔަކާ [ވެބްސައިޓް ބޭނުންކުރާ އެހެން މީހުން].،" ވިލިޖޯލީގެ ހަރަކާތްތަކުގައި އިސްކޮށް އުޅުއްވާ އެމްއާރުސީގެ ވޮލަންޓިއަރު މުހައްމަދު ޝިހާބު (ދަމާސް ޝިހާބު) ވިދާޅުވި އެވެ.

"އަދި އެ ވާހަކައެއް ދެއްކީމާ ވާނެ ގޮތަކާ ދޭތެރޭ ވިސްނަން ނުޖެހި ކޮންމެ އެއްޗެއް ވެސް ކިޔައިދެވޭނެ."

"ހަލްސް އެންޑް ހައުންޑްސް" ޑިޒައިން ކުންފުނިން ހިލޭ ހަދައިދީފައިވާ "އަސްލު ކިހިނެއް؟" ޕްލެޓްފޯމް އާދައިގެ ގޮތަކަށް ފެށި ނަމަވެސް އިތުރަށް ތަރައްގީކުރާނެ ކަމަށް ވިލިޖޯލި ޓީމުން ބުނެ އެވެ. ޝިހާބު ވިދާޅުވި ގޮތުގައި ނަފްސާނީ ބަލިތަކާ ބެހޭ މައުލޫމާތު ޝާއިއުކޮށް ނަފްސާނީ ޚިދުމަތްތައް ހޯދަން ދާނެ ތަންތަނުގެ މައުލޫމާތު ހިމަނާނެ އެވެ. އަދި އެކި މައުލޫއުތައް ވަކިވަކިން ފެންނާނެ ގޮތް ވެސް ހަދާނެކަން އޭނާ ފާހަގަކުރެއްވި އެވެ. އެއީ އެކި ދާއިރާތަކުން މީހުންނަށް ދިމާވާ ކަންކަން އެނގޭނެ ގޮތަށެވެ.

"ފަންނީ އަދި ޕްރޮފެޝަނަލް މާހިރުންގެ ޓީމަކުން ތިން މަސް ދުވަސް ވަންދެން ބަލާނެ މީހުން މި ޕްލެޓްފޯމް ބޭނުންކުރަނީ ކިހިނެއްކަން. އެއަށް ފަހު ގެންނަން ޖެހޭ ބަދަލުތައް ގެންނާނެ،" ޝިހާބު ވިދާޅުވި އެވެ.

ވިލިޖޯލި ޓީމުގެ އުއްމީދަކީ "އަސްލު ކިހިނެއް؟" ވެބްސައިޓަކީ ރާއްޖޭގައި ނަފްސާނީ ދުޅަހެޔޮކަމުގެ ހާލަތު އޮތް ގޮތް ވަޒަންކޮށްލަން އެހީތެރިވެދޭ ޕްލެޓްފޯމަކަށް ވެސް ވެގެންދިޔުމެވެ.

"މި ޕްލެޓްފޯމަކީ ދިރާސާކުރާ މީހުންނާއި ޚިދުމަތްތައް ފޯރުކޮށްދޭ މީހުންނާއި ޕޮލިސީތައް ހަދާ މީހުންނަށް ވެސް ބޭނުންތެރި އެއްޗަކަށް ވެގެންދާނެ،" ޝިހާބު ވިދާޅުވި އެވެ.