ސިންގަޕޫރުގެ ފެންވަރު ރަނގަޅު އައުލް ކޮފީ ރާއްޖެއަށް

މިއީ ކޮފީއަށް ލޯބިކުރާ ދިވެހިންނަށް މުޅިން ތަފާތު ރަހައެއް ލިބޭނެ ކޮފީ އެކެވެ. މީގެ ކޮފީ ތައްޓެއް ތައްޔާރުކުރާނީ އެންމެ އިހުޒަމާނުގައި ވެސް އޭޝިއާގައި ކޮފީ ތައްޔާރުކުރުމަށް ބޭނުންކުރާ ފޮތި ފުރޭނި ފިލްޓާ ބޭނުންކުރުން އަސްލަކަށް ބަލައިގެންނެވެ. އެއީ ކޮފީ ފިލްޓާ ކުޑަ ބޭގެއް ބޭނުންކޮށްގެންނެވެ. މިގޮތަށް ފިލްޓާ ބޭގެއް ބޭނުންކުރުމުގެ ސަބަބުން ކެރަމަލައިޒްކޮށްފައި ހުންނަ ކޮފީ ބީންސްގެ ރަހަ އެންމެ ފުރިހަމަ ގޮތުގައި އެރޯމާއާ އެކު ކޮފީތަށީގައި ލާނެ އެވެ. މިއީ ބީއެޗްއެމް ޓްރޭޑާސް އިން ރާއްޖެއަށް އަލަށް ތައާރަފްކުރި ސިންގަޕޫރުގެ މަޝްހޫރު "އައުލް ކޮޕީތިއަމް ރޯސްޓް" އަދި "ގްރައުންޑް ކޮޕީ" އެވެ.

އައުލް ބްރޭންޑް ރާއްޖެއަށް އެތެރެކުރާ އަދި ޑިސްޓްރިބިއުޓްކުރާ ހަމައެކަަނި ކުންފުނި، ބީއެޗްއެމް ޓްރޭޑާސް އިން އައުލް ކޮޕީތިއަމް ރޯސްޓް އެންޑް ގްރައުންޑް ކޮފީ ތައާރަފްކޮށް، އާންމުކޮށް ދައްކާލަން ހުޅުމާލެ ސެންޓްރަލް ޕާކުގައި އިއްޔެ ހަވީރު ވަނީ ހާއްސަ ހަރަކާތެއް ކުރިޔަށް ގެންގޮސްފަ އެވެ. އެތަނުގައި ކުރިޔަށް ގެންދިޔަ ހަރަކާތުގައި އާންމުންނަށް ހިލޭ ކޮފީ ބަހަމުން ދިޔައީ އެކަމަށް ހާއްސަކޮށް ތައްޔާރުކޮށްފައިވާ ކޮފީ ގާޑިއާއަކުންނެވެ.

"ރާއްޖޭގައި އައުލް ކޮފީ ޕްރޮޑަކްސްގެ އެކްސްކްލޫސިވް ޑިސްޓްރިބުއުޓާގެ ހައިސިއްޔަތުން، އަޅުގަނޑުމެން ވަރަށް އުފާކޮށް ފަހުރުވެރިވަން ފިލްޓާ ބޭގްއަކުން ފަސޭހަކަމާ އެކު ކޮފީ ތައްޔާރުކޮށްލެވޭ ޕްރޮޑަކްޓެއް ފުރަތަމަ ފަހަރަށް ރާއްޖޭގެ ކޮންޒިއުމާސްއަށް ތައާރަފް ކުރެވުނީތީ. އަދި ހުރިހާ ބޭފުޅުންނަށް ވެސް ބާރުއަޅަން ހުރިހާ ފްލޭވާސްތައް ރަހަބަލާން އަދި މިތަފާތު ކޮޕީތިއަމް ކޮފީ ތަޖުރިބާކޮށްލަން،" ބީއެޗްއެމް ޓްރޭޑާސްގެ މާކެޓިން މެނޭޖަރު އިބްރާހިމް ޝަރީފް ވިދާޅުވި އެވެ.

ބީއެޗްއެމް އިން ބުނީ އައުލްގެ ބައިނަލްއަގުވާމީ އުފެއްދުންތަކުގެ ތެރޭގައި އޭޝިއާ އަށް ހާއްސަ އުފެއްދުންތަކުގައި ބޭނުންކޮށްފައި ވަނީ ފްރީޒްކޮށް ހިއްކައި ނުވަތަ ސްޕްރޭއިން ހިއްކާފައި ހުންނަ ކޮފީގެ ބަދަލުގައި ތާޒާކަމާ އެކީ ގްރައުންޑްކޮށްފައިވާ ކޮފީ ބޭނުންކޮށްގެން ކަމަށެވެ.

"މިކޮފީގައި ގްރައުންޑްކޮށްފައިވާ އަރަބިކާ އަދި ރޮބަސްޓާ ކޮފީ ބީންސްތައް ހުންނާނީ އެންމެ އިހުޒަމާނުގައި ވެސް ކޮފީ ކެރަމަލައިޒްކުރާ ގޮތަށް ޗާކޮއިލް ބޭނުންކޮށްގެން ހަކުރާ އެކު ރޯސްޓްކޮށްފައި. ފަސޭހަކަމާ އެކު ތައްޔާރުކުރޭނެ ގޮތަށް މިކޮފީ ބަންދުކޮށްފައި ހުންނަނީ ހާއްސަ ފިލްޓާ ބޭގްސްގައި. މިފިލްޓާ ބޭގްސްގައި އެ ކޮފީއެއްގެ ރަހައަކާއި ގުޅޭ ގޮތުން ވަކި މިނަކަށް ކްރީމް އަދި ހަކުރު ވެސް ގްރައުންޑް ކޮފީއާ އެކު މިކްސްކޮށްފައި ހުންނާނެ،" އެ ކޮފީއާ ބެހޭ ގޮތުން ބީއެޗްއެމް އިން ބުންޏެވެ. ބީއެޗްއެމް އިން ތައާރަފްކުރި އައުލް ކޮޕީތިއަމް ރޯސްޓް އަދި ގްރައުންޑް ކޮފީގެ ސެލެކްޝަންގައި ހިމެނޭ "ކޮޕީ" އަކީ ކްރީމާއި ހަކުރާ އެކު ހިމެނޭ ކޮފީ އެކެވެ. އަދި "ކޮޕީ-އޯ ގައޯ" އަކީ ކަޅުކޮފީ ހަކުރާ އެކު ހިމެނޭ ކޮފީ އެކެވެ. މީގެ އިތުރުން "ކޮޕީ ސިއުޑައި"އަކީ ކްރީމާ އެކު ހަކުރު މަދުން އަޅާފައި ހުންނަ ކޮފީ އެކެވެ.

"އައުލް ކޮޕީތިއަމް ރޯސްޓް ހުންނާނީ ފަސޭހަކަމާ އެކު ކުޑަ ވަގުތުކޮޅެއްގެ ތެރޭގައި ތައްޔާރުކުރެވޭގޮތަށް ފިލްޓާ ބޭގްސްގައި ޕެކޭޖުކޮށްފައި. ތައްޔާރުކުރުމަށް ހޫނު ފެންތައްޓަކަށް ފިލްޓާ ބޭގު ލުމަށްފަހު ތިން މިނެޓް ބެހެއްޓުމަށްފަހު ކުޑަކޮށް ގިރާލުމުން ރަހަމީރު ކޮފީތައްޓެއް ލިބޭނެ،" އެ ފިހާރައިން ބުންޏެވެ.

ކޮފީގެ އާ ރަހައާ އެކު ބީއެޗްއެމް ޓްރޭޑާސް އިން ވަނީ "ކެޗް ދަ އައުލް އެންޑް ވިން ފްރީ ގުޑީސް"ގެ ނަމުގައި ސޯޝަލް މީޑިއާ މުބާރާތެއް ވެސް ފަށައިފަ އެވެ. މި ހަރަކާތް މެދުވެރިކޮށް ކޮފީ އިވެންޓަށް އަންނަ ފަރާތްތަކުން އެތަނުގައި ނަގާ ފޮޓޯ ފޭސްބުކް ނުވަތަ ޓުވިޓާގައި OWLCoffeeMV ހޭޝްޓެގާ އެކު ޕޯސްޓްކޮށްގެން އައުލް ބްރޭންޑްގެ އިނާމެއް ލިބުމުގެ ފުރުސަތު އޮންނާނެ ކަމަށް އެ ފިހާރައިން ބުންޏެވެ. ސޯޝަލް މީޑިއާގެ މުބާރާތް ކުރިޔަށްދާނީ މިމަހުގެ 13ގެ ނިޔަލަށެވެ. އައުލް ކޮފީ ގާޑިއާ މާލޭގައި ވެސް ފިނިކޮށް އަދި ހޫނުކޮށް ހިލޭ ކޮފީ ރަހަބެލުމުގެ ހިދުމަތާ އެކު ސުނާމީ ބިނާ ކައިރީ ބޮޑުތަކުރުފާނު މަގުގައި މިއަދު ހަވީރު 4:00އިން 6:00އަށް އަދި މިމަހުގެ12 ވަނަ ދުވަހު ވިލިމާލޭގައި ވިލިމާލެ ޓާމިނަލް ކައިރިގައި ހަވީރު 4:00އިން 6:00އަށް އަދި 13 ވަނަ ދުވަހު މާލެ ބޮޑުތަކުރުފާނު މަގުގައި ވިލާ ކޮލެޖް ކައިރިގައި ރޭގަނޑު 8:00އިން 10:00އަށް ކުރިޔަށް ގެންދާ ގޮތަަށް ވަނީ ހަމަޖައްސައިފަ އެވެ.

ބީއެޗްއެމް އިން ބުނީ އައުލް ކޮޕީތިއަމް ރޯސްޓް އަދި ގްރައުންޑް ކޮފީގެ އެކި ރަހަތައް ކަމަށްވާ ކޮޕީ އަދި ކޮޕީ ސިއުޑާގެ ކާޓަންއެއް 1،080ރ. އަށް އަދި ހޯލްސޭލް ކުރާއިރު ކޮޕީއޯގެ ކާޓަންއެއް 1،180ރ. އަށް ލިބެންހުންނާނެ ކަމަށެވެ. އައުލް ކޮޕީތިއަމް ރޯސްޓް އަދި ގްރައުންޑް ކޮފީ ރާއްޖޭގެ އެކި ސުޕާމާކެޓްތަކުންނާއި ފިހާރަތަކުން އިއްޔެއިން ފެށިގެން ދަނީ ވިއްކަމުންނެވެ.