ބޯހިޔާވަހިކަން ހެޔޮ އަގެއްގައި ފޯރުކޮށްދިނުމަށް ރާއްޖެ އަށް ސައުދީން އެހީވާން ނިންމައިފި

ރާއްޖޭގައި ހެޔޮ އަގެއްގައި ބޯހިޔާވަހިކަން ފޯރުކޮށްދިނުމަށް ސައުދީ އަރަބިއްޔާ އިން އެހީވުމަށް އެމްއޯޔޫ އެއްގައި މިއަދު ސޮއިކޮށްފި އެވެ.

ރައީސް އޮފީހުގައި، ދެ ގައުމުގެ ކަމާ ގުޅޭ އިސް ބޭފުޅުން މި އެއްބަސްވުމުގައި ސޮއިކުރެއްވީ، ރާއްޖެ ވަޑައިގެންނެވި، ސައޫދީ އަރަބިއްޔާގެ އިންޓީރިއާ މިނިސްޓަރު އަބްދުލްއަޒީޒް ބިން ސައުދު ބިން ނާއިފް، ރައީސް އަބްދުﷲ ޔާމީނާ ބައްދަލު ކުރެއްވުމަށް ބޭއްވި ރަސްމިއްޔާތުގެ ތެރެއިންނެވެ.

ދިވެހި ސަރުކާރާއި ސައޫދީ ސަރުކާރާ ދެމެދު އެއްބަސްވެފައި ވަނީ ރާއްޖޭގައި ހެޔޮއަގެއްގައި ބޯހިޔާވަހިކަން ފޯރުކޮށްދިނުމަށާއި މަސްވެރިކަން ކުރިއެރުވުމަށް ސައުދީ ފަންޑުން އެހީތެރިވުމަށެވެ. މި އެހީއާ ގުޅޭ އެއްވެސް ތަފްސީލެއް ދެ ސަރުކާރަކުން ވެސް އަދިއެއް ހާމައެއް ނުކުރެ އެވެ.

އަގު ހެޔޮ ބޯހިޔާވަހިކަން ފޯރުކޮށްދިނުމާ ގުޅޭ އެމްއޯޔޫގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު އަހުމަދު މުނައްވަރެވެ. ސައުދީ ފަންޑުގެ ފަރާތުން ސޮއިކުރެއްވީ ބޯޑުގެ ޗެއާމަން އަހުމަދު ބިން އަގީލް އަލް ޙަތީބެވެ.

އެއްބަސްވުމުގައި ސޮއި ކުރެއްވުމަށް ފަހު، ރައީސް ޔާމީނާއި ސައޫދީގެ މިނިސްޓަރު ވަނީ ދެ ގައުމުގެ ވާހަކަތައް ބާއްވަވައިފަ އެވެ.

ސައުދީގެ އިންޓީރިއާ މިނިސްޓަރު ރާއްޖެ ވަޑައިގެންނެވީ މިދިޔަ ހުކުރު ދުވަހު އެވެ. ޝާހީ އާއިލާގެ މެމްބަރުންނާއެކު ކުރެއްވި އެދަތުރުގައި ރާއްޖޭގެ ރިސޯޓެއްގައި ވަނީ ޗުއްޓީ ހޭދަ ކުރައްވައިފަ އެވެ.