މެޑިޓެރޭނިއަން ޑައެޓަށް ފަހު ނޯޑިކް ޑައިޓް

މެޑިޓެރޭނިއަން ޑައިޓަކީ ސިއްހީ ފައިދާތައް ބޮޑު އެއްޗެއްގެ ގޮތުގައި އޮންނަނީ މަޝްހޫރުވެފަ އެވެ. ނޯޑިކް ޑައިޓަކީ ވެސް ހަމަ މި ފާޑެއްގެ ޑައެޓެކެވެ.

ސިއްހަތަށް ބަލައިގެން ދުޅަހެޔޮ ދިރުއުޅުމަކަށް ރުޖޫއަވާން ބޭނުން ނަމަ މެޑިޓެރޭނިއަން ނުވަތަ ނޯޑިކް އިހުތިޔާރު ކުރެވިދާނެ އެވެ. ނޯޑިކް ޑައިޓްގެ ނަން ދީފައި މި ވަނީ ޑެންމާކާއި އައިސްލޭންޑާއި ފިންލޭންޑާއި ނޯވޭ އާއި ސްވިޑްން ފަދަ ގައުމުތައް ހިމެނޭ ސަރަހައްދަށް ނިސްބަތްކޮށްފަ އެވެ.

މެޑިޓެރޭނިއަން ޑައިޓާ އެއްގޮތަށް ނޯޑިކް ވެސް ބޮޑަށް ބިނާ ވަނީ ހޯލް ގްރެއިން އާއި ތަކުކާރީ (ކެބެޖާއި ރޫޓް ވެޗެޓަބަލްސް/ ކެރޮޓް، އަލުވި، ރެޑިޝް ފަދަ ބާވަތްތައް) މޭވާ (ބެރީޒް) އާއި ފެޓީ ފިޝް (މެކަރަލް/ސޭމަން) ފަދަ ބާވަތްކުންނެވެ. އަދި މި ޑައިޓް ފޮލޯ ކުރާ ނަމަ ހަކުރު ގިނަ އެއްޗިއްސާއި ޖަންކް ފުޑް ކަހަލަ ބާވަތްތަކާ ދުރުވާން ޖެހޭނެ އެވެ.

ހަމައާ އެކު މަތީ މިންވަރަށް ފެޓްގެ ބާވަތްތައް އެކުލެވޭ ސޮސެޖާއި ބޭކަން ފަދަ ބާވަތްތަކަށް ވެސް ނޫނެކޭ ބުނަން ޖެހޭނެ އެވެ.

ނޯޑިކް ޑައިޓްގެ އެންމެ ހާއްސަ އެއް ސިފައަކީ ކާން ބޭނުން ކުރާ ތެޔޮ ވެސް ތަފާތުވުމެވެ. މެޑިޓެރޭނިއަން ޑައިޓްގައި އާންމުކޮށް ބޭނުންކުރާ އެއްޗަކީ ޒައިތޫނި ތެޔޮ ކަމަށް ވިޔަސް ނޯޑިކް ހާއްސަ ވަނީ ރޭޕްސީޑް ނުވަތަ ކެނޯލާ ތެލަށެވެ. ކާ ތަކެތި ތައްޔާރު ކުރަން މި ތެޔޮ ބޭނުން ކުރުމުން، ހަށިގަނޑުގައި އުފެދޭ ބޭޑް ކޮލެސްޓްރޯލްގެ މިންވަރު ވަރަށް ބޮޑަށް ދަށްކޮށްދެ އެވެ.

ނަތީޖާއަކީ ނޯޑިކް ޑައިޓަށް ތަބާވާ މީހުންނަށް ސްޓްރޯކާއި ހާޓްއެޓޭކް ފަދަ ނުރައްކާތަކުން ވެސް ސަލާމަތްވުމަށް ބާރު އަޅައި ދިނުމެވެ.

ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯ އިން ވެސް ބުނެފައިވާ ގޮތުގައި ނޯޑިކް ނުވަތަ މެޑިޓެރޭނިއަން ޑައިޓާ އެއްގޮތަށް ކެއުމުގެ ވައްޓަފާޅި ބަހައްޓާ ނަމަ ކެންސަރާއި ހަކުރު ބައްޔާއި ހިތުގެ ބަލިތަކުން ރައްކާތެރިކޮށްދެ އެވެ.