ލޯފަން ކުދިންގެ ޖަމިއްޔާ އަށް ދިރާގުން އެހީތެރިވަނީ

ލޯފަން މީހުންގެ ހައްގުގައި މަސައްކަތްކުރާ ޖަމިއްޔާ ބްލައިންޑް އެންޑް ވިޝުއަލީ އިމްޕެއާޑް ސޮސައިޓީ އޮފް މޯލްޑިވްސް (ބީވީއައިއެސްއެމް) އަށް ދިރާގުން ދޭ ހާއްސަ ޑިޖިޓަލް މުވާސަލާތުގެ ހިދުމަތްތަކެއް ކުރިޔަށް އޮތް އަހަރަށް ވެސް ދޭން ނިންމައިފި އެވެ.

ދިރާގުން އަންނަނީ 2016 ވަނަ އަހަރުން ފެށިގެން އެ ޖަމިއްޔާ އަށް ހިލޭ ހިދުމަތް ދެމުންނެވެ.

ރާއްޖޭގައި ފުޅާ ދާއިރާއެއްގައި މުއާސަލާތީ ހިދުމަތް ދޭ ކުންފުނިން ބުނީ އެ ހިދުމަތަކީ ދިރާގުން އެ ޖަމިއްޔާ އަށް ހާއްސަކޮށްގެން ޑިޒައިން ކޮށްފައިވާ ހިދުމަތްތަކެއް ކަމަށެވެ. އަދި އެ ހިދުމަތް މެދުވެރިކޮށް ބީވީއައިއެސްއެމްގެ މެންބަރުންނަށް ހިލޭ ފޯން މީޓިންގެ ހިދުމަތް ދޭނެ ކަމަށް އެ ކުންފުނިން ބުންޏެވެ.

އެ ޖަމިއްޔާއާ ހަވާލާދީ ދިރާގުން ބުނީ އެހެން އިޖްތިމާއީ ޖަމިއްޔާތައް ހިންގުމުގައި މެދުވެރިނުވާ ގިނަ ގޮންޖެހުންތައް ބީވީއައިއެސްއެމް އަށް ދިމާވާ ކަމަށެވެ.

"ޖަލްސާ ބާއްވާލަން ނުވަތަ އެންމެން އެއް ތަނަކަށް އެއްކޮށްގެން މަޝްވަރާ ކުރުމަކީ އެހާ ފަސޭހަކަމެއް ނޫން. ދިރާގުން މި ފޯރުކޮށްދޭ ހިދުމަތަކީ އެ ގޮތަށް ޖަލްސާތަކާއި ބައްދަލުވުންތައް ފަސޭހަ އިން ބާއްވާލެވޭ ގޮތަށް ގާއިމުކުރެވޭ ހާއްސަ ޑިޖިޓަލް ސްޕޭސްއެކެވެ،" ދިރާގުން ބުންޏެވެ.

އެ ކުންފުނިން ބުނީ އެ ހިދުމަތް މެދުވެރިކޮށް ޖަމިއްޔާގެ މެންބަރުން ޖަމިއްޔާގެ ޖަލްސާތައް ބޭއްވުމަށް ފަސޭހަވެ، މެންބަރުންގެ މެދުގައި އެކުވެރިކަމާއި ރަހްމަތްތެރިކަން ބަދަހިކުރަން ވަރަށް ބޮޑަށް ފަސޭހަވާނެ ކަމަށެވެ. އަދި އެ ޖަމިއްޔާގެ 200 އަށް ވުރެ ގިނަ މެމްބަރުންނަށް ބައްދަލުވުންތަކާއި ޖަލްސާތައް އެއް މާލަމެއްގައި ބައްދަލުވުމުގެ ދަތިކަން ދިމާވާއިރު ހުރިހާ މެމްބަރުން އެއް ތަނެއްގައި ނެތް ނަމަވެސް މަޝްވަރާ ކުރުމަށް އިތުރު ފަސޭހަތަކެއް އެ ހިދުމަތުގެ ސަބަބުން ލިބޭނެ ކަމަށް ވެސް ދިރާގުން ބުންޏެވެ.

"މީގެ އިތުރުން ގުރުއާން ކިޔަވައިދިނުމާއި ދީނީ ނަސޭހަތް ދިނުން ފަދަ ޖަމިއްޔާގެ މެންބަރުންގެ މެދުގައި ހިންގޭ ތަފާތު ތަމްރީނު ޕްރޮގްރާމްތައް ވެސް ކުރިއަށް ގެންދަނީ މި ހިދުމަތް މެދުވެރިކޮށެވެ. ވޭތުވެދިޔަ އަހަރު ބީވީއައިއެސްއެމް އިން ވަނީ މި ހިދުމަތުގެ ބޭނުންކޮށްގެން ހިސާބު، ލެޓިން އަދި ގުރުއާން ފަދަ ކްލާސްތައް ކުރިއަށް ގެންގޮސްފަ އެވެ." އެ ކުންފުނިން ބުންޏެވެ.

ދިރާގުން ބުނީ އެހެންވެ ރާއްޖޭގެ އެކި ކަންކޮޅުތަކުގައި ދިރިއުޅޭ ލޯފަން ކުދިންނަށް އެފަދަ ތަމްރީނު ޕްރޮގްރާމްތަކުގައި ބައިވެރިވުމުގެ ފުރުސަތު އެ ހިދުމަތުގެ ސަބަބުން މަގުފަހިވެފައިވާ ކަމަށެވެ. އަދި ދިރާގުން ހިލޭ އެ ހިދުމަތް ދިނުމުން ރާއްޖޭގައި ލޯފަން މީހުންގެ ހައްގުގައި މަސައްކަތްކުރާ ފަރާތްތައް ބާރުވެރިކުރުވައި، އެފަދަ ފަރާތްތަކަށް ހިތްވަރުދީ މުޖުތަމައަށް ނެރުމަށް ކުރެވޭ މަސައްކަތްތަށް ވަރަށް ބޮޑު އެހީތެރިކަމެއް ލިބޭނެ ކަމަށް ވެސް އެ ކުންފުނިން ބުންޏެވެ.

"ދިރާގުގެ އަމާޒަކީ މުސްތަޤްބަލުގައި ވެސް މިފަދަ އިޖްތިމާއީ ކަންކަމުގައި ބައިވެރިވެ ވީހާ ބޮޑަކަށް އެހީތެރިކަން ފޯރުކޮށްދިނުމެވެ." ދިރާގުން ބުންޏެވެ.