އިންޑިއާގެ ސްޓޭޓަކަށް 13 ގަޑިއިރު ތެރޭ 37،000 ފަހަރު ހޮނުއަޅައިފި

އަންދުރަ ޕްރަދޭޝް (އެޕްރީލް 27) - އިންޑިއާގެ ދެކުނުގެ އަންދުރަ ޕްރަދޭޝް ސްޓޭޓަށް މިދިޔަ އަންގާރަ ދުވަހު 13 ގަޑިއިރު ތެރޭ 36،749 ފަހަރު ހޮނުއަޅާފައިވާ ކަމަށް އޮފިޝަލުން ބުނެފި އެވެ.

ސްޓޭޓުގެ ޑިޒާސްޓާ މެނޭޖްމަންޓް އޮތޯރިޓީން ބުނީ މިއީ ނިސްބަތުން ބަލާއިރު ގިނަ އަދަދެއް ކަމަށާއި އެއީ މޫސަމަށް އާދަޔާޚިލާފު ބަދަލުތައް އަންނަކަމުގެ ނިޝާނެއް ކަމަށެވެ.

ހޮނުއެޅުމުގެ ސަބަބުން އަންދުރަ ޕްރަދޭޝް ސްޓޭޓުން ވަނީ ނުވަ މީހުން މަރުވެފަ އެވެ. އޭގެ ތެރޭގައި ނުވަ އަހަރުގެ ކުޑަ އަންހެން ކުއްޖަކު ވެސް ހިމެނެ އެވެ.

ހުޅަނގު މޫސުގެ ދުވަސްވަރު ހޮނުއެޅުމަކީ އިންޑިއާގައި އާއްމު ކަމެކެވެ. ހުޅަނގު މޫސުން ދެމިގެން ދަނީ އާއްމުކޮށް ޖޫން އިން ސެޕްޓެމްބަރު މަހުގެ ނިޔަލަށެވެ.

މިދިޔަ އަހަރުގެ މޫސުމާ ބެހޭ ތަފާސް ހިސާބުތައް ދައްކާ ގޮތުން އަންދުރަ ޕްރަދޭޝް އަށް މެއި މަހު ހޮނުއަޅާފައި ވަނީ 30،000 ފަހަރު އެވެ.

ސައެންސްވެރިން ލަފާކުރާ ގޮތުގައި މޫސުމަށް ބަދަލު އައިސް ދުނިޔެ ހޫނުވަމުން ދިއުމުން ހޮނުއަޅާ މިންވަރު އިތުރުވަމުންދާނެ އެވެ.

ނޭޝަނަލް ކްރައިމް ރެކޯޑްސް ބިއުރޯގެ ހިސާބުތައް ދައްކާ ގޮތުން 2005 ވަނަ އަހަރުން ފެށިގެން އިންޑިއާގައި ހޮނުއަޅައިގެން އަހަރަކު އެވްރެޖްކޮށް 2،000 މީހުން މަރުވެ އެވެ. ބިހާރު، ޖަރްކަންދު، އުއްތަރަ ޕްރަދޭޝް އަދި މަދިޔަ ޕްރަދޭޝް އަށް ހޮނުއަޅައިގެން ޖޫން 2016 ގައި ވަނީ 93 މީހުން މަރުވެފަ އެވެ.