ލަނޑާ ނަގަން އުޅުނު ޒުވާނެއްގެ މެޔަށް ތޮޅިއެއް ހެރި ޒަޚަމްވެއްޖެ

ހދ. ކޭލަކުނު ކައިރީގައި ލަނޑާ ނަގަން އުޅުނު ދޯންޏެއްގައި ހުރި ދިވެހި ޒުވާނެއްގެ މެޔަށް މިރޭ ފަރު ތޮޅިއެއް ހެރިގެން ޒަހަމްވެއްޖެ އެވެ.

އެމްއެންޑީއެފުން ބުނީ ޒުވާނާގެ މެޔަށް ތޮޅިއެއް ހެރިގެން ނޭވާ ނުލެވި ހާލު ސީރިއަސްވާ ކަމަށް ރިޕޯޓްކުރުމުން، ކޯސްޓުގާޑުގެ އުޅަނދެއް ގޮސް އޭނާ ހދ. ކުޅުދުއްފުއްޓަށް ގެންގޮސްފައިވާ ކަމަށެވެ. އޭނާ އަށް މިހާރު އަންނަނީ ކުޅުދުއްފުށީ ރީޖަނަލް ހޮސްޕިޓަލުގައި ފަރުވާ ދެމުންނެވެ.

އަނިޔާވި މީހާގެ ތަފްސީލެއް އަދި ނުލިބެ އެވެ.

ދެފެން ދޭތެރެ އާއި ފެންމަތީގައި އުޅޭ ފަރުތޮޅިއަކީ ތުންދިގު، އަނގައިގައި ވަރަށް ގިނައިން ދަތް ހުންނަ، ހިމަދިގު މަހެކެވެ. މަހަށް ނިކުމެ އުޅޭ ބައެއް މީހުންންގެ ގަޔަށް މީގެ ކުރިން ވެސް ފަރުތޮޅި ހެރިފައިވެ އެވެ. މިފަދަ ބައެއް ހާދިސާތަކުގައި ބައެއް މީހުންގެ ފުރާނަ އަށް ނުރައްކާ ވެފައި ވެސް އެބަ ހުއްޓެވެ.