ފެންނަނީ ރީތި ދަނޑެއް، ނުފެންނަނީ ކުރި މަސައްކަތް!

"މި ދަނޑުގައި ކުޅެލާ ހިތްނުވާނީ ކާކު؟"

ސޯޝަލް މީޑިއާގައި މިހާރު ދައުރުވަމުން އަންނަ، ޅ. ކުރެންދޫ އިރު ދެކުނު ފަރާތު އަތިރިމަތީގައި އަޅާފައިވާ ޓާފް ދަނޑުގެ މަތިން ނަގާފައިވާ ޑްރޯން ފޮޓޯއަކަށް މީހަކު ކޮމެންޓްކޮށްފައިވެ އެވެ. ވިލުނޫކުލައިގެ މޫދާއި ހުދު އަތިރިމައްޗެއްގެ މޫނުމައްޗަށްވާ ގޮތަށް ރަށުގެ އައްސޭރީގައި އަޅާފައިވާ މި ދަނޑުގެ ފޮޓޯތައް ފެނުމުން ފުޓްބޯޅައަށް ލޯބިކުރާ އެތައް ބަޔެއްގެ ހިތަށް ފިނިކަން ލިބުނެވެ. އެކަމަކު އެ ފޮޓޯ އިން ނުފެންނަ މަންޒަރަކީ، އެ ދަނޑު އެޅުމަށް އެ ރަށުގެ ރައްޔިތުން ހާއްސަކޮށް ޒުވާނުން ކުރި ބުރަ މަސައްކަތެވެ.

"މި ދަނޑުން ދައްކުވައިދެނީ މި ރަށުގައި ފުޓްބޯޅައަށް އޮތް ލޯބި،" 2100 މީހުންގެ އާބާދީއެއް އޮތް ކުރެންދޫ ޒުވާނަކު ބުންޏެވެ.

ވިޔަފާރިވެރިންނާއި ސަރުކާރުގެ އެހީގައި އެކި ރަށްރަށުގައި ދަނޑުތައް އަޅަމުން އަންނައިރު މި ދަނޑު އެޅުމަށް ހޭދަކުރި ފައިސާގެ ބޮޑު ބަޔަކީ އެ ރަށު ޒުވާނުން އެއްކުރި ފައިސާ އެވެ. ދަނޑު ހެދުމުގެ އަމަލީ މަސައްކަތުގައި ދާ އޮހޮރުވީ އެ ރަށު ރައްޔިތުންނެވެ.

ކޮފީ މޭޒެއްގެ މަތިން އުފަންވި މި ހިޔާލު ހަގީގަތަކަށް ހެދުމަށް އެ ރަށުގެ ޒުވާނުން އަމަލީ މަސައްކަތް ފެށީ މިދިޔަ އަހަރުގެ މާޗު 17 ވަނަ ދުވަހު އެވެ. އަހަރެއްވީ އިރު އެ ރަށުގެ އިރު ދެކުނު ފަރާތުގައި ކުރިން އޮތް ވެލި ދަނޑުގައި މިހާރު އޮތީ ފެހިކަން ގަދަ ހިތްގައިމު ޓާފް ދަނޑެކެވެ.

ދަނޑު އެޅުމަށްޓަކައި މިހާތަނަށް 1.6 މިލިއަން ރުފިޔާ ހޭދަވެފައިވާއިރު އޭގެ ތެރޭގައި ދަނޑު ލެވެލް ކުރުމަށް ކުޅިވަރާ ބެހޭ މިނިސްޓްރީން ދިން 400،980ރ. ހިމެނެ އެވެ. ބާކީ ފައިސާ އަކީ އެ ރަށުގެ ޒުވާނުންނާއި ރަށުގެ އެހެން ރައްޔިތުން އެއްކުރި ފައިސާ އެވެ. އެގޮތުން އެ ރަށުގައި އޮންނަ ނުވަ ކްލަބުގެ ތެރެއިން ކޮންމެ ކްލަބެއްގެ ކުޅުންތެރިޔަކު ވެސް 300 ޑޮލަރު ދިނެވެ. މީގެ އިތުރުން ރަށުގެ ރައްޔިތުން މަސައްކަތު ދުވަސް ބާއްވައިގެން ވެސް ފައިސާއެއްކުރި އެވެ.

"ދަނޑު ހެދުމުގެ އަމަލީ މަސައްކަތް ވެސް ކުރީ ރަށުގެ ރައްޔިތުން. ބޭރުން ޓާފް ގެނެސްގެން ޓާފް އެޅުމާއި ދަނޑު ހެދުމުގެ މަސައްކަތްކުރީ އަޅުގަނޑުމެން،" ކުރެންދޫ ކައުންސިލް ރައީސް އިސްމާއިލް މަދީހު ވިދާޅުވި އެވެ.

ދަނޑު އެޅުމުގެ ފުރަތަމަ ފިޔަވަހީގެ ދަށުން ޓާފް އަޅައި ވަށައި ފާރު ރާނައި ފެންސް ޖެހުމުގެ މަސައްކަތް ރޯދައިގެ ކުރިން ނިންމާލުމަށް ފަހު ދެ ވަނަ ފިޔަވައި ފަށާނެ އެވެ. އެ ފިޔަވަހީގައި އޮތީ ލައިޓިން ސިސްޓަމް ޖެހުމާއި ރޮސްޓަރަމް ހެދުމެވެ.

"އެކަމަށް ފައިސާ އެއްކުރުމާއި އެ މަސައްކަތް ދެން އޮތީ،" ޓާފް ކޮމިޓީގެ މެމްބަރު މުހައްމަދު ޝާން އަބްދުﷲ ބުންޏެވެ. "މި ދަނޑާ އެކު އަޅުގަނޑުމެންގެ އުއްމީދަކީ ކުރިމަގުގައި ގައުމީ ފުޓްބޯޅަށް ޓީމަށް ކުޅެން ކުރެންދޫން ކުޅުންތެރިން އުފެއްދުން."

ފުޓްބޯޅައިގައި ކުރެންދޫ އަށް އެހާ ބޮޑު ކާމިޔާބެއް ހޯދައިފައިނުވީ ނަމަވެސް އެ ރަށުގެ ކުޅުންތެރިޔެއް ކަމަށްވާ އަބްދުލްވާހިދު (ވާޑު) އަކީ ފުރަތަމަ ޑިވިޝަނުގައި ފާހަގަކޮށްލެވޭ ކުޅުންތެރިޔެކެވެ. ވެލެންސިއާގެ ކުރީގެ ކުޅުންތެރިޔާ މިހާރު ކުޅެމުން އަންނަނީ ޔުނައިޓެޑް ވިކްޓަރީ އަށެވެ.

އެފްއޭއެމުން މިނިވަން ޗެމްޕިއަންޝިޕް ފަށައި ރާއްޖޭގެ ހުރިހާ ރަށެއް ހިމެނޭ ގޮތަށް ފުޓްބޯޅަ ލީގު ސިސްޓަމް އެކުލަވާލާފައިވާއިރު އެ މުބާރާތުގެ މެޗުތައް ބޭއްވުމަށްޓަކައި ދަނޑުގެ ތަރައްގީކުރުމަށް ސަރުކާރުންނާއި އެފްއޭއެމުން ވެސް އެހީވެ އެވެ.