ގޯލްޑް ކަޕަށް ކުރެންދޫ ގަދަކޮށްފި، ލަންކާގެ ގައުމީ ކީޕަރު ސުޖަން އާއި ބެލްޖިއަމްގެ މިޑްފީލްޑަރެއް

ގޯލްޑް ކަޕްގައި ވާދަކުރާ، ކުރެންދޫ ޓީމުގެ ސްކޮޑްގައި ލަންކާގެ ގައުމީ ކީޕަރު ސުޖަން ޕެރޭރާ އާއި ބެލްޖިއަމްގެ މިޑްފީލްޑަރެއް ހިމަނައިފި އެވެ.

ރަށްރަށާއި ސިޓީތަކަށް ހާއްސަކޮށް ބާއްވާ މުބާރާތުގައި، ކޮންމެ ޓީމެއްގައި ރަށުން ބޭރު ދެ ކުޅުންތެރިން ޖެހުމުގެ ހުއްދަ ވަނީ ދީފަ އެވެ. ރަށުން ބޭރު ކުޅުންތެރިންގެ ގޮތުގައި ބައެއް ޓީމުތަކުން ވަނީ ބިދޭސީ ކުޅުންތެރިން ވެސް ޓީމުތަކުގައި ޖަހައިފަ އެވެ.

އަންނަ ބުދަ ދުވަހު ފަށާ މުބާރާތުގައި ކުރެންދޫގެ ގޯލް ބަލަހައްޓާނީ ގަލޮޅު ދަނޑަށް ފަރިތަ ސުޖަން އެވެ. އޭނާ ވަނީ ރާއްޖޭގެ ލީގުގައި އީގަލްސް އާއި ޓީސީ އަށް ވެސް ކުޅެފަ އެވެ. އީގަލްސް އަށް 2015 ގައި ބަދަލުވެ، ފަސް އަހަރު އެ ޓީމަށް ކުޅުނެވެ.

ކުރެންދޫ ޓީމުގައި ލިސްޓްކޮށްފައިވާ ބެލްޖިއަމްގެ މިޑްފީލްޑަރު ޖޯޑީ ވުލޫގަލްސް މީގެ ކުރިން ވަނީ އައިސްލެންޑާއި ސައިޕްރަސް، އޮސްޓްރޭލިއާ އަދި ކަޒަކިސްތާނުގެ ދަށް ޑިވިޝަންތަކުގެ ކްލަބަތްކަށް ކުޅެފަ އެވެ. އޭނާ މި އަހަރު ކުޅުނީ ތައިލެންޑްގެ ރީޖަނަލް ލީގުގެ ކްލަބަކަށެވެ.

ކުރެންދޫ ޓީމުގެ ކޯޗަކީ އަހްސަން ރަޝީދެވެ. އެ ޓީމުގައި ހުރި އެންމެ ތަޖުރިބާކަރު ކުޅުންތެރިޔަކީ ފުރަތަމަ ޑިވިޝަންގައި ގިނަ އަހަރުތަކެއް ވަންދެން ކުޅެމުން އަންނަ އަބްދުލް ވާހިދު އިބްރާހިމް (ވާޑް) އެވެ.

މުބާރާތުގެ ގުރުނެގުން މިރޭ އޮންނާނެ އެވެ. އަލިމަސްކާނިވަލުގައި ހުންނަ ސިޓްރޮން ލެމަންގުރާސްގައި ބާއްވާ ރަސްމިއްޔާތު ފަށާނީ މިރޭ ނުވައެއް ޖަހާއިރު އެވެ.