މަނިޔަފަރު ފަޅު ހިއްކައިގެން ރިސޯޓެއް ހަދަނީ

ކ. މަނިޔަފުށީ ކައިރީގައި އޮންނަ މަނިޔަފަރު ފަޅު ހިއްކައިގެން ރިސޯޓެއް ހަދަން ފަށައިފި އެވެ.

ޑްރެޖިން ޓުޑޭ ވެބްސައިޓްގައިވާ ގޮތުން އެ ފަޅު ހިއްކީ މެލޭޝިއާގެ ކުންފުންޏެއް ކަމަށްވާ އިވޯސަން އެސްޑީއެން ބީއެޗްޑީ ކިޔާ ކުންފުންޏަކާ ހަވާލު ކޮށްގެންނެވެ. މަނިޔަފަރު ފަޅު ހިއްކަން ގާތްގަނޑަކަށް 380،000 ކޮޑި މީޓަރުގެ ވެލި އެޅި އެވެ.

ރާއްޖޭގައި މިހާރު ދެ ރިސޯޓެއް ހިންގާ އެ ކުންފުނިން އެ އެފަޅު ހިއްކުމުގެ މަސައްކަތް ހަވާލުކުރީ ދެ މިލިއަން ޑޮލަރު (30 މިލިއަން ރުފިޔާ) އެވެ. އެ ރަށް ތަރައްގީކުރުމުގެ މަސައްކަތްކުރަނީ އެބޮނީ ޕްރައިވެޓް ލިމިޓެޑް ކިޔާ ކުންފުންޏަކުންނެވެ.

ޓޫރިޒަމް ހަބަރުތައް ގެނެސްދޭ ވެބްސައިޓެއްގައި ބުނެފައި ވަނީ އެ ފަޅު ހިއްކަން މިދިޔަ އަހަރު ޖުލައި 1ގައި ހަވާލު ކުރުމުން އެ މަޝްރޫއު ނޮވެމްބަރު 15 ގައި ނިންމާލާފައިވާ ކަމަށެވެ. އެ ފަޅު ހިއްކުމަށް ފަހު މިހާރު އަންނަނީ ވަށައިގެން ތޮށިލުމުގެ މަސައްކަތް ކުރަމުންނެވެ.

މަނިޔަފަރުގެ އިތުރުން މާލެ އަތޮޅުގެ އެކި ސަރަހައްދުން ގިނަ އަދަދެއްގެ ފަޅު ހިއްކައިގެން ރިސޯޓު ހެދުމުގެ މަސައްކަތް އަންނަނީ ކުރަމުންނެވެ. އެގޮތުން ކ. އެނބޫދޫފަޅުގައި ނުވަ ރަށް ހިއްކައިގެން މަތީ ފެންވަރުގެ ރިސޯޓުތަކެއް ތަރައްގީކުރަން ވަނީ ފަށައިފަ އެވެ.