އެނބޫދޫފަޅުގައި ހަދާ ރިސޯޓްތަކުގައި ޑިއުޓީ ފްރީ ފިހާރަތަކެއް ވެސް ހިމެނޭ

ތައިލެންޑުގެ ސިންހަ އެސްޓޭޓާއި ސިންހަ ކޯޕަރޭޝަން އަދި ހާޑް ރޮކް ކެފޭސް ގުޅިގެން ކ. އެނބޫދޫފަޅު ހިއްކައިގެން ތަރައްގީކުރާ ރިސޯޓްތަކާ އެކު ޔޮޓްމެރީނާ އާއި ޑިއުޓީ ފްރީ ފިހާރަތައް ހަދަން ވެސް ނިންމާފައިވާ ކަމަށް އެ މަޝްރޫއު ހިންގާ ފަރާތުން ބުނެފި އެވެ.

ރާއްޖޭގައި މިހާތަނަށް އެއްވެސް ރިސޯޓެއްގައި ޑިއުޓީ ފްރީ ފިހާރަ ހިންގަން ހުއްދަ ދީފައެއްނުވެ އެވެ. ޑިއުޓީ ފްރީ ފިހާރަތަައް ހިންގަނީ ހަމައެކަނި ވެލާނާ އިންޓަނޭޝަނަލް އެއާޕޯޓްގަ އެވެ.

ބެންކޮކް ޕޯސްޓް ނޫޙުގައި ބުނެފައި ވަނީ އެނބޫދޫފަޅުގެ ހަތް އަކަ ކިލޯމީޓަރު ސަރަހައްދުގައި ހަދާ އިންޓަގްރޭޓެޑް ރިސޯޓް ހިންގަން ބޫން ރޮވްޑް ބްރެވެރީ ކޮމްޕެނީން ސިންހަ ކޯޕަރޭޝަނާ ހަވާލުކޮށްފައިވާ ކަމަށެވެ. ބޫން ރޮވްޑްއަށް އެ ފަޅު ހިއްކައިގެން ރިސޯޓް ހިންގަން ދިވެހި ސަރުކާރުން ކުއްޔަށްދިނީ 50 އަހަރަށް ކަމަށް އެ ނޫހުގައި ބުނެފައިވެ އެވެ.

ނަމަވެސް އެނބޫދޫފަޅު ހިއްކައިގެން ތަރައްގީކުރާ ރިސޯޓް ޕްރޮޖެކްޓާ ބެހޭ ގޮތުން ދިވެހި ސަރުކާރާއި ޓޫރިޒަމް މިނިސްޓްރީން އެއްވެސް އެއްޗެއް އާއްމުކޮށްފައެއްނުވެ އެވެ. އަދި އެކަމާ ބެހޭ ގޮތުން ތަކުރާރުކޮށް ސުވާލުކުރުމުން ވެސް ޓޫރިޒަމް މިނިސްޓްރީގެ ފަރާތުން ޖަވާބެއް ނުލިބެ އެވެ.

"މިހާރު"އަށް އެނގިފައިވާ ގޮތުން ރިސޯޓް ތަރައްގީކުރަން މިހާތަނަށް ރާއްޖޭގައި ހިންގާ އެންމެ ބޮޑު ޕްރޮޖެކްޓް ހަވާލުކޮށްފައި ވަނީ ބީލަމަކަށް ނުލައި ސިއްރު އެއްބަސްވުމެއްގެ ދަށުންނެވެ. އެ އެއްބަސްވުމުގެ ދަށުން އަޕް ފްރޮންޓް ފީގެ ގޮތުގަ އާއި ދައުލަތަށް ލިބޭ އާމްދަނީއާ ގުޅޭ އެއްވެސް ތަފުސީލެއް މިހާތަނަށް ޓޫރިޒަމް މިނިސްޓްރީން ހާމަކޮށްފައެއްނުވެ އެވެ.

ބެންކޮކް ޕޯސްޓްގައި ބުނެފައި ވަނީ ސިންގަ ކޯޕަރޭޝަނުން އެތަނުގައި މުނިފޫހިފިލުވުމުގެ ތަފާތު ހަރަކާތްތައް ހިންގަން މަޝްހޫރު ކެފޭ ޑެލް މާއާ އެކު އެއްބަސްވުުގައި ސޮއިކޮށްފައިވާ ކަމަށެވެ. ކެފޭ ޑެލް މާ ކްލަބަކީ 1980 ވަނަ އަހަރު ސްޕޭންގެ އިބީޒާގައި އުފެއްދި ކުންފުންޏެކެވެ. ކެފޭ ޑެލް މާގެ ކްލަބްތައް މިހާރު އިބީޒާގެ އިތުރުން ހަވާއީ އާއި އޮސްޓްރޭލިއާގައި ވެސް ހިންގަ އެވެ. އެނބޫދޫފަޅުގައި ހަދާ ކްލަބްގެ ފުރަތަމަ ފިޔަވަހި އަންނަ އަހަރުގެ ތެރޭގައި ހުޅުވާނެ ކަމަށް ބެންކޮކް ޕޯސްޓްގައި ބުނެފައިވެ އެވެ.

އެ ނޫހުގައި ބުނެފައި ވަނީ އެނބޫދޫފަޅުގައި ހަދާ ރިސޯޓުގެ 5،000 އަކަމީޓަރު ސަރަހައްދެއްގައި ކެފޭ ޑެލް މާ ކްލަބް ހިންގަން ނިންމާފައިވާ ކަމަށެވެ. އެތަން ހުންނާނީ އެ ރިސޯޓްތަކާ އެކު ހަދާ ޔޮޓް މެރީނާއާ ވެސް ގުޅުވާލާފައި ކަމަށް ބެންކޮކް ޕޯސްޓްގައި ބުނެފައިވެ އެވެ.

ތައިލެންޑުގެ "ދަ ނޭޝަން" އަށް ދެއްވި އިންޓަވިއުއެއްގައި ސިންހަ އެސްޓޭޓްގެ ޗީފް އެގްޒެކެޓިވް އޮފިސަރު ނަރިސް ޗޭކްލިން ވިދާޅުވީ އެނބޫދޫފަޅުގައި ނުވަ ރިސޯޓް ތަރައްގީކުރުމާ ގުޅޭ ގޮތުން ހާޑް ރޮކް އިންޓަނޭޝަނަލް ހޮޓެލް ގްރޫޕާ އެކު ވަރަށް ފަހުން އެއްބަސްވުމެއް ގާއިމުކޮށްފައިވާ ކަމަށެވެ.

މާލެއާ ޖެހިގެން ދެކުނު ފަރާތުގައި އޮންނަ ބޮޑު ފަޅުގައި އެ ރިސޯޓްތައް ހަދަނީ ރާއްޖޭގެ ގުދުރަތީ ރީތިކަން ފެންނަ ގޮތަށް އަދި ޗުއްޓީ ހޭދަކުރުމުގެ ހުރިހާ ކަމެއް ފުރިހަމައަށް ލިބޭ ގޮތަށް ކަމަށް ވެސް އޭނާ ވިދާޅުވި އެވެ.

އެނބޫދޫފަޅުގައި އަންނަ އަހަރު ހަދާ ރިސޯޓްތަކުގެ ތެރެއިން ތިން ރިސޯޓް ނިންމަން ކަނޑައަޅާފައި ވަނީ އެ މަޝްރޫއުގެ ފުރަތަމަ ފިޔަވަހީގެ ދަށުންނެވެ.

ނަރިސް ވިދާޅުވި ގޮތުގައި ތިން ރިސޯޓް ހުޅުވޭވަރުވާނީ އަންނަ އަހަރުގެ ޖުލައި މަހު ހިސާބުގަ އެވެ.