އެމްއާރުޑީސީގެ މަސައްކަތްތައް ހައުސިން މިނިސްޓްރީގެ ދަށަށް

މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީ)ގެ މަސައްކަތްތައް، އެތަނުގެ މުވައްޒަފުންނާ އެކު، ހައުސިން މިނިސްޓްރީގެ، ޕަބްލިކް ވޯކްސް ސާވިސަސްގެ ދަށަށް ބަދަލުކޮށްފި އެވެ.

"މިހާރު" އަށް އެނގިފައިވާ ގޮތުގައި މިދިޔަ މަހުން ފެށިގެން، އެމްއާރުޑީސީގެ ބިޒުނަސް ޑިވެލޮޕްމެންޓް ފިޔަވާ އެހެން ހުރިހާ ޑިޕާޓްމަންޓެއްގެ މުވައްޒަފުންނާއި މަސައްކަތްތައް ވަނީ ޕަބްލިކް ވޯކްސް ސާވިސަސްގެ ދަށަށް ބަދަލުކޮށްފަ އެވެ.

ޓްރެކް ދަނޑު ކައިރީގައި ހުންނަ އެމްއާރުޑީސީގެ ސައިޓު ވެސް މިހާރު ވަނީ ޕަބްލިކް ވޯކްސް ސާވިސްގެ ދަށަށް ގެންގޮސްފަ އެވެ. އެގޮތުން އެތަނުގައި ވަނީ އެ ޑިޕާޓްމަންޓްގެ ނަން ބޯޑު ވެސް ހަރުކޮށްފަ އެވެ.

ރާއްޖޭގެ އެކި ރަށްރަށުގައި މަގު ހެދުމުގެ އިތުރުން ފުޓްބޯޅަ ދަނޑާއި ނަރުދަމާ އެޅުމުގެ މަސައްކަތް ވެސް ކުރަމުން ދިޔަ އެމްއާރުޑީސީ އުވާލަން އެކުންފުނީގެ ބޯޑުގައި ކުރިން ވަނީ މަޝްވަރާކޮށްފަ އެވެ.

އެމްއާރުޑީސީއަކީ ކޮރަޕްޝަންގެ ބޮޑެތި ތުހުމަތުތަކެއް އެޅިފައިވާ ކުންފުންޏެކެވެ. އަދި އެއީ ކުރު މުއްދަތެއްގެ ތެރޭގައި އެންމެ ގިނަ މެނޭޖިން ޑިރެކްޓަރުން އައްޔަންކުރި ކުންފުނި ވެސް މެ އެވެ. މިހާތަނަށް އެ ކުންފުނީގައި ފަސް މެނޭޖިން ޑިރެކްޓަރުން މަސައްކަތްކޮށްފައިވެ އެވެ.