ޝަމީމް ވެސް ސުޕްރީމް ކޯޓަށް ހާޒިރުވާން އަންގައިފި

ކުރީގެ ރައީސް މައުމޫން އަބްދުލް ގައްޔޫމްގެ ވަކީލުންގެ ޓީމުގައި ހިމެނޭ ހުސެއިން ޝަމީމް ވެސް ސުޕްރީމް ކޯޓަށް ހާޒިރުވުމަށް އެ ކޯޓުން މިއަދު އަންގައިފި އެވެ.

ޝަމީމަށް ފޮނުވި އަމުރުގައި ބުނީ އެ ކޯޓުގެ ބޭނުމަކަށް އަންނަ އާދިއްތަ ދުވަހު 1:30 އަށް ކޯޓަށް ހާޒިރުވުމަށެވެ. ނަމަވެސް އިތުރު ތަފްސީލެއް ދީފައެއް ނުވެ އެވެ.

ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން ވެސް ސުޕްރީމް ކޯޓަށް ހާޒިރުވާން ވަނީ އަންގައިފަ އެވެ. އޭނާ ވެސް ވަޑައިގަންނަވަން ޖެހެނީ އާދިއްތަ ދުވަހުގެ ހަމަ އެ ގަޑިއަށެވެ.

ޝަމީމް ވަކީލުކަން ކުރެއްވުން ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން މިދިޔަ ބުރާސްފަތި ދުވަހު ވަނީ މުއްދަތެއް ނެތް ގޮތަށް މަނާކޮށްފަ އެވެ. .

ކުރީގެ ޑެޕިއުޓީ ޕްރޮސެކިއުޓަ ޖެނެރަލް ޝަމީމް ވަނީ، ފުލުހުން ތަހުގީގުކުރާ މައްސަލައެއްގައި ހޯދާފައިވާ ހެއްކާ ބެހޭ ގޮތުން، ނިއުސް ކޮންފަރެންސެއްގައި ދޮގު މައުލޫމާތު ދެއްވިކަމުގެ ތުހުމަތަށް ސުވާލުކޮށް ބަޔާން ވެސް ނަގައިފަ އެވެ. ފުލުހުން ކުރަނީ އޭނާއާ ބެހޭ ޖިނާއީ ތަހުގީގެއް ކަމަށް ފުލުހުން ބުނެ އެވެ.

ޝަމީމަކީ މީގެ ކުރިން، ދެ އަހަރު ވަންދެން ވަކީލުން ކަމުން ސަސްޕެންޑް ކޮށްފައިވާ ބޭފުޅެކެވެ. އޭނާގެ ސަސްޕެންޝަން އުވާލީ ޖެނުއަރީ 16 ގަ އެވެ.