މާލެ ކައިރިން ބްރިޖުގެ ޑެކް އެޅުމުގެ ބޮޑު ބައި ނިމިއްޖެ

މާލެ އާއި ހުޅުލެއާ ދެމެދު އަޅާ ބްރިޖުގެ މަސައްކަތް ކުރިއަށް ދާއިރު، މާލެ ކައިރިން ޑެކް އެޅުމުގެ ބޮޑު ބައެއް ނިމިފައިވާ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

މުއިއްޒު ކުރެއްވި ޓުވީޓެއްގައި ވިދާޅުވީ މާލެ އާއި ހުޅުލެއާ މެދު އަޅާ ބްރިޖުގެ އައިބީމްތައް ނުވަތަ ކޮންކްރީޓުން ހަދާފައިވާ ބޮޑެތި ބެރިތަކުގެ 480 މީޓަރު ކޮންސްޓްރަކްޝަން މަސައްކަތް މާލެ ކައިރިން ނިމިފައިވާ ކަމަށެވެ. އަދި މާލޭ ކޮޅުން ބުރިޖަށް އަރާ މަގު ނުވަތަ ބުރިޖު ޑެކް ސްޕޭންގެ 180 މީޓަރުގެ ކޮންކްރީޓް މަސައްކަތް ނިމިފައިވާ ކަމަށް މުއިއްޒު ވިދާޅުވި އެވެ.

މާލޭ ކޮޅުން ބްރިޖު ފެށޭ ހިސާބުން ބެރި އަޅަން ފެށީ ޑެކު އެޅުމަށްޓަކަ އެވެ. ބެރިތައް ނިމުމުން، ޑެކު އަޅައި، ޗައިނާގައި މިހާރު ތައްޔާރުކުރަމުން އަންނަ ސުޕަ ސްޓްރަކްޗާ ގެނެސް އަތުރާލާނީ އެވެ.

މުއިއްޒު ވަނީ މާލެ ކައިރިން ބްރިޖުގެ މަސައްކަތް ހިނގަމުންދާ ގޮތުގެ ބައެއް ފޮޓޯތައް އާންމު ކުރައްވައިފަ އެވެ. އެ ފޮޓޯތަކުން ފެންނަ ގޮތުގައި މާލެ ކޮޅުން ފެށިގެން ބްރިޖުގެ މެދާ ހިސާބަށް ކޮންކްރީޓްގެ ބޮޑު ބައި ވަނީ ނިމިފަ އެވެ. އަދި އެ ފޮޓޯތަކުން ޗައިނާގެ ސީސީސީސީ ކުންފުނީގެ މުވައްޒަފުން މަސައްކަތް ކުރަމުން އަންނަ މަންޒަރު ވެސް ފެނެ އެވެ.

މުއިއްޒު ވިދާޅުވީ ބްރިޖުގެ މަސައްކަތް ކުރިއަށް ދަނީ ހަލުވިކަމާއެކު ޝެޑިއުލްއާ އެއްގޮތަށް ކަމަށެވެ.

ބްރިޖްގެ މަސައްކަތަށް 200 މިލިއަން ޑޮލަރު ޚަރަދުވާއިރު އޭގެ ތެރެއިން 116 މިލިއަން ޑޮލަރަކީ ޗައިނާ ސަރުކާރުގެ ހިލޭ އެހީ އެވެ. އަދި 72 މިލިއަން ޑޮލަރަކީ ޗައިނާގެ ލޯނު އެހީ އެވެ. މި މަޝްރޫއަށް ދިވެހި ސަރުކާރުން 12 މިލިއަން ޑޮލަރު ހޭދަކުރެ އެވެ.

ދެ ގައުމުގެ ސަރުކާރުން އެއްބަސްވެފައިވާ ގޮތަށް ބްރިޖު ނިންމަމުން އަންނައިރު، ޝެޑިއުލަށް ވުރެން މާ އަވަހަށް ސީސީސީސީން މަސައްކަތް ނިންމަމުން އަންނަ ކަަމަށް ހައުސިން މިނިސްޓްރީން ބުންޏެވެ. މިނިސްޓްރީން ލަފާ ކުރާ ގޮތުގައި މި އަހަރުގެ ސެޕްޓެމްބަރު މަހަށް މަސައްކަތް ނިންމަން އެއްބަސްވެފައިވާ ބްރިޖު ޖުލައި 26ގައި ހުޅުވޭނެ އެވެ.