އާ ހިދުމަތްތަކާ އެކު އެލައިޑަށް ބޮޑު ބަދަލެއް

އެލައިޑް އިންޝުއަރެންސްގެ 33 ވަނަ އަހަރީ ދުވަހާ ދިމާކޮށް، އެ ކުންފުނިން ދެމުން އަންނަ ހިދުމަތްތަކަށް ބޮޑެތި ބަދަލުތަކެއް ގެނެސް އެކަން ރަސްމީކޮށް އިއުލާނު ކޮށްފި އެވެ. އެ ކުންފުނިން ވަނީ މުޅިން އާ ހިދުމަތްތަކެއް ވެސް މިރޭ ތައާރަފް ކޮށްފަ އެވެ.

އެ ކުންފުނީގެ އަހަރީ ދުވަސް ފާހަގަ ކުރުމަށް ދަރުބާރުގޭގައި ބޭއްވި "އެލައިޑް ސްޕެޝަލް އިވެންޓް" ގައި އިއުލާނު ކުރި އެންމެ ފާހަގަ ކޮށްލެވޭ އާ ހިދުމަތަކީ "އެޖެންޓް 1600" އެވެ. އެ ހިދުމަތް ތައާރަފް ކޮށްދެއްވަމުން އެލައިޑްގެ ޖެނަރަލް މެނޭޖަރު އަހުމަދު ރިޔާޒީ މުހައްމަދު ވިދާޅުވީ އެ ހިދުމަތަކީ އެ ކުންފުނީގެ ހިދުމަތްތައް ވީހާވެސް ގާތުން ދިނުމަށް ތައާރަފް ކުރެވުނު އާޓިފިޝަލް އިންޓެލިޖެންސް "އިންޝުއަރެންސް އެޖެންޓެއް" ކަމަށެވެ.

އެޖެންޓް 1600 އަކީ އެ ކުންފުނީގެ ހިދުމަތްތަކާ ގުޅޭ ގޮތުން ކަސްޓަމަރުންގެ ސުވާލުތަކަށް އަމިއްލަ އަށް ޖަވާބު އިންޓެލިޖެންޓް ބޮޓެކެވެ. މިހާރު އެ ބޮޓުގެ ހިދުމަތް ވައިބާ، ފޭސްބުކް މެސެންޖާ އަދި ޓެލެގްރާމުން ލިބޭނެ އެވެ. މި ބޮޓުގެ ހިދުމަތް ލިބޭނީ އެލައިޑުގެ ކިއުއާރު ކޯޑު ސްކޭން ކުރުމުން ނުވަތަ އޭޖެންޓް 1600 ސާޗް ކުރުމުންނެވެ.

"މިއީ އަބަދު ވެސް ކަސްޓަމަރުންގެ ސުވާލުތަކަށް ބަލައިގެން އަމިއްލައަށް ކަންކަން ދަސްކުރާގޮތަށް ފަރުމާ ކޮށްފައިވާ [ބޮޓެއް]. މިސާލަކަށް އިންޝުއަރެންސްގެ ބެލެންސް ބަލާލެވިދާނެ. ނުވަތަ އިންޝުއަރެންސް ހަމަވާ ތާރީހު ބަލާލެވިދާނެ. މިރޭ އަޅުގަނޑުމެން މިލަނީ ކޮންމެ މީހެއްގެ ޖީބަށް ވެސް އިންޝުއަރެންސް އެޖެންޓެކޭ ބުނެވިދާނެ،" އެޖެންޓް 1600 މަސައްކަތް ކުރާ ގޮތް ދައްކާލަމުން ރިޔާޒީ ވިދާޅުވި އެވެ.

މީގެ އިތުރުން އެ ކުންފުނިން ވަނީ "ބިލްޑާސް އިންޝުއަރާ"ގެ ނަމުގައި ކޮންސްޓްރަކްޝަން އިންޑަސްޓްރީއަށް އާ ހިދުމަތެއް ތައާރަފް ކޮށްފަ އެވެ. އެ ހިދުމަތް ތައާރަފް ކޮށްދެއްވަމުން އެލައިޑްގެ ސޭލްސް މެނޭޖާ މުހައްމަދު ޝިރުނީލް ވިދާޅުވީ، މިއީ އިންޝުއަރެންސް އިންޑަސްޓްރީ ކުރިއަރަމުން އަންނަ މިންވަރާއި އެ އިންޑަސްޓްރީގެ ބޭނުންތައް ބެލުމަށް ފަހު ވަރަށް ބޮޑަށް އެ ދާއިރާ އަށް ބޭނުންވާ ކަންތައްތައް ކަވަރު ކުރެވޭ ގޮތަށް ޑިޒައިން ކޮށްފައިވާ ޕޮލިސީ އެއް ކަމަށެވެ. މި ޕޮލިސީގެ ދަށުން ތަފާތު ތިން ޕެކޭޖެއް ވެސް ވަނީ ތައާރަފް ކޮށްފަ އެވެ. އެ ޕެކޭޖުތަކަކީ ބިލްޑާސް ބޭސިކް އާއި ބިލްޑާސް ބޭސިކް ޕްލަސް އަދި ބިލްޑާސް ޕްރިމިއަމް އެވެ.

ބިލްޑާސް ބޭސިކް ޕެކޭޖުގެ ދަށުން މެޓީރިއަލް ޑެމޭޖަސް އާއި ތާޑް ޕާޓީ ލައިބިލިޓީ ކަވަރު ކޮށްދޭނެ އެވެ. ތާޑް ޕާޓީ ލައިބިލިޓީގެ ދަށުން މީހުންނަށް ލިބޭ ގެއްލުންތަކަށް 100،000ރ. އާއި ހަމައަށް އަދި ޕްރޮޕަޓީއަށް ލިބޭ ގެއްލުމުގެ ގޮތުގައި ވެސް 100،000ރ. އާއި ހަމަ އަށް ކަވަރު ކޮށްދޭނެ އެވެ.

ބިލްޑާސް ބޭސިކް ޕްލަސް ޕެކޭޖުގެ ދަށުން މެޓީރިއަލް ޑެމޭޖަސް އާއި ތާޑް ޕާޓީ ލައިބިލިޓީގެ އިތުރުން ގްރޫޕް ޕާސަނަލް އެކްސިޑެންޓްސް ކަވަރު ކޮށްދޭނެ އެވެ. ތަކެއްޗަށް ލިބޭ ގެއްލުމުގެ ބަދަލުގެ ގޮތުގައި މި ޕެކޭޖުން ކަވަރު ކޮށްދޭވަރު ބިލްޑާސް ބޭސިކް ޕެކޭޖަށް ވުރެ ފުޅާ ވާނެ އެވެ. އަދި ތާޑް ޕާޓީ ލައިބިލިޓީގެ ދަށުން މީހުންނަށް ލިބޭ ގެއްލުންތަކަށް 250،00ރ. އާއި ހަމައަށް އަދި ޕްރޮޕަޓީ ޑެމޭޖުގެ ގޮތުގައި ވެސް 250،000ރ. އާއި ހަމަ އަށް ކަވަރު ކޮށްދޭނެ އެވެ. ގްރޫޕް ޕާސަނަލް އެކްސިޑެންޓްސްގެ ދަށުން ނެޗުރަލް އަދި އެކްސިޑެންޓަލް މަރުތަކަށް 100،000ރ.ގެ ބަދަލެއް ދޭނެ އެވެ.

ބިލްޑާސް ޕްރިމިއަމް ޕެކޭޖުގެ ދަށުން މެޓީރިއަލް ޑެމޭޖަސް އާއި ތާޑް ޕާޓީ ލައިބިލިޓީގެ އަދި ގްރޫޕް ޕާސަނަލް އެކްސިޑެންޓްސްގެ އިތުރުން ކޮންސްޓްރަކްޝަން އިކުއިޕްމަންޓް، ޕްލާންޓް އަދި މެޝިނަރީ ކަވަރު ކޮށްދޭނެ އެވެ. މެޓީރިއަލް ޑެމޭޖަސްގެ ގޮތުގައި މި ޕެކޭޖުން ކަވަރު ކޮށްދޭ ވަރު ބިލްޑާސް ބޭސިކް ޕްލަސް އަށް ވުރެ ފުޅާވެފައި، އިތުރު ކަންކަން ހިމެނެ އެވެ. އަދި ތާޑް ޕާޓީ ލައިބިލިޓީގެ ދަށުން މީހުންނަށް ލިބޭ ގެއްލުންތަކަށް 500،000ރ. އާއި ހަމައަށް (މީހަކަށް 250،000ރ. އާއި ހަމައަށް) އަދި ޕްރޮޕަޓީ ޑެމޭޖުގެ ގޮތުގައި ވެސް 500،000ރ. އާއި ހަމަ އަށް ކަވަރު ކޮށްދޭނެ އެވެ. ގްރޫޕް ޕާސަނަލް އެކްސިޑެންޓްސްގެ ދަށުން ނެޗުރަލް އަދި އެކްސިޑެންޓަލް މަރުތަކަށް 100،000ރ.ގެ ބަދަލު ދޭއިރު، އިތުރު ގެއްލުންތައް ވެސް ކަވަރު ކޮށްދެ އެވެ. އަދި މަސައްކަތުގައި ނޫޅޭ ގަޑިތަކުގައި ވެސް، މަސައްކަތްތެރިންނަށް މި ކަވަރު ލިބޭނެ އެވެ. މީގެ އިތުރުން ކޮންސްޓްރަކްޝަން އިކުއިޕްމަންޓް، ޕްލާންޓް އަދި މެޝިނަރީ ގެއްލުމާއި ހަލާކުވުން ފަދަ ކަންކަމަށް ވެސް ބަދަލު ދޭނެ އެވެ.

އެލައިޑުގެ ޓްރެވަލް އިންޝުއަރެންސް އަށް ވެސް މިރޭ ވަނީ ބޮޑެތި ބަދަލުތަކެއް ގެނެސްފަ އެވެ. އެގޮތުން މައިގަނޑު ގޮތެއްގައި ޓްރެވަލް އިންޝުއަރެންސް އަށް ގެނެވުނު ބަދަލަކީ، އާއިލާގެ މެމްބަރަކު މަރުވެގެން ނުވަތަ ސިއްހީ މައްސަލައަކާ ގުޅިގެން ދަތުރު ކެންސަލް ކުރަން ޖެހިއްޖެނަމަ އެ ކަމަށް ހިނގާ ހަރަދުތައް ކަވަރު ކޮށްދިނުމެވެ. އަދި ދަތުރުގައި މެޑިކަލް އެކްސްޕެންސަސް ކަވަރު ކޮށްދިނުމާއި، ޕާސްޕޯޓް ގެއްލުން ނުވަތަ ޗެކިން ކޮށްފައިވާ ބެގޭޖެއް ގެއްލިއްޖެނަމަ އެ އަށް ވެސް ބަދަލު ދޭނެ އެވެ.

އެލައިޑުން ކުރިން ޓްރެވަލް އިންޝުއަރެންސް އަމާޒުކޮށްފައި އޮތީ ވިޔަފާރި ދަތުރުތަކުގައި ދަތުރުކުރާ ފަރާތްތަކަށެވެ. ނަމަވެސް މި ބަދަލުތަކާ އެކު އާންމުންނަށް ވެސް ބޮޑެތި ފަސޭހަތަކެއް ލިބޭނެ ކަމަށް އެ ކުންފުނީގެ ޓެކްނިކަލް މެނޭޖާ އަހުމަދު ޝާބިގް ވިދާޅުވި އެވެ. އޭނާ ވިދާޅުވީ މި ބަދަލުތަކާ އެކު ޓްރެވަލް އިންޝުއަރެންސް މާޗް އެއްވަނަ ދުވަހުން ފެށިގެން ލިބެން ފަށާނެ ކަމަށެވެ.

އެ ކުންފުނިން އެންމެ ފުޅާ ދާއިރާއެއްގައި ދެމުން އަންނަ ހިދުމަތްތަކުގެ ތެރޭގައި ހިމެނޭ ހެލްތް އިންޝުއަރެންސް ވެސް ވަނީ ބޮޑެތި ބަދަލުތަކެއް ގެނެސް، ހިދުމަތް ހޯދާ ފަރާތްތަކަށް ބޮޑެތި ފަސޭހަތަކެއް ލިބޭނެ ގޮތަށް ބަދަލު ކޮށްފަ އެވެ. އެގޮތުން ހެލްތް އިންޝުއަރެންސް ކްލެއިމް ކުރުމަށް "މައި އެލައިޑް ޕޯޓަލް"ގެ ނަމުގައި ވަނީ ވެބް އެޕްލިކޭޝަނެއް ވެސް ތައާރަަފް ކޮށްފަ އެވެ.

އެލައިޑުގެ ޓެކްނިކަލް މެނޭޖާ، ހެލްތް މަރިޔަމް ޝަފީގް ވިދާޅުވީ، މި އެޕްލިކޭޝަން މެދުވެރިކޮށް ޑޮކްޓަރަށް ދެއްކުމަށް ފަހު ބަދަލު ހޯދަން ހުށަހަޅަން ޖެހޭ ލިޔުންތަކުގެ އަސްލު އެ ކުންފުނީގެ އޮފީހަށް ގެނައުމުގެ ބަދަލުގައި ފޮޓޯއެއް ނެގުމަށް ފަހު އެޕްލިކޭޝަނަށް ލުމުން "ނިމުނީ" ކަމަށެވެ.

"އިންޝުއަރެންސްގެ ސްޓޭޓަސް އާއި ކަވަރޭޖް ލިމިޓުގެ އިތުރުން ޓްރާންސެކްޝަން ހިސްޓްރީ ވެސް މި އެޕްލިކޭޝަނުން ޗެކް ކޮށްލެވޭނެ. ލިޔުންތަކުގެ ފޮޓޯ ނެގުމަށް ފަހު، އަޅުގަނޑުމެންނަށް ފޮނުވާލީމަ ނިމުނީ،" މަރިޔަމް ވިދާޅުވި އެވެ.

އެލައިޑް ގިފްޓް ވައުޗާ ވެސް މިރޭ ވަނީ ތައާރަފްކޮށްފަ އެވެ. މިއީ އެލައިޑުގެ ހިދުމަތްތައް އެހެން ފަރާތަކަށް ހަދިޔާއެއްގެ ގޮތުގައި ދެވޭ ގޮތަށް ތައާރަފް ކުރި ހިދުމަތެކެވެ. މި ހިދުމަތުން މޮޓޯ އިންޝުއަރެންސް، ހައްޖު އަދި އުމްރާގެ އިތުރުން ހޯމް ކޮންޓެންޓް ކަވަރޭޖް ލިބޭނެ އެވެ. ވައުޗާގެ އަގު ކަނޑައެޅޭނީ އެމީހަކު ކަނޑައަޅާ މުއްދަތަކާއި، އިންޝުއަރެންސަށް ބެލުމަށް ފަހު އެވެ.

"ހޯމް ކޮންޓެންޓްގެ ދަށުން ކުއްޔަށް އުޅޭ ފަރާތަތަކުން އެ ގެއެއްގަ ހުންނަ ތަކެތި އިންޝުއާ ކޮށްލެވޭނެ. އަޅުގަނޑުމެންގެ ހުރިހާ އެޖެންޓުން އަތުން މި ވައުޗާ ފެބްރުއަރީ ފަނަރައިން ފެށިގެން ލިބޭނެ. އަދި ކުރިއަށް އޮތް ތަނުގައި އެމްއެމްއޭއާ ގުޅިގެން ހުރިހާ ރަށަކުން ވެސް މި ވައުޗާ ލިބޭ ގޮތް ހެދޭތޯ އަޅުގަނޑުމެން އެބަ މަސައްކަތް ކުރަން،" އެލައިޑްގެ ކްލައިންޓް ސާވިސް މެނޭޖަރު ނަސްރަތު މުހައްމަދު ވިދާޅުވި އެވެ.

އެލައިޑްގެ ސީއެސްއާރު ޕްރޮގްރާމަށް ވެސް ވަނީ "ޕްރިމިއަމް ފޯ ގުޑް"ގެ ނަމުގައި ބޮޑު ބަދަލެއް ގެނެސްފަ އެވެ. އެގޮތުން އެލައިޑްގެ ޕާޓްނަރުންގެ ގޮތުގައި ޔޫއެންޑީޕީ އާއި އުރީދޫ ވަނީ ކަޑައަޅާފަ އެވެ. އަދި އެލައިޑުން މިހާރުގެ އަމާޒަކީ، ދިގު މުއްދަތުގައި މުޖުތަމައު އަށް ފައިދާ ހުރި ކަންކަން ކޮށްދިނުން ކަމަށް އެ ކުންފުނީގެ މާކެޓިން މެނޭޖަރު ނިއުޝާދު ޝަރީފް ވިދާޅުވި އެވެ.

"އަޅުގަނޑުމެން ބަލާނީ މިސާލަކަށް ކޮމްޕިއުޓަރު ނެތް ރަށްރަށަށް ނުވަތަ އާންމު ނުވާ ރަށްރަށަށް ކޮމްޕިއުޓަރު ހަދިޔާ ކުރުމަށް. ދެން އުރީދޫ އިން މި ކުރާ ކަމަކީ އެ ތަންތަނަށް ހިލޭ އިންޓަނެޓް ދެނީ. މި ނޫނަސް ގިނަ ކަންކަން ރޭވިފައި އެބަހުރި،" ނައުޝާދު ވިދާޅުވި އެވެ.