އަމިއްލަ އަށް ފައިސާ ދައްކަން ޖެހޭ ހާލަތުގައި އާސަންދަ ލިބޭނެ

ސިއްހީ ހިދުމަތްތަކަށް އަމިއްލަ އަށް ފައިސާ ދައްކަން ޖެހޭ ކޮންމެ ހާލަތެއްގައި، ސަރުކާރުގެ އިންޝުއަރެންސް ސްކީމް އާސަންދަ ލިބޭނެ ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ބުނެފި އެވެ.

އާސަންދަ ރިފޯމްކުރަން ފަށައި، އެ ސްކީމަށް ގެނައި ބަދަލުގެ ދަށުން ޕްރައިވެޓް އިންޝުއަރެންސެއް އޮތް ނަމަ، އޭގެ ލިމިޓް ހަމަވުމުން ނޫން ގޮތަކަށް އާސަންދަ ދޫނުކުރަން ސިއްހީ ހިދުމަތްދޭ ތަންތަނަށް އާސަންދަ އިން އޮތީ އަންގައިފަ އެވެ.

ހުކުރު ދުވަހުން ފެށިގެން އެގޮތަށް އަމަލުކުރަމުން އައި ނަމަވެސް ސަރުކާރުގެ އެ ނިންމުމާ އެކު ޕްރައިވެޓް އިންޝުއަރެންސްގެ ހިދުމަތްދޭ ބައެއް ތަންތަނުން ވަނީ ކޭޝްލެސް ހިދުމަތް މެދުކަނޑާލައިފަ އެވެ. އޭގެ ސަބަބުން ހިދުމަތް ހޯދާ މީހުންނަށް ޖެހުނީ އަމިއްލަ އަތުން ފައިސާ ދެއްކުމަށެވެ.

އެ މައްސަލަ ބޮޑުވެ، އާންމުން ކަންބޮޑުވުން ފާޅުކުރަމުންދަނިކޮށް އެންސްޕާ އިން ރޭ ނެރުނު ބަޔާނެއްގައި ބުނީ އެއްވެސް ފަރާތަކަށް ޕްރައިވެޓް އިންޝުއަރެންސްގެ ކަވަރޭޖް ނުވަތަ ހިދުމަތް ނުލިބޭ ހާލަތެއް ނަމަ، އެ ފަރާތްތަކަށް މިހާރު ވެސް އާސަންދަ ސްކީމުން ހިދުމަތް ލިބޭނެ ކަމަށެވެ.

އެ ބަޔާނުގައި ބުނި ގޮތުގައި އަމިއްލައަށް ފައިސާ ދައްކަން ޖެހޭ ކޮންމެ ހާލަތެއްގައި ވެސް އާސަންދަ ލިބޭނެ އެވެ.

އެންސްޕާގެ ބަޔާނުގައި ވަނީ އާސަންދަ ސްކީމަށް ގެނައި ބަދަލާ ގުޅިގެން ދޮގު މައުލޫމާތު ފަތުރަމުންދާ ކަމަށް ބުނެ، ކަންބޮޑުވުން ފާޅުކޮށްފަ އެވެ.

އޭޑީކޭ އިން އިއްޔެ ބޭއްވި ނޫސްވެރިންގެ ބައްދަލުވުމުގައި ސަރުކާރުން އާސަންދަ ސްކީމަށް ގެނައި ބަދަލާ އެކު ޕްރައިވެޓް އިންޝުއަރެންސްދޭ ބައެއް ފަރާތްތަކުން ބަދަލުތައް ގެންނަމުންދާ ކަމަށާއި އޭގެ ތެރޭގައި ކޭޝްލެސް ހިދުމަތްތައް ހުއްޓާލަމުން އަންނަ ކަން ހާމަކުރެއްވީ އެ ހޮސްޕިޓަލުގެ ޗީފް މެޑިކަލް އޮފިސަރު ޑރ. އަބްދުﷲ ނިޔާފު އެވެ.

އޭގެ ސަބަބުން، ފަރުވާ ހޯދަން އަންނަ ފަރާތްތަކުން ހިދުމަތަށް އަމިއްލައަށް ފައިސާ ދައްކަން ޖެހުމުގެ ޝަކުވާ އަންނަ ކަމަށް ނިޔާފު ވިދާޅުވި އެވެ.

"އޭގެ މާނައަކީ ޕްރައިވެޓް އިންޝުއަރެންސް އޮތް ފަރާތްތަކުން އޭނާގެ ލިމިޓް ހަމަނުވާ ކަމަށް ވާނަމަ، އޭނާ އެ ހޯދަން އައި ހިދުމަތުގެ ފުރިހަމަ އަގު އޭނާ އަތުން ދައްކާފައި އޭގެ ބިލްކޮޅު ކަލެކްޓްކޮށްފައި އޭގެ ބިލްކޮޅު އިންޝުއަރެންސަށް ސަބްމިޓްކޮށްގެން އެ ފައިސާ އަނބުރާ ހޯދޭނެއޭ،" ނިޔާފު ވިދާޅުވި އެވެ.

އެކަމަކު ޝަކުވާތައް ބޮޑުވެ، ރާއްޖޭގައި އެންމެ ގިނަ ބަޔަކު އިންޝުއަރެންސް ހިދުމަތް ހޯދާ އެލައިޑުން ވަނީ ކޭޝްލެސް ހިދުމަތްތައް އަލުން ފަށައިފަ އެވެ.

އެލައިޑުގެ ނިންމުން ބަދަލުކޮށް، ސިއްހީ ހިދުމަތް ދޭ ތަންތަނަށް އެ ކުންފުނިން ރޭ ފޮނުވި މެއިލްގައި ބުނީ އައުޓްޕޭޝަންޓް ހިދުމަތް ހޯދާ މީހެއްގެ ލިމިޓް ހަމަވަންދެން ކޭޝްލެސް ކޮށް ހިިދުމަތް ދިނުމަށް މިހާރު ނިންމާފައިވާ ކަމަށެވެ. އެހެންވެ، އެ ބަލިމީހަކު "އައުޓްޕޭޝަންޓް" ގެ ހިދުމަތް ދޭ ތަނަކުން ސީދާ ބިލްތައް އެލައިޑަށް މިހާރު ފޮނުވޭނެ ކަމަށް މެއިލްގައި ވެ އެވެ.