ދަރިފުޅު ސަލާމަތްކުރަން މަންމަގެ ދެ ގުނަވަން ހަދިޔާކޮށްފި

އަމިއްލަ ފުރާނައަށް ބެލުމެއް ނެތި މަންމައަކު އޭނާގެ ހަތަރު އަހަރުގެ ފިރިހެންދަރިފުޅުގެ ފުރާނަ ސަލާމަތްކުރަން ދެ ގުނަވަން ހަދިޔާކޮށްފި އެވެ.

ނޮދަން އަޔަލެންޑްގެ ބަލީމޭނާ އަށް ނިސްބަތްވާ ސާރާ ލޭމޮންޓް ވަނީ އޭނާގެ ކުޑަ ދަރިފުޅު ޖޯ އަށް އެއް ކިޑްނީ ހަދިޔާކޮށްފަ އެވެ. އަދި އޭގެ މަސްތަކެއް ފަހުން ޑޮކްޓަރުން ވަނީ ސާރާގެ ލިވާގެ ވެސް އެއްބައި ނަގައި ޖޯގެ ޓްރާންސްޕްލާންޓް ކޮށްފަ އެވެ.

ޖޯ އަށް އެންމެ އަހަރެއް ވެސް ނުފުރެނީސް ކިޑްނީ އާއި ލިވާ އަށް ބަލިތަކެއް ޖެހުނެވެ. ޖޯގެ ދެ ކިޑްނީ ދުޅަވެގެން ގޮސް އޭނާގެ ފުއްޕާމޭ ފިތޭ ވަރަށް ދުޅަވުމުން ފުރާނަ ސަލާމަތް ނުކުރެވިދާނެ ކަމަށް ޑޮކްޓަރުންނަށް ހީވި އެވެ. އެހެންވެ ދެ ކިޑްނީ ނަގައި ޑައިލެސިސް ހަދައިގެން އޭނާއަށް ފަރުވާ ދެމުން ގެންދިޔަ އެވެ.

ދަރިފުޅުގެ ސިއްހަތާ މެދު ކަންބޮޑުވެ އޭނާގެ މަންމަ އަމިއްލައަށް ގުނަވަން ހަދިޔާކުރަން ލިސްޓުކުރި އެވެ. އެންމެ ފަހުން ދަރިފުޅަށް ކިޑްނީއަކާއި ލިވާގެ ބައެއް ދިނުމުގައި ސާރާ ވަނީ ކާމިޔާބު ހޯދައިފަ އެވެ.

ޖެނުއަރީ 2017 ގައި ސާރާ އޭނާގެ ލިވާގެ ބައެއް ހަދިޔާ ކުރުމަށްފަހު އޭގެ ހަތް މަސް ފަހުން ކިޑްނީ ވެސް ހަދިޔާ ކުރީ އެވެ.

މި ޓްރާންސްޕްލާންޓް ކުރުމަށް ޖޯ އެޑްމިޓްކޮށްފައި އޮތީ ބާމިންހަމް ޗިލްރަންސް ހޮސްޕިޓަލުގަ އެވެ. އޭނާގެ މަންމަ އޮތީ ކުއީން އެލިޒަބަތު ހޮސްޕިޓަލް ބާމިންހަމްގަ އެވެ.

މިކަމަށްޓަކައި ޑޮކްޓަރުން އެންމެ ފުރަތަމަ ސާރާގެ ކިޑްނީ ނަގައި، އެ ހޮސްޕިޓަލާ ހަތަރު މޭލު ދުރުގައި ޖޯ އޮތް ހޮސްޕިޓަލަށް ފޮނުވީ އެވެ. އޭރު ޖޯގެ ޓްރާންސްޕްލާންޓް ހަދާ ސާޖަނުން ތިބީ ފުރިހަމައަށް އެކަމަށް ތައްޔާރު ވެގެންނެވެ.

މި ޓްރާންސްޕްލާންޓަށް މިހާރު ދުވަސްތަކެއް ވެފައިވާއިރު ޖޯ ފެންނަނީ ކުރިޔަށް ވުރެ ވަރަށް ބޮޑުތަން ސިއްހަތު ރަނގަޅުކޮށް ކަމަށް އޭނާގެ މަންމަ ބުންޏެވެ. މުޅި އުމުރަށް ބޭސް ކާން ޖެހުނަސް ޖޯ އަށް މިހާރު މާ އުފަލުގައި ދިރިއުޅެވޭތީ މަންމަ ހުރީ އުފަލުންނެވެ.