މިހާ ގިނަ މިޔަރު އެއްތަނަކުން ދުށިންތަ؟

"މިޔަރުގެ މިހާ ފުރިހަމަ މަންޒަރެއް ދުށިންހޭ" ކިޔާފައި ފޭސްބުކްގައި މީހަކު ޝެއާކޮށްފައި އިން ވީޑިއޯ ފެނުމުން ފުރަތަމަ ހީކުރީ އެއީ ހަމަ އާދައިގެ ވީޑިއޯއެއް ކަމަށެވެ. ވީޑިއޯ ޕްލޭކޮށްލި އިރު ފުރަތަމަ ފެންނަނީ ދެތިން މިޔަރު ނަމަވެސް އެ މިޔަރުތަކުގެ ފަހަތުން އަންނަނީ ބައިވަރު މިޔަރެވެ. ކަނޑުގެ އެ ސަރަހައްދު ފުރާލަ އެވެ.

ހަގީގަތުގައި ވެސް މިއީ ފުރިހަމަ، އަދި އާއްމުކޮށް ނުފެންނަ މަންޒަރެކެވެ.

މިއީ ގއ. ކޫއްޑޫ ކައިރީގައި އޮންނަ މަޝްހޫރު ޝާކް- ޕޮއިންޓްގައި ތަމްރީން ނާޝިދު (ކެވިން) ނަގާފައިވާ ވީޑިއޯއެކެވެ. އޭނާއަކީ ކޫއްޑޫއާ ޖެހިގެން އޮންނަ ވިލިނގިލީ ޒުވާނެކެވެ. އެހެންވެ، މިޔަރުތަކުން ފުރިފައިވާ އެ ސަރަހައްދަށް އޭނާ ފަރިތަ އެވެ.

ކޫއްޑު އާއި ވިލިނގިއްޔާ ދޭތެރޭ އޮންނަ ކަނޑުއޮޅިއަކީ މިޔަރުގެ ހާއްޔެކެވެ. އެތަނަށް އެރި ފީނާ ބައެއް މީހުން ބުނާގޮތުގައި އަބަދުވެސް އެ ސަރަހައްދުގައި ގިނަ އަދަދަކަށް މިޔަރު އުޅެ އެވެ. އެއީ ކޫއްޑުއަށް ގަންނަ މަހުގެ ކަރުގޮހޮރު ފަދަ ތަކެތި އުކާލަނީ އެ ސަރަހައްދަށް ކަމަށްވުމުން ކަމަށް ގަބޫލު ކުރެވެ އެވެ.

ކޮންމެ ދުވަހެއްގެ މެންދުރު ފަހު ތިނެއް ޖަހާލާކަންހާއިރު، ކޫއްޑޫ ފެރީއަކުން އެ ސަރަހައްދަށް ގޮހޮރު ފަދަ ބައިތައް އުކާލަ އެވެ. އެއީ މިޔަރަށް ކާންދޭ ގަޑި އެވެ. ދިގު މިނުގައި 7-12 ފޫޓު ހުންނަ ވަރުގެ މިޔަރު ވެސް އެ ވަގުތު އެ ސަރަހައްދަށް ތިލަވެ އެވެ. މިޔަރާއެކު ބޮޑެތި ފަރުތޮޅި ވެސް އެތަނަށް ޖަމާވާ ކަމަށް، ފީނާ ބައެއް މީހުން ބުންޏެވެ.

"އެ ގަޑީގައި ފީނާއިރު ވަރަށް ސަމާލުވާން ޖެހޭނެ. އާއްމުކޮށް މިޔަރު ވަރަށް އެޓޭކް ނުކުރާނެ. އެކަމަކު ބަރަކޫޑާ ފަދަ އެއްޗެއްސަށް ވިސްނަން ޖެހޭނެ. ކާންދޭ ގަޑީގައި މިޔަރަށް ވެސް އުނދަގުލެއް ވެއްޖެ ނަމަ އެޓޭކްކޮށްފާނެ،" އެ ސަރަހައްދަށް އާއްމުކޮށް ފީނާ ޒުވާނަކު ބުންޏެވެ.

ކެވިން ވެސް ބުނިގޮތުގައި މިޔަރަށް ކާންދޭ ގަޑީގައި އެތަނަށް ފީނުމަކީ ނުރައްކާ ކަމެކެވެ.

ކޫއްޑޫ ފެރީން، މިޔަރަށް ކާންދޭނީ އެ ރަށުގެ ބޭރު ތޮއްޓާ ދިމާލުން ފަރުމަތީގަ އެވެ. އެއީ މިޔަރު ބަލަން އާއްމުކޮށް މީހުން ސްނޯކަލް ކުރާ ސަރަހައްދެވެ. ކަނޑުއޮޅީގައި އާއްމުކޮށް ފީނަނީ ވެސް އެކަމަށް ހާއްސަ މީހުންނެވެ.

ރާއްޖޭގައި މި ނޫނަސް ގިނައިން މިޔަރު ފެންނަ ސަރަހައްދުތައް ހުރެ އެވެ. އެކަމަކު ކޫއްޑޫ "މިޔަރު- ސްޕޮޓް"ވަރެއް ނުވެ އެވެ.

ކެވިން ބުނީ މިޔަރު ގިނައިން އުޅުނު ނަމަވެސް، އަދި އެއީ ރީތި މަންޒަރެއް ނަމަވެސް އެތަނަށް ގިނަ ދިވެހިން ޑައިވް ކުރަން ނުދާ ކަމަށެވެ. ސަބަބެއް ކަމަށް އޭނާ ލަފާ ކުރަނީ މިޔަރަކީ ނުރައްކާތެރި އެއްޗެއް ކަމަށް ގިނަ މީހުންނަށް ހީވުމެވެ.