މެމްބަރު ފައިސަލް، ފުވައްމުލަކަށް ލައިފް ބޯއީ ރިންގްތަކެއް ހަދިޔާކޮށްފި

މޫދަށް އެރިއުޅުމުގެ ތެރެއިން ހިނގާފާނެ ނުރައްކާތެރި ހާދިސާތަކުން މީހުންގެ ފުރާނަ ސަލާމަތް ކުރުމުގައި އެހީތެރިވެދިނުމުގެ ގޮތުން، ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު ފައިސަލް ނަސީމްގެ ފައިސަލް ފައުންޑޭޝަނުން ފުވައްމުލަކު ސިޓީގެ އެކި ސަރަހައްދުތަކުގައި ލައިފް ބޯއީ ރިންގްތަކެއް މިއަދު ބަހައްޓައިދީފި އެވެ.

ފުވައްމުލަކުގެ ފަސް ސަރަހައްދެއްގައި އެ ރިންގްތައް ބަހައްޓާފައިވާ އިރު އެ ތަކެތި އެ ރަށު ކައުންސިލާ ހަވާލުކޮށްދެއްވީ ފައިސަލް ފައުންޑޭޝަންގެ ޗެއާމަން ފައިސަލް ނަސީމެވެ.

އެ ފައުންޑޭޝަންގެ ޖެނެރަލް ސެކްރެޓަރީ ސާއިމް މޫސާ ވިދާޅުވީ "ރައްކާވެ، ތިބެމާ" ޕްރޮގްރާމްގެ ދަށުން އެ ރަށު ފަސް ސަރަހައްދެއްގައި ޖުމްލަ 20 ރިންގް ބަހައްޓާފައިވާ ކަމަށާއި އެ ތަކެތި ބަހައްޓާފައިވާނީ މޫދަށް އެރި އުޅުމުގެ ތެރެއިން މީހަކަށް ކަމެއް ދިމާވެއްޖެ ނަމަ އެ މީހަކު ސަލާމަތް ކުރުމަށް ބޭނުން ކުރެވޭނެހެން މޫދު ކައިރީގައި ކަމަށެވެ.

މީގެ ކުރިން ފައިސަލް ފައުންޑޭޝަނުން ވަނީ، ފައިސަލް ތަމްސީލު ކުރައްވާ ކާށިދޫ ދާއިރާގެ ދެ ރަށް ކަމަށްވާ ގާފަރާއި ކާށިދޫ ގޮނޑުދޮށުގައި ވެސް އެފަދަ ރިންގްތައް ބަހައްޓައިދީފަ އެވެ.

ސާއިމް ވިދާޅުވީ އެ ރިންގްތައް ބެހެއްޓުމުގެ އިތުރުން ފުވައްމުލަކު ސިޓީގެ މަގުތަކުގައި ހިނގާ އެކްސިޑެންޓްތައް މަދު ކުރުމަށްޓަކައި އާންމުން ހޭލުންތެރިކުރުމަށް މަގުތަކުގައި ބިލްބޯޑްތަކެއް ވެސް ހަރުކުރުމަށް ނިންމާފައިވާ ކަމަށެވެ.

ފައިސަލް ފައުންޑޭޝަނަކީ ހިލޭ ސާބަހަށް މުޖުތަމައަށް ފައިދާ ހުރި ގިނަ މަސައްކަތްތަކެއް ކުރަމުން އަންނަ ފައުންޑޭޝަނެކެވެ.