އިންތިހާބު ދުވަސްވަރު ލާދީނީ ފިކުރުގެ ނުފޫޫޒު ފޯރުވާ: ޑިފެންސް މިނިސްޓަރު

ރިޔާސީ އިންތިހާބުގެ ދުވަސްވަރު ބޭރުގެ އެކި ފަރާތްތަކުން ރާއްޖޭގައި ތަފާތު ދީންތައް ފެތުރުމަށް ނުފޫޒު ފޯރުވާ ކަމަށާއި މިއީ ސަމާލުވާން ޖެހޭ ކަމެއް ކަމަށް ޑިފެންސް މިނިސްޓަރު އާދަމް ޝަރީފް މިރޭ ވިދާޅުވެއްޖެ އެވެ.

ރާއްޖެ އިސްލާމްވި ދުވަހުގެ މުނާސަބަތުގައި މިރޭ އިސްލާމީ މަރުކަޒު ސަރަހައްދުގައި ބޭއްވި ޖަލްސާއެއްގައި ވާހަކަ ދައްކަވަމުން މިނިސްޓަރު ވިދާޅުވީ ރާއްޖެ އަކީ 100 ޕަސެންޓް މުސްލިމު ގައުމަކަށް ވުމުން ދުނިޔޭގައި ރާއްޖެއަށް ވަރަށް ރީތި ނަމަކާއި ޝުހުރަތެއް ލިބިފައިވާ ކަމަށެވެ. އެކަމަކު އެއާ އެކު ބައެއް މީހުންގެ މެދުގައި ކަންބޮޑުވުމާއި ހަސަދަ ވެސް އޮންނަ ކަމަށާއި އެހެންވެ، ލާދީނީ ނުފޫޒުތައް ރާއްޖެއަށް ފޯރުވަން މަސައްކަތް ކުރާ ކަމަށް އޭނާ ވިދާޅުވި އެވެ.

މިނިސްޓަރު ވިދާޅުވީ ރާއްޖޭގެ ސިޔާސީ ނިޒާމު ގާއިމުވެފައި އޮންނަ ގޮތުން ރިޔާސީ އިންތިހާބެއް ކައިރިވެގެން އަންނައިރު، ދީނީ ތަފާތު ފިކުރުތަކުގެ މީހުން ދީން ފެތުރުމަށް މިފަދަ ނުފޫޒުތައް ގިނައިން ފޯރުވާ ކަމަށެވެ. އެހެންވެ ގައުމުގެ މިނިވަންކަމާއި އިސްތިގްލާލު ދެމެހެއްޓުމަށް އެހެން ދީންތަކަށް ފުރުސަތު ނުދިނުމަށް ޖިހާދު ކުރަން ޖެހިފައިވާ ވެސް އާދަމް ޝަރީފް ފާހަގަކުރެއްވި އެވެ.

"އެ ދުވަސްވަރު އެފަދަ ނުފޫޒުތައް ފޯރުވަނީ އެއީ އެކަން ކުރުމަށް އެންމެ ރަނގަޅު ދަނޑިވަޅު ކަމަށްވާތީ. އެހެންވެ މިކަމަށް އަޅުގަނޑުމެން ވަރަށް ހުޝިޔާރުވެގެން ތިބެން ޖެހޭ،" އޭނާ ވިދާޅުވި އެވެ.

މިނިސްޓަރު ވިދާޅުވި ގޮތުގައި ރާއްޖެއަކީ ހުސް މުސްލިމުން އުޅޭ ގައުމަކަށް ވާތީ އިސްލާމީ އުސޫލުތަކަށް ނުފެތޭ ފިކުރެއް ނުވަތަ މަހުފޫމެއް ގެނައުމަށް ފުރުސަތު ދޭކަށް ނުޖެހެ އެވެ. އަދި އިސްލާމްދީނަށް ފުށުއަރާ ޑިމޮކްރަސީއަކީ ރާއްޖޭން ގަބޫލުކުރާނެ ޑިމޮކްރަސީއެއް ނޫން ކަމަށް ވެސް އޭނާ ވިދާޅުވި އެވެ. އެގޮތުން ބުދުކޯލުތައް ހަދައި، އެއްޖިއްސުން ގުޅުން ހިންގުމަށް ރާއްޖޭގައި ހުއްދަ ނުކުރެވޭނެ އާދަމް ޝަރީފް ވިދާޅުވި އެވެ.

ކަން މިހެން ހުރި ނަމަވެސް، ސޯޝަލް މީޑިއާގެ ޒަރީއާއިން ފަތުރާ މިފަދަ މައުލޫމާތުތައް ހުންނަނީ ތުއްތު ކުދިންނާއި ޒުވާނުންގެ ހިތްތަކަށް ފަސޭހައިން ވަދެ، ވިސްނޭ ގޮތަކަށް ކަމަށާއި މިއީ ކުރިމަތިވެފައިވާ ގޮންޖެހުމެއް ކަމަށް އޭނާ ވިދާޅުވި އެވެ. އަދި ޓެކްނޮލޮޖީ އާއި ސޯޝަލް މީޑިއާގައި މި ފަދަ ބުހުތާނު ދޮގުތައް ހަގީގަތެއްކަން ދޭހަވާ މިންވަރަށް ފެންނަން ހުރި މިކަމާ ބެލެނިވެރިންނާއި ސްކޫލުތަކުން ސަމާލު ވުމަށް މިނިސްޓަރު އިލްތިމާސް ކުރެއްވި އެވެ.