ސޮދަގާތު ފައުންޑޭޝަންގެ ހިތާނީ ފެސްޓިވަލް ފަށައިފި

ރައީސް އަބްދުﷲ ޔާމީންގެ އަނބިކަނބަލުން ފާތިމަތު އިބްރާހިމް ހިންގަވާ ސޮދަގާތު ފައުންޑޭޝަންގެ މި އަހަރުގެ ހިތާނީ ފެސްޓިވަލް މިއަދު ފަށައިފި އެވެ.

އެ ފައުންޑޭޝަނުން ކޮންމެ އަހަރަކު ބާއްވަމުން ގެންދާ އެ ފެސްޓިވަލް މި އަހަރު ބާއްވަނީ ހުޅުމާލޭގެ ރެހެންދި ސްކޫލާއި ގޭޓް ވޭ އިންޓަނޭޝަނަލް ސްކޫލްގަ އެވެ. މި އަހަރުގެ ފެސްޓިވަލްގައި 500 ކުދިން ހިތާނު ކުރަން ހަމަޖެހިފައިވާ ކަމަށް ސޮދަގާތު ފައުންޑޭޝަނުން ވަނީ ބުނެފަ އެވެ.

މުޅިން ހިލޭ ކުރިއަށް ގެންދާ އެ ފެސްޓިވަލްގައި ހިތާނުކުރި ކުދިންނަށް ފަސްޓް ލޭޑީ ފާތުން މިއަދު ވަނީ ޒިޔާރަތް ކުރައްވައި، އެ ކުދިންގެ ހާލު ބައްލަވާލައްވައިފަ އެވެ.

މި މަހުގެ ނިޔަލަށް ކުރިއަށް ގެންދާ މި ފެސްޓިވަލްގައި ހިތާނު ކޮށްފައިވާ ތިބޭ ކުދިން އަދި އެ ކުދިންގެ ކައިރީގައި ތިބޭ ބެލެނިވެރިންގެ ކެއުމުގެ ޚަރަދުތައް ބަލަހައްޓަނީ ސޮދަގާތު ފައުންޑޭޝަނުންނެވެ. އަދި ކުދިންނާއި ބެލެނިވެރިންނަށް ޚާއްސަ މުނިފޫހިފިލުވުމުގެ ހަރަކާތްތަކެއް ވެސް އޮންނާނެ ކަމަށް އެ ފައުންޑޭޝަނުން ބުނެ އެވެ.

މިދިޔަ އަހަރު ވެސް ސޮދަގާތު ފައުންޑޭޝަނުން ވަނީ ހިތާނީ ފެސްޓިވަލެއް ކުރިއަށް ގެންގޮސްފަ އެވެ. އެ ފެސްޓިވަލްގައި އެ ކުދިން ހިތާނު ކުރުމާއި ކުދިން ބެލެހެއްޓުމާއި ކެއުމުގެ ޚަރަދާއިި ޑޮކްޓަރަށް ދެއްކުމާއި ބޭނުންވާ ވަސީލަތްތައް ފޯރުކޮށް ދެނީ ވެސް ސޮދަގާތު ފައުންޑޭޝަނުންނެވެ.